Sona.kz

Метка: Басты оқиғалар

  • Ағаш егуге бөлінген қаржының есебі бар ма? – Депутат

    Ағаш егуге бөлінген қаржының есебі бар ма? – Депутат

    Өңірлерде 15 млн көшет отырғызу жоспарланса да, іс жүзінде олардың саны 3 млн-ға да жетпепті. Бұл туралы Мәжіліс депутаты Бақытжан Базарбек мәлімдеді. Оның айтуынша, бір ғана Маңғыстау облысында жүздеген мың ағаш егілмей қалған. Қалған өңірлерде де мұндай мысал көп. Депутат бюджет қаржысы ұрланып жатыр деп күдіктенеді.

    ҚР парламенті Мәжілісінің депутаты Бақытжан Базарбек: «Әр ағаш – бұл ақша, халықтың қаржысы ғой. Мұндай мысал әр аймақта бар. Бір жерде 30, бір жерде 50, бір жерде 100-150 мың ағаш егілмеді. Мұны біреу бақылай ма, әлде жай ақша бөліп отыра бересіздер ме? Депутат ретінде осыны білгім келеді. Бөлінген қаржы қомақты. Неге бұл фактілер бойынша бірде-бір қылмыстық іс қозғалған жоқ, ешкім жауапқа тартылған жоқ?», – деді.

    Депутаттың сынына Орман шаруашылығы және жануарлар дүниесі комитетінің өкілі жауап берді. Олардың айтуынша, ақша ұрланбады, керісінше, қаржыландыру жеткіліксіз болды. Сол үшін жоспарды орындау мерзімі 2027 жылға дейін ұзартылды.

  • Мектеп оқушыларына жылқы еті, жент пен қаймақ беріледі

    Мектеп оқушыларына жылқы еті, жент пен қаймақ беріледі

    Енді оқушыларға жылқы еті, жент пен қаймақ беріледі, деп хабарлайды 31 арнаның Информбюро ақпараттық бағдарламасы.

    Сонымен қатар дастарханда қант пен тұздың мөлшері аз тағамдар тұру керек. Бұдан бөлек, балаларға хош иісті шай мен майлылығы аз сүт және йогурт ұсынылады.

    Салаттар қияр, қызанақ, тәтті бұрыш, қырыққабаттан дайындалады және балалар салатты өздері таңдайтын болады. Ал ыстық тамақ жылқы, сиыр еті мен балықтан пісірілуге тиіс. Сонымен қатар алма, банан, құрма, ірімшік беріледі.

    Айта кетейік, жаңа мәзірді Денсаулық сақтау министрлігі нутрициолог мамандармен бірлесе отырып дайындаған. Жауапты ведомство мәліметінше, бүгінде бастамаға толықтырулар енгізіліп жатыр.

     

  • Есірткі қылмысына қарсы күреске арналған Telegram-бот таныстырылды

    Есірткі қылмысына қарсы күреске арналған Telegram-бот таныстырылды

    «Нашақорлыққа жол жоқ» жобасын іске асыру аясында облыс прокуратурасының үйлестіруімен Спорт федерациясы, мәслихат депутаттары және полиция департаментінің ұйымдастыруымен жастар арасында республикалық киокушинкай-кан каратэ бойынша халықаралық турнир өтті.

    Турнирге Қырғыз Республикасынан және еліміздің 9 облысынан 300-ден астам спортшы қатысты. Спорттық шарамен қатар, іс-шара аясында нашақорлыққа қарсы күрес бойынша маңызды профилактикалық жұмыс жүргізілді.

    Шара барысында қатысушылар мен көрермендерге облыстық прокуратура әзірлеген Telegram-боттың жұмыс алгоритмі таныстырылды. Сондай-ақ, ботқа сілтемесі бар QR-кодтары бейнеленген ақпараттық парақшалар таратылды.

