Жетісу облысында TikTok желісіндегі тікелей эфирлерде заңсыз құмар ойын ұйымдастырған төрт тұрғын сотталды.
Прокуратура мәліметінше, олар әлеуметтік желі арқылы карта ойындарын өткізіп, 95 млн теңге заңсыз табыс тапқан.
Іс фигуранттарының бірі қылмыстық құқық бұзушылық жасалған кезде кәмелетке толмаған.
Сот төртеуін де Қазақстан Қылмыстық кодексінің заңсыз ойын бизнесін ұйымдастыру туралы 307-бабының 3-бөлігі бойынша кінәлі деп таныды.
Олардың әрқайсысы төрт жылға бас бостандығынан айырылып, мүлкі тәркіленді.
Жетісу облысының прокуратурасы әлеуметтік желілер арқылы ұйымдастырылатын заңсыз құмар ойындарды анықтау жұмысы жалғасып жатқанын хабарлады.
Үкім заңды күшіне енген жоқ.
