Sona.kz

Метка: Басты оқиғалар

  • Алматыда блогер Ілияс Сәриевке 26 алаяқтық эпизод бойынша айып тағылды

    Алматыда блогер Ілияс Сәриевке 26 алаяқтық эпизод бойынша айып тағылды

    Алматыда «Елге көмек» қорының жетекшісі әрі өзін «Қазақ Робин Гуды» деп таныстырған блогер Ілияс Сәриев пен оның сыбайласы Ақтоты Дүйсееваға қатысты сот процесі жүріп жатыр, деп хабарлайды Sona.kz Informburo.kz-ке сілтеме жасап.

    Тергеу дерегінше, айыпталушылар әлеуметтік желілерде жалған ақпарат таратып, қайырымдылық көмектің атын жамылып, азаматтардың қаржысын иемденген. Қылмыстық істе барлығы 26 эпизод бар.

    Бір жағдайда шетелде ем қабылдау үшін 35 млн теңге іздеген әйел блогерден көмек сұраған. Сәриев қаражат жинау үшін 1,5 млн теңге талап етіп, оның бір бөлігін алған.

    Сонымен қатар, айыпталушылар қажылық сапарына элиталық жағдайдағы бөлмелермен небәрі 500–600 мың теңгеге жолдама ұсынған. Нәтижесінде бір әйел 1 млн теңгеден астам қаржысынан айырылды.

  • ММА спортшысы Хасан Қасымбаевқа қарсы сотта куәлік берді

    ММА спортшысы Хасан Қасымбаевқа қарсы сотта куәлік берді

    Талғар аудандық сотында қылмыстық топ жетекшісі деп танылған Хасан Қасымбаевқа қатысты қылмыстық іс қаралып жатыр, деп хабарлайды Sona.kz Tengrinews.kz-ке сілтеме жасап.

    Сотта жәбірленуші, ММА спортшысы әрі жаттықтырушы Арман Әлиев куәлік берді. Ол 2021 жылы өзіне жасалған шабуылдың қалай өрбігенін егжей-тегжейлі баяндап берді.

    Әлиевтің айтуынша, дүкен жанында оған бес адам бірден шабуыл жасаған. Дайын тұрған көлікке күштеп отырғызып, Талғардан тысқары жерге апарып, бейсбол таяқтарымен ұрып-соққан.

    «Оянғанда көліктің артқы орындығында болдым. Аяғымды Руслан ұстап тұрды, денемді Мадияр, басымды Актанов қысып тұрды. Олар мені далаға шығарып, сұрақ қоя бастады. Султанбеков пен Аскаров бейсбол таяқтарымен ұрды», – деді спортшы.

    Жәбірленушінің сөзінше, оқиға кезінде бір күдікті — Мадияр Қалимжанов — киімін шешіп, атыстан алған жарақатын көрсеткен. Ол Әлиевті 2020 жылы Еңбекшіқазақ ауданындағы атысқа қатысы бар деп айыптап, түсініктеме талап еткен.

    Сонымен қатар Әлиев сотта Қасымбаевтың оқиға орнына келгенін айтты:
    «Актанов оған қоңырау шалып, не істеу керегін сұрады. Біраздан соң Қасымбаев көлікпен келді. Машинадан түспей, терезені түсіріп: “Жетер, кеттік, әшкере болдық, құқық қорғаушылар келе жатыр” деді. Содан бәрі тез көлікке отырып, кетіп қалды», – деді ол.

    Жәбірленуші кейін таныс таксистке хабарласып, сол арқылы үйіне жеткен.

  • «Қазтелекомға» қатысты тергеу басталды

    «Қазтелекомға» қатысты тергеу басталды

    Қазақстанның Бәсекелестікті қорғау және дамыту агенттігі «Қазтелекомға» қатысты тергеу жүргізуді бастады, деп хабарлайды Sona.kz ZTB арнасына сілтеме жасап.

    Ведомство дерегінше, 2024 жылы компания интернет-пакеттердің тарифін 20%-ға дейін қымбаттатқан. Атап айтқанда, жылдамдығы 100, 200 және 500 Мбит/с топтамалардың бағасы көтерілген. Агенттік бұл әрекет монополиялық жоғары бағаның белгісі болуы мүмкін деп отыр.

