Қостанай облысындағы түзеу мекемелерінің аумағында мобильді сигналдың рұқсат етілген деңгейден жоғары болғаны үшін үш байланыс операторы әкімшілік жауапқа тартылды.
FBRK.kz Қостанай облысының прокуратурасына сілтеме жасап хабарлағандай, заң бұзушылықтар Beeline брендімен жұмыс істейтін «Кар-Тел» ЖШС, Kcell АҚ және ALTEL мен Tele2 операторларын ұсынатын «Мобайл Телеком-Сервис» ЖШС желілерінен анықталған.
Прокуратура Мемлекеттік радиожиілік қызметі, Қылмыстық-атқару жүйесі департаменті және байланыс операторларының өкілдерімен бірге жазасын өтеу мекемелерінің аумағында мобильді сигнал деңгейін өлшеген.
Тексеру нәтижесінде үш мекеменің аумағында да барлық үш оператордың сигналы белгіленген деңгейден жоғары екені анықталған.
Осыдан кейін прокуратура қадағалау актісін енгізді. Оның нәтижесі бойынша уәкілетті орган компанияларды Қазақстан Әкімшілік құқық бұзушылық туралы кодексінің 637-бабы 1-бөлігінің 16-тармағы бойынша байланыс саласындағы заңнаманы бұзғаны үшін әкімшілік жауапқа тартты.
Операторларға айыппұл салынды. Оның нақты мөлшері прокуратура хабарламасында көрсетілмеген.
Қылмыстық-атқару кодексінің 97-бабына сәйкес, байланыс операторлары өз желілерінің жұмысын оңтайландырып, түзеу мекемелерінің аумағында радиосигналдың таралу деңгейін төмендету үшін тиісті шаралар қабылдауға міндетті.
Мұндай талап сотталғандардың мобильді байланысты заңсыз пайдалануына, оның ішінде түзеу мекемесінен тыс жерде құқық бұзушылық жасауына жол бермеуге бағытталған.
Қостанай облысының прокуратурасы бұл бағыттағы жұмыстың жалғасатынын хабарлады.
