Қазақстанда көпқабатты тұрғын үйлерді басқару және күтіп ұстау тәртібін қайта қарау ұсынылды. Өзгерістер МИБ, ПИК жұмысына және тұрғын үйлердің бірінші қабатында орналасқан коммерциялық нысандарға қатысты болуы мүмкін.
Құрылтай депутаты Екатерина Смышляева «Әділет» фракциясы атынан тиісті депутаттық сауалды Өнеркәсіп және құрылыс министрі Ерсайын Нагаспаевқа жолдады.
Ұсыныстардың бірі МИБ төрағасын ауыстыру рәсіміне қатысты. Қазір жаңа төраға сайланғаннан кейін оның деректерін мемлекеттік ақпараттық жүйелерде және банктерде бөлек-бөлек өзгерту қажет.
Депутаттар бұл процесті автоматтандыруды ұсынып отыр. Яғни басшы ауысқан жағдайда ақпарат мемлекеттік және банк жүйелерінде артық құжат жинамай-ақ жаңартылуы тиіс.
Сонымен қатар ПИК-терді қайта тіркеу жұмысын аяқтап, көпқабатты үйлердің банк шоттарымен жұмыс істеудің бірыңғай тәртібін енгізу ұсынылды.
Тағы бір бастама цифрландыруға байланысты. Пәтер иелеріне үйді басқаруға, дауыс беруге, шығындарды бақылауға және қажетті ақпарат алуға мүмкіндік беретін тегін цифрлық сервис құру ұсынылып отыр.
Смышляева МИБ төрағаларының жауапкершілігіне де назар аударды. Оның айтуынша, төраға инженерлік желілердің жағдайы мен үйдің қауіпсіздығына жауап береді, алайда көптеген шешім тұрғындардың өздеріне байланысты.
«Төраға үйдің күтіп ұсталуына жауап береді, бірақ көптеген шешім меншік иелері мен тұрғындардың өз әрекетіне тәуелді. Соған қарамастан бақылаушы органдардың талабы көбіне төрағаға қойылады», — деді депутат.
Тұрғын үйлердің бірінші қабатында жұмыс істейтін кәсіпкерлік нысандарға қойылатын талаптарды да күшейту ұсынылды. Әңгіме олардың жұмысы үйдің техникалық жағдайына және тұрғындардың өмір сүруіне әсер ететін жағдайлар туралы болып отыр.
Бұдан бөлек, көпқабатты үйлерді күрделі жөндеуге қаржы тарту мүмкіндіктерін кеңейту және елдегі тұрғын үй қорына техникалық аудит жүргізу ұсынылды.
Ұсыныстар Өнеркәсіп және құрылыс министрлігіне жолданды. Әзірге оларды енгізу туралы түпкілікті шешім қабылданған жоқ.
