«Әділет» партиясының басшылығында жаңа тағайындаулар болды.
Партия төрағасының бұйрығымен Асхат Оралов, Нұрсұлтан Байтілесов және Эльдар Жұмағазиев төраға орынбасарлары болып тағайындалды.
Олардың әрқайсысы партия жұмысының жеке бағытына жетекшілік етеді.
Асхат Оралов бақылау, талдау және партия қызметін бағалау мәселелеріне жауап береді.
Оның партиялық және мемлекеттік қызметте тәжірибесі бар. Әр жылдары Amanat партиясының атқарушы хатшысы, Павлодар облысы мен елорда әкімінің орынбасары, Ақпарат және қоғамдық даму вице-министрі қызметтерін атқарды. 2023 жылы Мәдениет және спорт министрі болды.
Нұрсұлтан Байтілесов құқықтық және заңнамалық бағытқа жетекшілік етеді.
Оның жауапкершілік аясына партия жұмысының құқықтық сүйемелдеуі мен заңнамалық бастамаларға қатысты мәселелер кіреді.
Эльдар Жұмағазиев экономика, салалық және өңірлік даму мәселелері бойынша партия төрағасының орынбасары болып тағайындалды.
Ол партияның экономикалық күн тәртібіне, жекелеген салалар мен өңірлерді дамытуға қатысты бағыттарға жауап береді.
Осылайша «Әділет» партиясы төрағасының орынбасарлары қатарына тағы үш адам қосылды.
Бұған дейін Әлия Адамбаева, Ержан Жылқыбаев және Қаныш Төлеушин партия төрағасының орынбасарлары болып тағайындалған еді.
Әлия Адамбаева коммуникация бағытына, Ержан Жылқыбаев идеологияға, ал Қаныш Төлеушин цифрландыру мәселелеріне жетекшілік етеді.
«Әділет» партиясы 2026 жылғы маусымда мемлекеттік тіркеуден өтіп, тамыз айында жаңа Құрылтай депутаттарын сайлауға қатысты.
Сайлаудан кейін партия орталық аппараттың құрылымын қалыптастыруды және негізгі бағыттарды төраға орынбасарлары арасында бөлуді жалғастырып жатыр.
