Маңғыстау облысында Каспий теңізінде жүргізілген іздеу жұмыстары кезінде тағы екі әскери қызметшінің денесі табылды. Бұл туралы Sona.kz Lada.kz-ке сілтеме жасап хабарлады.
Осылайша қаза тапқандар саны 11 адамға жетуі мүмкін.
Алайда Қазақстанның Қорғаныс министрлігі әзірге ресми түрде тоғыз әскери қызметшінің қаза тапқанын растаған. Жаңа дерек бойынша ведомство әзірге ресми ақпарат таратқан жоқ.
Қайғылы оқиға 24 қыркүйекте Маңғыстау облысында Әскери-теңіз күштерінің оқу-жаттығуы кезінде болды.
Қорғаныс министрлігінің алдын ала мәліметінше, ауа райының күрт нашарлап, желдің күшеюінен 19 әскери қызметшіні теңізге алып кеткен.
Үш адам құтқарылды. Олардың бірі ауруханаға жеткізілген. Тоғыз адамның қазасы ресми расталғаннан кейін де іздеу жұмыстары жалғасты.
Оқиға бойынша қылмыстық іс қозғалды. Жедел-тергеу тобы құрылып, қажетті сот сараптамалары тағайындалды.
Премьер-министр Олжас Бектенов әскери қызметшілердің қаза болу себептерін тергеу үшін Үкімет комиссиясын құрды.
Комиссияны Премьер-министрдің орынбасары Қанат Бозымбаев басқарады. Оған оқиға орнына дереу барып, қайғылы оқиғаның себептерін жан-жақты анықтауды және қаза тапқандардың отбасыларына көмек көрсетуді ұйымдастыру тапсырылды.
Комиссия құрамына Қорғаныс министрі, Маңғыстау облысының әкімі, ТЖМ, Денсаулық сақтау, Еңбек және халықты әлеуметтік қорғау, Көлік министрліктерінің, Шекара қызметінің өкілдері және Бас әскери прокурор кірді.
Іздестіру-құтқару жұмыстары жалғасып жатыр.
