Батыс Қазақстан облысында дала өртін сөндіру кезінде өрт сөндіру бөлімінің взвод командирі Миршат Халиуллин қаза тапты.
Қайғылы оқиға 3 қыркүйекте Жәнібек ауданында болған. Құтқарушы Тау ауылдық округі аумағындағы құрғақ шөптің өртенуін сөндіруге қатысқан.
Марқұмның туыстарының айтуынша, өртті сөндіру барысында Миршат Халиуллинді әріптесі басқарған өрт сөндіру көлігі қағып кеткен. Алдын ала мәлімет бойынша, қою түтін салдарынан оқиға орнында көріну деңгейі өте төмен болған. Бұл жағдайдың нақты мән-жайы ресми түрде әлі анықталып жатыр.
Батыс Қазақстан облысының Төтенше жағдайлар департаменті қызметкердің қызметтік міндетін атқару кезінде жарақат алғанын растады. Ведомство мәліметінше, ол Жәнібек ауылындағы аудандық ауруханаға жеткізілген, алайда дәрігерлер оның өмірін сақтап қала алмады.
Миршат Халиуллин өрт сөндіру қызметінде 2016 жылдан бері еңбек еткен.
«Әріптесіміз қызметтік міндетін атқару кезінде қаза тапты. Отбасына барлық қажетті көмек көрсетілді», — деп хабарлады Төтенше жағдайлар министрлігі.
Марқұмның отбасына қажетті қолдау көрсетіліп, жерлеу рәсімін ұйымдастыруға да көмек беріліп жатыр.
Оқиғаға қатысты барлық материал Батыс Қазақстан облысының Полиция департаментіне берілді. Қазір тексеру жүргізіліп, қайғылы жағдайдың барлық мән-жайы анықталуда.
