Sona.kz

Метка: Басты оқиғалар

  • Ақтаудағы әке балаларын өгей әкесінің қорлығынан қорғады

    Ақтаудағы әке балаларын өгей әкесінің қорлығынан қорғады

    Ақтау тұрғыны Тұрал Латифов әлеуметтік желіде бейнежазба жариялап, кәмелетке толмаған балаларына бұрынғы жұбайының отбасында көрсетілген зорлық-зомбылық жайлы айтты, Sona.kz Tengrinews.kz-ке сілтеме жасап хабарлайды.

    Оның сөзінше, ажырасқаннан кейін 6 және 9 жастағы екі баласы анасымен бірге тұрып келген. Латифовтың айтуынша, өгей әкесі қызына қорлық көрсетіп, оқи алмайтыны үшін басын суға толы шелекке батырған.

    Әкесі балалардың жүйелі түрде ұрып-соғуға және психологиялық қысымға ұшырағанын жеткізді. Бұрынғы әйелінің алғашқы некесінен туған ұлы да үйден қашып шығып, болған жағдайды айтқан. Латифов құқық қорғау органдарына және қамқоршылық қызметіне жүгінгенін, балалардың өмірі мен денсаулығына алаңдайтынын атап өтті.

    Қазіргі таңда екі бала әкенің жанында, бұл шешімді қамқоршылық органдары қабылдаған. Маңғыстау облысы полиция департаменті кәмелетке толмағанды тәрбиелеу жөніндегі міндеттерді орындамау фактісі бойынша қылмыстық іс қозғалғанын хабарлады. Тергеу облыстық полиция басшылығының бақылауында.

  • Жиембай айыптауды өзгертуге талап қойды

    Жиембай айыптауды өзгертуге талап қойды

    Шымкент әкімінің орынбасары Руслан Берденовке қастандық жасады деп сотталған Ернар Жиембай үкімге келіспейтінін мәлімдеді, деп хабарлайды Sona.kz Informburo.kz-ке сілтеме жасап.

    Оның айтуынша, ол тоғыз жылға бас бостандығынан айыру жазасын өтеуге дайын, бірақ айыптауды қайта саралауды талап етеді. Жиембайдың сөзінше, әрекеті кісі өлтіруге оқталу емес, ҚК-нің 106-бабы бойынша «денсаулыққа қасақана ауыр зиян келтіру» ретінде қаралуы тиіс.

    «Тоғыз жыл болса да, әділ баппен болсын – кісі өлтіру ниетінсіз. Өйткені бұл іс аяқталған қылмыс: ауыр зиян келді, бірақ биологиялық өлім болған жоқ», — деді ол.

    Сондай-ақ Жиембайдың айтуынша, жанжал Берденовпен болған жеке кикілжіңнен туындаған. Оның сөзінше, шенеунік өзін балағаттап, жағасынан алып, түрмеге отырғызатынын айтқан.

    Апелляциялық шағым түсіру жоспары туралы сұраққа Жиембай әзірге жауап бере алмайтынын айтты. Ал жәбірленуші Руслан Берденовтің адвокаты пікір білдіруден бас тартты.

  • Күніне 2000 қоңырау: алаяқтардың айласы әшкереленді

    Күніне 2000 қоңырау: алаяқтардың айласы әшкереленді

    Алматыда құқық қорғау органдары шетелдік интернет-алаяқтарға жәрдем берді деген күдікпен екі азаматты ұстады, деп хабарлайды Sona.kz Informburo.kz-ке сілтеме жасап.

    Тергеу мәліметінше, ұсталғандар шетелдік сыбайластарымен сөз байласып, интернет-алаяқтық схемасын жүзеге асыруға құқықтық көмек көрсеткен. Осы тәсіл арқылы қазақстандықтарға күніне 2000-ға дейін қоңырау шалынып, олардың қаржысын иемдену мақсаты көзделген.

    Күдіктілер 19 тамыз күні полиция мен ҰҚК қалалық департаменті қызметкерлерінің қатысуымен арнайы операция барысында қолға түсті. Операцияға «Қазақтелеком» компаниясы қолдау көрсетті.

    Прокуратура азаматтарға бейтаныс адамдардың қоңырауларына сенбеуді және жеке деректер мен банк реквизиттерін хабарламауды ескертті

  • «Күтпеген жүк»: Алматы әуежайында шетелдік қолға түсті

    «Күтпеген жүк»: Алматы әуежайында шетелдік қолға түсті

    Алматы халықаралық әуежайында Пхукеттен ұшып келген 42 жастағы шетелдік ұсталды. Оның сөмкесінен есірткі табылды, деп хабарлайды Sona.kz Polisia.kz-ке сілтеме жасап.

