Премьер-министр Олжас Бектенов түнгі уақытта қатты шу шығарып, тұрғындардың тыныштығын бұзатын автокөлік және мотоцикл жүргізушілеріне қолданылатын шараларды күшейтуді тапсырды. Оның айтуынша, мұндай жағдайда тек айыппұл салумен шектелуге болмайды, деп хабарлайды Sona.kz Tengrinews-ке сілтеме жасап.
Бектенов бұл мәселені 22 қыркүйекте өткен Үкімет отырысында көтерді. Жиында жол қауіпсіздігі мәселесі де қаралды. Премьер-министр Ішкі істер министрі Ержан Саденовтан түнгі уақытта шу шығаратын жүргізушілерге қатысты қандай шаралар қабылданып жатқанын сұрады.
«Қатаң шаралар қабылдау қажет. Өйткені олар түнде адамдарға тыныштық бермейді», — деді Үкімет басшысы.
Ержан Саденовтің айтуынша, полиция мұндай құқық бұзушылықтарды тәулік бойы анықтайды. Бұған бейнебақылау камералары мен тұрғындардың 102 нөміріне жолдайтын хабарламалары көмектеседі.
Министр келтірген дерек бойынша, жыл басынан бері 372 осындай факт тіркелген. Барлық құқық бұзушы әкімшілік жауапкершілікке тартылып, 55 адам қамауға алынған. Көліктер мен мотоциклдер де айып тұрағына қойылады.
Бектенов мұндай жағдайларда айыппұлмен шектелмеуді тапсырды.
«Мұндай жағдайда айыппұл салудың қажеті жоқ — құқық бұзушыларды қамауға алу керек», — деді Премьер-министр.
Ішкі істер министрі бұл бағыттағы жұмыс күшейтілетінін мәлімдеді.
