2025 жылғы 24 ақпан сағат 09:00 жағдай бойынша 1 облыстағы 1 республикалық маңызы бар автомобиль жолдарында көлік қозғалысына шектеу қойылды.
«Үшарал-Достық» автожолының 84-164 шақырым аралығы (Көктума ауылы — Достық стансасы).
Қазір республикалық жолдарды күтіп-ұстауға 715 арнайы техника мен 1751 маман жұмылдырылды.
Кей елдерге қазақстандықтар визасыз ғана емес, тіпті шетелдік төлқұжатсыз да бара алады.
2025 жылдың басында Қазақстан азаматтары 41 мемлекетке, сондай-ақ Қытай құрамына кіретін ерекше мәртебесі бар екі аумаққа – Макао мен Гонконгқа визасыз кіре алады.
Осылайша, қазақстандықтарға өз аумағына төлқұжатсыз кіруге және тұруға екі ел ғана мүмкіндік береді.
Сонымен бірге, Сыртқы істер министрлігі өкілдері мен Өзбекстан президентінің ақпаратына сәйкес, екі ел азаматтарының жеке куәлік арқылы шекарадан өтуіне рұқсат беру бойынша келіссөздер жүргізілуде.
2023 жылдың 1 қыркүйегінен бастап Өзбекстан мен Қырғызстан арасында осындай келісім күшіне енген.
Ұлттық қауіпсіздік комитеті Шекара қызметінің ресми мәліметі бойынша, қазақстандықтар Ресей мен Қырғызстанға ғана жеке куәлік арқылы кіре алады. Өзбекстанмен бұндай келісімдер жүргізіліп жатыр.
Қазақстанның Еңбек Ері, қазақ әдебиетінің классигі, жазушы-драматург Дулат Исабеков өмірден өтті.
Бұл туралы ақын Қасымхан Бегманов әлеуметтік желідегі парақшасында жазды.
«Қайран, Дулат ағам-ай, мынау жарық дүниеден Сіздің де кеткеніңіз бе?
Осы қазір ғана, он-он бес минут бұрын Естияр Дулатұлы інішегім маған осынау қайғылы хабарды жеткізді. Қазақстан Жазушылар одағының Төрағасы Мереке Әбдешұлына, қалабасының төңірегіндегі жігіттерге, басқа да ел ағаларына қаралы хабарды жеткіздім…», — деп жазды ол.
Дулат Исабеков 1942 жылы 20 желтоқсанда Оңтүстік Қазақстан облысы Арыс ауданы «Ленин жолы» ауылында туған. 1963 жылы әл-Фараби атындағы Қазақ мемлекеттік университетін бітірген. 1963-68 жж. Қазақстан Республикасы Телевизия және радио хабарын тарату жөніндегі мемлекеттік комитетте аға редактор, 1968-70 жж. «Қазақ Совет энциклопедиясы» бас редакциясында аға ғылыми редактор, 1971-76 жж. «Жұлдыз» журналында бөлім меңгерушісі, 1976-80 жж. «Жалын» баспасында редакция меңгерушісі, 1980-88 жж. ҚР Мәдениет министрлігі репертуарлық-редакциялық алқасының бас редакторы, 1988-97 жж. Қазақ теледидарының бас редакторы, «Жазушы» баспасының директоры, Қазақстан Жазушылар одағының хатшысы, 1997 жылдан Мәдениеттану ғылыми институтының директоры болған. Бүгінгі таңда республикалық мәдени-сараптамалық «Мәдениет» журналының бас редакторы, Т.Жүргенов атындағы ҚазҰӨА-ның профессоры.
1963 жылы «Жолда» атты алғашқы әңгiмесi Қазақстан жазушыларының «Замандастар» деген әңгiмелер жинағына ендi. Сол жылы «Шойынқұлақ» атты әңгiмесi «Лениншiл жас» газетiнiң үш нөмiрiне жарияланып, жас жазушыны оқушы қауымға кеңiнен таныстырды.
«Гауһар тас», «Дермене», «Перi мен Перiште», «Тiршiлiк», «Өкпек жолаушы», «Бiз соғысты көрген жоқпыз», «Қарғын» (роман, 1980) т.б. кітаптары шыққан. «Шойынқұлақ»,
«Ақырамаштан наурызға дейiн», «Ескерткiш», «Социализм зәулiмi», «Конфронтация», «Талахан-186», «Бонапарттың үйленуi», «Ай-Петри ақиқаты», «Кемпiрлер», «Шалдар», «Тыныштық күзетшiсi» секілді шығармалары әр жылдары жарық көрдi. Жекелеген повестерi мен әңгiмелерi немiс, чех, венгр, болгар, қытай, түрiк, өзбек және ағылшын тiлдерiне аударылып, шет ел оқырмандарына да кеңінен таңылды. Жазушының шығармалары бойынша «Гауһар тас» (1975), «Дермене» (1994), «Тауқымет» («Тiршiлiк» повесi бойынша, 1998), «Лоторея» («Ержеткенше» повесі бойынша, 2013), «Балуан Шолақ» («Жаужүрек» пьесасы бойынша, 2019) атты көркем фильмдер мен «Әпке» атты пьесасының негізінде телесериал түсірілген.
