«Іле-Балқаш» резерватында Амур есімді жолбарыс табиғи ортаға жіберілді. Ол Қазақстанда жолбарыстар популяциясын қалпына келтіру бағдарламасы аясында еркіндікке шығарылған екінші жыртқыш атанды, деп хабарлайды SONA.KZ Elordainfo.kz сайтына сілтеме жасап.
Экология және табиғи ресурстар министрлігінің мәліметінше, жолбарыс табиғатқа 31 қазанда жіберілген. Бұған дейін ол резерваттағы арнайы бейімдеу қоршауында болған.
Жолбарыс қалай дайындалды?
Табиғатқа жіберілмес бұрын Амур ветеринариялық тексеру мен мінез-құлық сынақтарынан өтті. Мамандар оның денсаулығын, аң аулау және өздігінен қорек табу қабілетін, сондай-ақ адамға реакциясын бағалады.
Жолбарысқа спутниктік бақылау қарғыбауы тағылды. Оның көмегімен мамандар жыртқыштың қозғалысын және жаңа ортаға бейімделуін бақылайды.
Үміттің жағдайы қалай?
Бұған дейін 31 шілдеде резерват аумағына Үміт есімді ұрғашы жолбарыс жіберілген еді. Министрлік мәліметінше, ол жаңа аумақты біртіндеп игеріп, өздігінен аң аулап жүр.
Ересек жолбарыстармен бірге Қазақстанға жеткізілген екі жолбарыс күшігі әзірге мамандардың бақылауында. Олар тиісті жасқа жетіп, ветеринариялық тексеруден өткеннен кейін әрқайсын табиғатқа жіберу мүмкіндігі жеке қаралады.
Жолбарыстар не үшін қайтарылып жатыр?
Бұрын Іле өзенінің аңғары мен Оңтүстік Балқаш өңірін Тұран жолбарысы мекендеген. Алайда XX ғасырдың ортасында мекендеу ортасының азаюы мен браконьерлік салдарынан жыртқыш Қазақстан аумағынан жойылды.
Популяцияны қалпына келтіру үшін оған генетикалық тұрғыдан жақын Амур жолбарысы таңдалды. «Іле-Балқаш» резерваты 2018 жылы құрылды. Ал 2026 жылғы мамырда Ресейден Қазақстанға екі ересек жолбарыс пен екі күшік жеткізілді.
Бағдарламаның мақсаты — табиғи ортада өздігінен тіршілік етіп, көбейе алатын жолбарыстар популяциясын қалыптастыру.
