Қонаев қаласында журналист Сандуғаш Дүйсенова мен адам өліміне әкелген жол-көлік оқиғасы бойынша сотталушы әйел арасында жанжал шықты. Журналистің айтуынша, әйел сот отырысының үзілісінде оның телефонын тартып алуға әрекеттеніп, қолынан ұрған.
Сотта не болды?
Сандуғаш Дүйсенованың сөзінше, үзіліс кезінде сотталушы әйел оның қолындағы телефонды тартып алмақ болған. Кейін қолынан ұрған кезде телефон жерге түсіп кеткен.
Оқиғадан кейін журналист Қонаев қалалық полиция басқармасына арыз жазып, қолындағы жарақаттарды тіркеткен.
Оның арызы бойынша сотқа дейінгі тергеу басталды.
Енді құқық қорғау органдары жанжалдың мән-жайын анықтап, қатысушылардың әрекеттеріне құқықтық баға береді.
Сотталушы туралы не белгілі?
Журналистпен жанжалдасқан әйел Алматы — Бішкек тасжолында болған адам өліміне қатысты қылмыстық іс бойынша сотқа тартылған.
Жол апаты салдарынан 25 жастағы ер адам қаза тапқан.
Басылымның мәліметінше, бұған дейін сот әйелді Қылмыстық кодекстің 345-бабы 3-бөлігі бойынша екі жыл алты айға бас бостандығынан айырған. Аталған бап жол қозғалысы ережелерін бұзу салдарынан абайсызда адам өліміне әкелген әрекеттерге қатысты қолданылады.
Сондай-ақ әйелдің Қарасай ауданындағы мектептердің бірінде мұғалім болып жұмыс істейтіні хабарланды.
Журналистке қатысты оқиға бойынша бөлек сотқа дейінгі тергеу жүргізіліп жатыр.