    ІІМ дерегінше, жолаушының жүгінен жалпы салмағы 3 келіден асатын кептірілген марихуана салынған алты пакет анықталған. Тергеу мәліметіне сай, ол Бангкокта бейтаныс адамдардан сыйақы үшін жүк алып, оның құрамын тексермей Қазақстанға жеткізген.

    Полиция азаматтарды бөтеннің затын тасымалдаудан бас тартуға шақырды. Мұндай әрекеттер қылмыстық жауапкершілікке, соның ішінде ұзақ мерзімге бас бостандығынан айыруға әкелуі мүмкін. Сондай-ақ әуежайларда күмәнді жағдайға тап болған жолаушыларға бірден полицияға жүгіну ұсынылады.

  • Ернар Жиембай 9 жылға сотталды

    Ернар Жиембай 9 жылға сотталды

    Шымкент қаласының қылмыстық істер жөніндегі мамандандырылған ауданаралық соты қала әкімінің орынбасары Руслан Берденовке жасалған қастандық ісі бойынша үкім шығарды, Sona.kz Kazinform-ға сілтеме жасап хабарлайды.

    Сот шешімімен Ернар Жиембай 9 жылға бас бостандығынан айырылды. Үкім әлі заңды күшіне енген жоқ және апелляция тәртібімен шағымдануға болады.

    ? Еске сала кетейік, Руслан Берденовке қастандық 2023 жылдың тамызында жасалған болатын. Қала әкімінің орынбасары аман қалып, сотта куәлік берген еді.

  • Бестеректегі қайғылы оқиға: зардап шеккен қызға миына күрделі операция жасалуда

    Бестеректегі қайғылы оқиға: зардап шеккен қызға миына күрделі операция жасалуда

    Денсаулық сақтау министрлігі Абай облысының Үржар ауданындағы Бестерек ауылында болған жол апатынан зардап шеккен балалардың жағдайы туралы мәлімет берді, Sona.kz Tengrinews.kz-ке сілтеме жасап хабарлайды.

    Ведомствоның дерегінше, үш бала стационарда жатыр. Олардың бірінің жағдайы – өте ауыр, екеуінікі – тұрақты ауыр деп бағалануда. Балаларға бас-ми жарақаты, ішкі ағзалары мен тірек-қимыл аппаратының зақымдары диагноз қойылды.

    «Бір науқас қызға миына күрделі нейрохирургиялық операция жасалып жатыр, ішкі ағзаларындағы қан кету тоқтатылды. Балалардың жағдайы тұрақтанғаннан кейін оларды әуе бортпен Астанаға жеткізу мәселесі қаралады», – деп мәлімдеді министрлік.

    Ведомство өкілдері жағдайдың ерекше бақылауда екенін және үздік мамандардың көмекке тартылғанын атап өтті.

    Еске салайық, 19 тамызда Бестерек ауылында Toyota көлігін жүргізген 55 жастағы азамат үй қақпасының жанында тұрған балаларды қағып кеткен. Салдарынан екі бала оқиға орнында көз жұмды, тағы бірі ауруханаға барар жолда қайтыс болды. Үш бала түрлі жарақатпен ауруханаға жеткізілді.

    Көлік жүргізушісі ұсталды, қылмыстық іс қозғалды. Медициналық сараптама жүргізушінің апат кезінде мас болмағанын көрсетті.

    Қазақстан Президенті Қасым-Жомарт Тоқаев оқиға орнындағы балаларға көмек көрсету үшін дәрігерлер отырған ұшақты жіберуді тапсырды. Абай облысының әкімі Берік Уәли қаза тапқан балалардың отбасына қажетті көмек көрсетуді жүктеді.

  • Қонаевта бес шағынауданға көгілдір отын тартылып жатыр

    Қонаевта бес шағынауданға көгілдір отын тартылып жатыр

    Қонаев қаласында Кешенді даму жоспары аясында газдандыру жобасы жүзеге асуда. Ол Арна, Спутник, 19, 20 және Рауан шағынаудандарын қамтиды.

    Жобаның тапсырыс берушісі – Алматы облысы әкімдігінің салалық басқармасы. Бүгінге дейін жалпы жұмыстың 20%-дан астамы орындалды: жоба бойынша инженерлік желілердің жалпы ұзындығы 89 км, соның ішінде 7 км құбыр төселді. Сонымен қатар 7 мыңнан астам тік газ құбыры (стояк) орнатылды.

    Құрылыс бекітілген кестеге сай жүргізілуде. Жобаның жалпы ұзақтығы 14 ай: құрылыс 2025 жылдың соңына дейін аяқталып, одан кейін іске қосу-реттеу жұмыстары басталады. Абоненттерге көгілдір отынға қосу 2026 жылғы наурызда жоспарланып отыр.

    Кейіннен тұрғындарға табиғи газға қосылуға техникалық шарттар (ТШ) беріле бастайды. Қосылу құны шамамен 200–220 мың теңге аясында болады деп күтілуде.