Қазақстанның Еңбек ері, ҚР Мемлекеттік сыйлығының және Тәуелсіз Қазақ ПЕН-клубы мен платиналы «Тарлан» сыйлықтарының, «Достық», «Құрмет» орденiнің иегері. Қазақстанның Құрметті жазушысы.
Ұлттық экономика вице-министрі Азамат Әмрин бірінші вице-министр болып тағайындалды.
«Қазақстан Республикасы Үкіметінің қаулысымен Азамат Кеменгерұлы Әмрин Қазақстан Республикасының ұлттық экономика бірінші вице-министрі қызметіне тағайындалды», – делінген хабарламада.
Әмрин еңбек жолын 1989 жылы Корнеев кеңшарында жұмысшы болып бастады.
1997 жылдан 2008 жыл аралығында Солтүстік Қазақстан облысының Салық комитетінде түрлі лауазымдар атқарды.
2008-2011 жылдары СҚО Шал ақын ауданының әкімі.
2011-2012 жылдары «Амрин К.К.» шаруа қожалығының менеджері.
2013-2015 жылдары ҚР Ұлттық экономика министрлігінің Салық және кеден саясаты департаменті директорының орынбасары.
2015-2020 жылдары ҚР Ұлттық экономика министрлігінің Салық және кеден саясаты департаментінің директоры.
Ұлттық экономика вице-министрі болып 2020 жылдың 20 қазанында тағайындалған болатын.
Мемлекеттік кірістер комитеті блогерлерге жіберілген хабарламаларға қатысты түсінік берді.
«2025 жылғы 19 ақпанда 53,3 млрд теңгеге 594 блогер бойынша бұрын жіберілген 1 014 хабарламадан жалпы сомасы 9,8 млрд теңгеге 93 блогерге жіберілген 169 хабарламаны кері қайтарып алу жүргізілгені туралы хабарлайды. Оның себебі хабарламаны жіберу және өңдеу процесінде техникалық ақау шықты», – деп хабарлады кірістер комитеті.
Енді салық органдары кері қайтарылған хабарламалармен жұмыс істеп жатыр.
Сенат төрағасы Мәулен Әшімбаев Қазақстанның халық әртісі Димаш Құдайбергенге Ізгі ниет елшісі төсбелгісін табыстады.
Әшімбаевтың сөзінше, қазір Әлемдік және дәстүрлі діндер көшбасшыларының VIII съезіне дайындық жұмыстары қарқынды жүргізіліп жатыр. Соның аясында Съездің дінаралық диалогты дамытуға және бейбітшілік пен келісім мәдениетін ілгерілетуге арналған идеяларын дәріптеу ісіне баса мән беріліп келеді.
Сенат төрағасы былтыр әлемнің әртүрлі мемлекеттеріндегі белгілі қоғам және дін қайраткерлері Съездің Ізгі ниет елшілері болып сайланғанын еске салды.
«Олардың қатарында талантымен дүние жүзіне танылған отандасымыз, әнші Димаш Құдайберген де бар. Осыған байланысты Димаш бауырымызбен арнайы кездесіп, оған Ізгі ниет елшісі белгісін ресми түрде табыс еттім. Осы орайда Димаш қазақтың ұлттық мәдениетін дәріптеумен қатар өнер арқылы бейбітшілік пен ізгілік идеяларын насихаттауға да үлкен үлес қосып келе жатқан дарын иесі екенін атап өткен жөн. Бұл маңызды миссия Съездің құндылықтарымен де үндесетіні белгілі», – деп жазды Сенат спикері әлеуметтік желідегі парақшасында.
Мәулен Әшімбаев алдағы уақытта Димаш өнерімен және креативті жобаларымен бірлік пен келісімді халықаралық деңгейде ілгерілетуге өз үлесін қоса береді деп сенім білдірді. Сондай-ақ оған шығармашылық табыс тіледі.
Қонаев қаласының әкімі Асхат Бердіханов Шеңгелді ауылдық округінде қызмет ететін шаруалармен, сорғы станцияларының басшыларымен кездесті.
Ауқымды жиында ауыл шаруашылығы саласын дамыту мәселесі талқыланды. Жауапты бөлімнің басшысы Асқар Ибраимовтың сөзінше, елдімекенде 9 сорғы станциясы орналасқан. Қазір оның төртеуінде көктемгі дала жұмыстарына дайындық басталып, ағымдағы жөндеу жасалуда.
Ал №4 сорғы станциясының басшылығы қаржылық тапшылықтың болуына байланысты жөндеу жүргізудің кешіктіріліп жатқанын мәлім етті. Осы орайда, Асхат Бердіханов әкімдікпен үшжақты меморандумға қол қою арқылы қажетті қондырғыларды уақытша пайдалану туралы ұсыныс білдірді. Егер бұл шара жүзеге асса, №4 сорғы станциясы 1000 гектардан астам жерді суарға мүмкіндік болады.