    Сонымен бірге, басқа операторлардың нарыққа шығуына кедергі келтірген бірқатар тосқауылдар анықталды. Мысалы, тұрғын үйлерге интернет тарту қиынға соққан, ал кабельдік канализацияға қол жеткізу үшін заңда қарастырылмаған төлем алынған.

    АЗРК араласқаннан кейін «Байланыс туралы» заңға түзетулер енгізіліп, виртуалды операторлардың қызметін жеңілдетуге және радиожиіліктерді бөлу бойынша сауда-саттыққа қатысуына мүмкіндік берілді.

    «Сондай-ақ, ұялы байланыс қызметтерінің бағасына талдау жүргізілді. Зерттеу нәтижесінде монополиялық жоғары баға қою белгілері анықталды. Қазіргі таңда ұялы байланыс операторы бойынша да тергеу тағайындау мәселесі қарастырылып жатыр», – делінген агенттік хабарламасында.

  • Шығыс Қазақстан облысында пойыз екі әйелді қағып кетті: біреуі қаза тапты

    Шығыс Қазақстан облысында пойыз екі әйелді қағып кетті: біреуі қаза тапты

    22 тамыз күні таңертең Шығыс Қазақстан облысында теміржолда қайғылы оқиға тіркелді. Қоршунова – Өскемен-1 аралығында пойыз екі әйелді қағып кетті, деп хабарлайды Sona.kz Kriminal Kazakhstan Telegram-арнасына сілтеме жасап.

    «Қазақстан темір жолы» АҚ мәліметінше, машинист жолда адамдарды байқап, шұғыл тежегішті басқан. Бірақ пойызды тоқтату мүмкін болмай, соқтығыс орын алған.

    Оқиға салдарынан бір әйел алған жарақатынан оқиға орнында көз жұмды. Екінші әйел ауыр жарақат алып, ауруханаға жеткізілді. Оның жағдайы дәрігерлердің бақылауында.

    Компания марқұмның туыстарына көңіл айтып, зардап шеккенге тез сауығып кетуін тіледі. Сонымен қатар, КТЖ азаматтарды теміржол маңында қауіпсіздік ережелерін қатаң сақтауға шақырды.

  • Қазақстандықтар Конституция күнінде қалай демалады

    Қазақстандықтар Конституция күнінде қалай демалады

    Қазақстандықтар Конституция күніне орай үш күн қатарынан демалады.

    «Электрондық үкімет» порталының дерегіне сәйкес, биыл 30 тамыз – Конституция күні сенбіге сәйкес келеді. Заңға сай, егер мереке демалыс күніне (сенбі немесе жексенбі) түссе, қосымша бір күнге ұзартылып беріледі.

    Осылайша, қазақстандықтар 30, 31 тамыз және 1 қыркүйек күндері (сенбі, жексенбі, дүйсенбі) демалады.

    ? Конституция күні – Қазақстандағы басты мемлекеттік мерекелердің бірі.
  • Алматыда белгілі тележүргізушінің анасынан дәрігер ақша талап етті

    Алматыда белгілі тележүргізушінің анасынан дәрігер ақша талап етті

    Алматыдағы Ұлттық хирургия орталығында жанжал шықты. Белгілі тележүргізуші Айнұр Ильясова анестезиологты пара талап етті және науқасқа қысым көрсетті деп айыптады, Sona.kz Azattyq Rýhy-на сілтеме жасап хабарлайды.

    Ильясованың айтуынша, 18 тамызда клиникаға түскен анасы 20 тамызда ота жасатқан. Бірақ отадан кейін анестезиолог туыстарынан ақша талап етіп, кейін палатаға келіп, психологиялық қысым көрсеткен.

    «Анестезиолог менің нөмірімді тек төтенше жағдай үшін пайдалану керек еді. Бірақ ол ақша талап етіп жазды. Мен директорға шағымданған соң, сол дәрігер қайтадан анама келіп, мені тыныштандыруды сұрады», – деді тележүргізуші.

    Оқиға әлеуметтік желіде үлкен резонанс тудырды. Желі қолданушылары мемлекеттік клиникаларда дәрігерлердің ақша талап ететіні жиі кездесетінін жазып жатыр.

    Қазір науқастың туыстары тергеу жүргізіп, кінәлі дәрігерді жауапқа тартуды талап етуде.