    Алдағы жоспар

    Кешенді жоспар шеңберінде ауылдар, саяжайлар және жаңа шағынаудандарды газдандыру бойынша жобалық-сметалық құжаттар дайындалуда. Сондай-ақ көгілдір отынды тұрақты жеткізу үшін автоматтандырылған газ тарату стансасын (АГРС) салу жоспарланған.

    Бұл жобалардың жүзеге асуы қала тұрғындарының өмір сүру сапасын арттырып, дәстүрлі энергия көздеріне түсетін жүктемені азайтуға және коммуналдық инфрақұрылымды дамытуға мүмкіндік береді.

    Қазіргі таңда Қонаев қаласы және жақын елдімекендер бойынша 6 618 тұтынушы газға қосылған: оның ішінде 5 699 пәтер, 28 кәсіпорын және 78 шағын коммуналдық нысан бар. Қаланың газбен қамтылу деңгейі 42%-ға жетті.

  • Қонаев қаласында алғашқы жартыжылдықтағы әлеуметтік-экономикалық даму көрсеткіштері

    Қонаев қаласында алғашқы жартыжылдықтағы әлеуметтік-экономикалық даму көрсеткіштері

    Өнеркәсіп пен инвестиция
    Есепті кезеңде Қонаевтағы өнеркәсіп кәсіпорындары 37,8 млрд теңге өнім өндіріп, нақты көлем индексі 96%-ды құрады. Негізгі капиталға тартылған инвестиция көлемі 37,8 млрд теңге, НҚИ – 167,1%.

    Кәсіпкерлік
    Қала мен ауылдық округтерде 6875 шағын және орта кәсіпкерлік субъекті жұмыс істейді, 16 мыңнан астам адамды жұмыспен қамтиды. Шағын кәсіпкерліктен 19,5 млрд теңге салық түсті.

    Сауда
    Бөлшек сауда айналымы 21,9 млрд теңге (НҚИ 140,3%), көтерме сауда – 17,1 млрд теңге (НҚИ 110,4%).

    Жұмыспен қамту
    2025 жылдың алты айында 1607 азамат жұмысқа орналаспақ болып өтініш білдірді, оның 526-сы жұмыспен қамтылды (32,7%).

    Ауыл шаруашылығы
    Ауыл шаруашылығы өнімдері 6,7 млрд теңге, НҚИ 102,1%. Жылқы басы 54,4%-ға, құстар саны екі есеге артты. Сүт өнімділігі 2,1%, жұмыртқа өндірісі 51,7%-ға өскен.

    Құрылыс
    14,2 мың шаршы метр тұрғын үй пайдалануға берілді (2024 жылмен салыстырғанда 65,2%). Құрылыс жұмыстары 8 млрд теңге, НҚИ 121%.

    Қоғамдық тәртіп
    Алты айда қала аумағында 297 қылмыс тіркелді, қылмысты ашу көрсеткіші 87%.

  • Шерзат ісі: апелляциялық сот куәгерге қатысты қаулыны өзгеріссіз қалдырды

    Шерзат ісі: апелляциялық сот куәгерге қатысты қаулыны өзгеріссіз қалдырды

    Алматы облыстық сотының апелляциялық алқасы Шерзат ісі бойынша куәгер Дана Жақсылгелдіге қатысты шығарылған жеке қаулыны өзгеріссіз қалдырды, деп хабарлайды Sona.kz Kazinform-ға сілтеме жасап.

    Отырыс барысында сегіз сотталушыға қатысты материалдар қаралды. Сонымен қатар қылмыс орнында болған куәгерлер — Эльмира Нұрбекова мен Дана Жақсылгелдіге қатысты қаулы талқыланды.

    Апелляция Юлдаш Рузбакиев пен Арлан Қазекеновке де қатысты болды. Сот олардың қылмысқа қатыстылығын тексеру тергеу органдарының құзыретінде екенін атап өтті.

  • Ақмола облысында әйел жеті айлық нәрестесімен бірге терезеден құлап кетті

    Ақмола облысында әйел жеті айлық нәрестесімен бірге терезеден құлап кетті

    Степногорск қаласында көпқабатты үйдің жетінші қабатынан әйел мен оның жеті айлық қызы құлап, оқиға орнында көз жұмды, деп хабарлайды Sona.kz Kazinform-ға сілтеме жасап.

    Полицияның мәліметінше, қайғылы жағдай әйел туыстарының пәтерінде болған. Ауыр жарақат алған ана мен сәби дәрігерлер келгенше жан тапсырған.

    Қазір аталған фактіге қатысты Қылмыстық кодекстің «Абайсызда адам өліміне әкеп соқтыру» бабымен сотқа дейінгі тергеу басталды. Қажетті сараптамалар тағайындалып, оқиғаның мән-жайы анықталуда. Өзге ақпарат ҚПК-нің 201-бабына сәйкес жария етілмейді.