Министрлік әншінің 2014 жылдан бері мәдениет саласында еңбек етіп келе жатқанын айтты. Марапаттау парағы жарияланған жоқ.
Әнші әрі блогер Анара Батырхан Республика күніне орай «Ерен еңбегі үшін» медалімен марапатталды. Осыдан кейін әлеуметтік желі қолданушылары әншінің қандай еңбегі ескерілгенін сұрай бастады. Бұл сауалдарға Мәдениет және ақпарат министрлігінің Мәдениет комитеті жауап берді, деп хабарлайды SONA.KZ Tengri Life басылымына сілтеме жасап.
Комитет әншінің еңбегі туралы не айтты?
Комитеттің мәліметінше, Батырхан 2014 жылдан бері мәдениет саласында еңбек етеді. Ол ән айтады, киноға түседі және телебағдарламалар жүргізеді. Ведомство оның музыкалық жобаларға қатысып, қазақстандық музыканы насихаттауға үлес қосып жүргенін де атап өтті. Комитеттің айтуынша, әнші марапатқа белгіленген тәртіппен ұсынылған.
Медальға кімдер ұсына алады?
«Ерен еңбегі үшін» медалі мәдениет, ғылым, экономика, әлеуметтік сала және мемлекеттік қызметтегі еңбек жетістіктері үшін беріледі. Үміткерді мемлекеттік органдар, шығармашылық одақтар, басқа ұйымдар мен еңбек ұжымдары ұсына алады. Әр үміткерге еңбек өтілі, нақты сіңірген еңбегі мен жұмыс нәтижелері көрсетілетін марапаттау парағы толтырылады. Ұсыныстарды мемлекеттік наградалар жөніндегі комиссия алдын ала қарайды.
Комитет Батырханның марапаттау парағын жарияламады және медаль беруге оның қандай нақты жетістіктері негіз болғанын атамады. Ведомство нұсқаулыққа сәйкес марапаттау парағын сұрау бойынша беруге шектеу қойылғанын және комиссия шешімдеріне түсініктеме берілмейтінін хабарлады.