  • Атырауда ер адам әйелін балалардың көзінше өлтірді

    Атырауда ер адам әйелін балалардың көзінше өлтірді

    Атырауда 39 жастағы Ляззат Тасқынбаеваны күйеуі өлтірді. Қайғылы оқиға 19 тамыз күні болған, деп хабарлайды Sona.kz Orda.kz-ке сілтеме жасап.

    Марқұмның туыстарының айтуынша, ер адам әйелін жиі ұратын. Сол күні соққының бірі әйелдің желкесіне тиіп, ол ес-түссіз қалған. Оқиғаның бәрін марқұмның екі қызы көрді. Балалар жылап тұрып: «Мама, ояншы!» – деп анасына krет қайырған.

    Ляззат Тасқынбаева 14 жыл бұрын тұрмысқа шыққан. Жолдасынан көрген қысымға қарамастан, ол отбасын сақтау үшін шыдап келген. Соңғы бес жылда күйеуі жиі қол көтерген, әсіресе ішімдік ішкен кезде.

    Қайғылы оқиғадан кейін балалар интернатқа орналастырылды, олар психологтардың көмегін қажет етеді.

    Атырау облыстық полиция департаменті қылмыстық іс қозғалғанын хабарлады. Әйелін өлтірді деген күдікпен марқұмның күйеуі қамауға алынды.

  • «Ең мейірімді судья» қайтыс болды

    «Ең мейірімді судья» қайтыс болды

    88 жасында американдық судья Фрэнк Каприо өмірден өтті. Ол әлемге әділдігімен әрі мейірімділігімен танылды.

    Ресми Instagram парақшасында Каприоның ұзақ уақыт бойы ұйқы безі қатерлі ісігімен күресіп, өмірден өткендігі айтылды.

    Ол адамдарға деген ерекше көзқарасы үшін «ең түсіністікпен қарайтын судья» атанды. Әлеуметтік желілерде оның соттағы жылы шырайлы бейнежазбалары миллиондаған қаралым жинады.

    Жақындары Фрэнк Каприоны тек құрметті судья ғана емес, сонымен қатар сүйікті жар, әке, ата, дос ретінде есте сақтайды.

  • Қостанайда заңсыз такси жүргізушісі 41 мың теңге айыппұл төледі

    Қостанайда заңсыз такси жүргізушісі 41 мың теңге айыппұл төледі

    Қостанай облысында жолаушыларды заңсыз тасымалдаған жүргізуші әкімшілік жауапкершілікке тартылды, деп хабарлайды Sona.kz облыстық соттың баспасөз қызметіне сілтеме жасап.

    2025 жылғы 16 шілдеде Пригородное ауылында полиция қызметкерлері Toyota автокөлігін тоқтатқан. Көлікте төрт жолаушы болған, олардың бірі Жітіқара – Қостанай бағытына бару үшін 5000 теңге төлегенін растаған.

    Сот жүргізушінің жеке кәсіпкер ретінде тіркелмегенін және қызметі туралы хабарлама бермегенін анықтады. Осыған байланысты оған 15 АЕК көлемінде айыппұл салынып, 30% жеңілдікпен 41 286 теңге төлеу міндеттелді.

    Көлікті тәркілеу шарасы қолданылмады. Сот қаулысы заңды күшіне енді.

  • Ерлі-зайыпты қарақшылардың құрбаны болды

    Ерлі-зайыпты қарақшылардың құрбаны болды

    Алматылық ерлі-зайыпты түнгі уақытта қарақшылық шабуылдың құрбаны болды. Екі белгісіз адам олардың пәтеріне кіріп, үй иесін соққыға жығып, алтын әшекейлер мен қаражатты алып кеткен, деп хабарлайды Sona.kz Polisia.kz-ке сілтеме жасап.

    Оқиға түнгі сағат екілер шамасында болған. Ер адам алған жарақатынан кейін ауруханаға ауыр жағдайда жеткізілді.

    Полиция күдіктілерді ізін суытпай ұстады. Олардың бұрын сотталғаны анықталды. Қазір екеуі де қамауға алынды, айғақ заттар тәркіленді.

    Жетісу аудандық полиция басқармасының хабарлауынша, күш қолданумен жасалған қарақшылық қатаң жазаға тартылады.