Қаржаубай Нұрымовқа қатысты тергеу амалдары басталып, оған «Басқа біреудің мүлкін қасақана жою немесе бүлдіру» бабы бойынша қылмыстық іс қозғалған. Осы жағдай бойынша полиция түсініктеме берді.
Бұған дейін қылмыстық істің қозғалғаны туралы отбасының адвокаты Асқар Қаймақов мәлімдеген. Жағдайды полиция түсіндірді.
«10 желтоқсанда Азат ауылында орын алған заңсыз әрекеттердің нәтижесінде автомобиль иесіне материалдық залал келтірілгені анықталды. Ол әкімшілік жауапкершілік шегінен асып кетті», — дейді облыстық полиция департаменті.
Құқық қорғау органдары Қаржаубай Нұрымовтың нақты қандай құқық бұзушылық жасағанын айтты.
«Нұрымов машинаны пышақпен тырнап, дөңгелекті тесіп тастады. Әрі қарай айналасындағыларға, оның ішінде кәмелетке толмағандарға қауіп төндіре отырып, азаматтардың қоғамдық тәртібі мен тыныштығын бұзуды жалғастырды», делінген хабарламада.
Еске салайық, Шерзат Полаттың ағасы Нұрқанат Ғайыпбаевтың жаназасынан кейін Қаржаубай Нұрымов шу шығарып, өз-өзіне қол жұмсайтынын айтты. Полиция Қаржаубай Нұрымовты алып кетті. Ол 15 күнге қамалды. Сонымен қатар Қаржаубайдың қарындасы мен күйеубаласын да полиция ұстады.
