Маңғыстау облысындағы Ақтау — Бейнеу тасжолында болған ауыр жол апатынан төрт адам қаза тапты. Облыстық ауруханаға жеткізілген зардап шеккендердің екеуі ауыр жағдайда жатыр.
Полиция мәліметінше, жол-көлік оқиғасы 16 қыркүйекте шамамен сағат 20:30-да болған. Жетібайдан Шетпе бағытына қарай келе жатқан Toyota Camry жол үстіндегі түйені қағып кеткен.
Соққыдан кейін автомобиль қарсы бағыттағы жолаққа шығып, екінші Toyota Camry көлігімен соқтығысқан.
Апат салдарынан төрт адам оқиға орнында көз жұмды. Тағы төрт адам түрлі жарақаттармен медициналық мекемелерге жеткізілді.
Кейін Маңғыстау облыстық көпбейінді ауруханасы үш зардап шегушінің жағдайын хабарлады.
1986 жылы туған науқас бас миынан жарақат алған. 2004 жылы туған тағы бір адам көптеген дене жарақатын алған. Екеуі де жансақтау бөлімінде жатыр, жағдайлары ауыр.
1996 жылы туған үшінші пациент те көптеген жарақат алған. Ол травматология бөліміне жатқызылды. Дәрігерлер оның жағдайын тұрақты деп бағалап отыр.
Төртінші зардап шегушінің жағдайы туралы әзірге ақпарат жоқ.
Жол апаты бойынша қылмыстық іс қозғалды. Қажетті сараптамалар тағайындалып, көліктер арнайы тұраққа қойылды.
Полиция оқиғаның барлық мән-жайын, соның ішінде жолға шыққан түйенің иесін анықтап жатыр.