Сондай-ақ басқосуда басқа да сорғы станцияларының желілерін жаңғыртуға қажетті құжаттар дайындалып жатқаны айтылды. Ал №5 сорғы станциясының суару желілерін күрделі жөндеу жұмыстары 2022 жылы басталған болатын. Барлық жобаларда тапсырыс беруші – Алматы облысының құрылыс басқармасы.
Суды үнемдеу мәселесіне келсек, қазіргі таңда тамшылатып суаруға қажетті құрал-жабдықтарды өндіруші «Жібек жолы» ЖШС-мен шаруалар келіссөздер жүргізіп жатыр. Биыл жаңа технология пайдаланылатын егістік алқабының көлемін ұлғайту жоспарлануда.
Сонымен қатар шаруаларға берілетін мемлекеттік қолдауларды алудың түрлі тетіктері де айтылды. (Ол туралы қосымша ақпарат жарияланады).
Айта кетейік, былтыр Шеңгелдіде 8050 гектар жер игерілген.
Астанада Киберқылмысқа қарсы іс-қимыл басқармасының қызметкерлері жедел-іздестіру шаралары барысында жоқ үйлерді жалға берумен айналысқан 29 жастағы әйелді ұстады.
Астана қаласы Полиция департаментінің баспасөз қызметінің мәліметінше, күдікті Krisha.kz сайтында үйлерді жалға беру туралы жалған хабарландырулар жариялаған.
Жәбірленушілермен хат алмасу кезінде ол Астана, Алматы қалаларында және «Бурабай» демалыс базасында үйлерді жалға беруге уәде еткен. Пәтер жалдауға қызығушылық танытқан азаматтар жалған банк шоттарына алдын ала төлемдерді аударып, кейін пәтер иесімен байланыс үзілген. Салдарынан жәбірленушілер ақшасынан айырылды. Жедел іс-шаралардың нәтижесінде полиция қызметкерлері күдіктіні анықтап, қолға түсірді. Ұсталған азаматша өз кінәсін мойындады. Қазіргі уақытта тергеу жүргізілуде, күдіктінің 5 эпизодқа қатысы бар екені анықталды, – делінген хабарламада.
Астана қаласының Полиция департаменті азаматтарды сақ болуға және ақша аударудан бұрын ақпаратты мұқият тексеруге шақырды.
Қарағанды қаласының кәмелетке толмағандар істері жөніндегі мамандандырылған сотында бала саудасына қатысты қылмыстық іс қаралып жатыр.
Алдын ала мәлімет бойынша, 2022-2024 жылдар аралығында ауыл тұрғыны екі баланы дүниеге әкеліп, оларды перзентхана қызметкерінің көмегімен әрқайсысын 3 миллион теңгеден сатқан.
Ол баладан туыла салып бас тартқан. Кейін перзентхана қызметкері Астанада тұратын алматылық, баласыз ерлі-зайыптылармен байланысып, нәрестені 3 миллион теңгеге сату мәмілесін ұйымдастырған. Екі жылдан кейін дәл осындай жағдай қайталанып, әйел тағы бір сәбиін дүниеге әкеліп, оны да 3 миллион теңгеге сатқан.
Полиция қылмыстық кодекстің 135-бабы «Кәмелетке толмағандарды саудалау» бойынша қылмыстық іс қозғады.
Қытай ғалымдары HKU5-CoV-2 деп аталатын жаңа коронавирус түрін анықтады. Бұл штамм Гонконгтегі жапондық ергежейлі жарқанаттардан табылған.
Ғалымдардың айтуынша, вирус тез жұғалы және адамға тікелей немесе аралық тасымалдаушылар арқылы берілуі мүмкін.
Жаңа вирус қандай ауру тудырады?
HKU5-CoV-2 коронавирусы Таяу Шығыс респираторлық синдромын (MERS) қоздыруы мүмкін. Бұл ауру қатты жөтелмен қатар пневмония сияқты асқынуларға әкеледі. Бұған дейін COVID-19 вирусы да осындай ауыр тыныс алу жолдарының ауруларын тудырғаны белгілі.
Зерттеу қайда жасалды?
Зерттеу жұмыстарына Ухань вирусология институтының мамандары қатысқан. Бұл институт пандемияның алғашқы кезеңінде коронавирустың зертханадан таралуына қатысты айыптауларға ұшыраған еді. Зерттеу нәтижелері South China Morning Post басылымында жарияланды.
Қауіп бар ма?
Вирусологтар қазіргі уақытта жаңа вирусқа байланысты эпидемиялық қауіп жоқ екенін мәлімдеді. Алайда оның нақты қаупін анықтау үшін қосымша зерттеулер қажет. Ғалымдар вирустың адамға таралу мүмкіндігін толық зерттемейінше, болашақта қандай қауіп төндіретіні белгісіз.