Бүгін – еліміздің басты мемлекеттік мерекелерінің бірі – Конституция күні.
Қазақстанның Негізгі заңы 1995 жылы бүкілхалықтық референдумда қабылданды. Сол уақыттан бері бұл күн Тәуелсіздіктің, бірліктің және мемлекеттілікті нығайтудың символына айналды. Конституция елдің демократиялық құрылымын, азаматтардың құқықтары мен бостандықтарын, билік жүйесін айқындап берді.
? 2022 жылы Конституцияға ауқымды өзгерістер енгізілді: Қазақстан суперпрезиденттік үлгіден күшті Парламенті бар президенттік басқару жүйесіне өтті, жер мен табиғи ресурстар халыққа тиесілі деп бекітілді, азаматтарға Конституциялық сотқа тікелей жүгіну құқығы берілді. Сондай-ақ өлім жазасы түбегейлі жойылды.
? Президент Қасым-Жомарт Тоқаев Конституцияны «Тәуелсіздігіміздің берік тұғыры және мемлекеттілікті нығайтудың сенімді бағдары» деп атады. Оның айтуынша, 2022 жылғы конституциялық реформа ел тарихындағы ең мазмұнды өзгерістердің бірі болып, қоғам көптен күткен әділдік, ашықтық және жауапкершілік қағидаттарын бекітті.
? Биыл мереке демалыс күндеріне сәйкес келіп, қазақстандықтар үш күн қатарынан – 30, 31 тамыз және 1 қыркүйекте демалады. Елдің барлық өңірінде Конституцияның 30 жылдығына арналған концерттер, көрмелер мен мәдени шаралар ұйымдастырылуда.