    Қазіргі уақытта Telegram-боттың мүмкіндіктері туралы халықты хабардар ету және ақпараттық парақшаларды тарату жұмыстары облыстың барлық аудандарында жалғасуда. Боттың қызметімен танысу үшін сілтеме арқылы өтіп, «Пайдалы ақпарат» бөлімін таңдауға болады.

    Кез келген азамат «Сенім телефоны» функциясын басу арқылы облыстық прокуратура мен полиция департаменті қызметкерлерінің байланыс нөмірлерін ала алады.

    Облыстық прокуратура Telegram-боттың енгізілуі нашақорлықпен күресті жеделдетіп, мемлекеттік органдар, білім беру мекемелері және қоғам арасындағы ынтымақтастықты нығайтуға ықпал ететініне сенімді.

  • Қазақстанға келген туристерге QR-коды бар арнайы карталар беріледі

    Қазақстанға келген туристерге QR-коды бар арнайы карталар беріледі

    Жүйе туристердің қауіпсіздігіне ғана емес, сонымен қатар шетелдік инвестициялар үшін қолайлы әрі тиімді орын ретінде Қазақстанға деген сенімді арттыруға бағытталған.

    Енді әрбір шетелдік қонаққа елге кірген бойда, сондай-ақ шекара бақылауынан өткен кезде электрондық көп тілді SafeTravel.kz порталына нұсқайтын QR-коды бар арнайы карточка беріледі.

    Порталда туристердің Қазақстанда қауіпсіз жүріп-тұруына қажетті ақпарат пен ұсынымдар, сондай-ақ пайдалы мобильді қосымшаларды жүктеуге сілтемелер көрсетілген.

    QR-коды бар алғашқы карточкалар елорданың халықаралық әуежайында шетелдік қонақтарға тапсырыла бастады.

    SafeTravel.kz-те:

    • Полициямен жедел байланыс орнатуға арналған «102» мобильді қосымшасы, оның ішінде «SOS» функциясы;
    • Көші-қон заңнамасын сақтау жөніндегі жадынама;
    • Танымал қосымшаларға сілтеме мен жүрген қаланың картасы;
    • Ресми такси мен онлайн-қызметтердің тізімі;
    • Байланыс операторлары мен олардың ресми сайттарына сілтеме;
    • Түрлі оқиғалар бойынша әрекет ету алгоритмдері;
    • Жедел жәрдем, өрт сөндіру мен құтқару сияқты басқа да шұғыл қызметтердің байланыс нөмірлері қолжетімді.
  • Қыз алып қашқандар 5 жылға сотталуы мүмкін

    Қыз алып қашқандар 5 жылға сотталуы мүмкін

    Мәжіліс депутаты Мұрат Әбеновтің айтуынша, заңға толықтыру ҚР Қылмыстық кодексінің оңтайландыру жөніндегі жұмыс тобының қарауында.

    Жауапкершілік бас бостандығынан айыру, айыппұлдар, қоғамдық жұмыстар секілді түрлері қарастырылған.

    Барлығы жағдайға байланысты. Егер кәмелет жасына толмаған қыз балаға қатысты ма және оны адамдар тобы жасады ма, қандай да бір зиян келтірілді ме, психологиялық немесе физикалық қысым жасалды ма, оның бәрі бөлек қаралады, – деп нақтылады депутат.

     

  • Алмас Кішкенбаевқа сот үкімі шықты

    Алмас Кішкенбаевқа сот үкімі шықты

    Алматы қаласының әкімшілік құқық бұзушылық істер жөніндегі мамандандырылған ауданаралық соты жабық түрде Алмас Кішкенбаевқа қатысты әкімшілік құқық бұзушылық туралы істі қарады.

    ӘҚБтК-нің 434-бабының 1-бөлігінде қоғамдық тәртіп пен тыныштықты бұзатын жеке тұлғаларға зәбірлеп тиiскені үшін жауапкершілік қарастырылған.

    «Сотпен К.-ның мас күйінде бола тұра, осындай әрекеттерді жасағаны анықталды. Сотта К., оқиғаның мән-жайы есінде жоқ екенін түсіндірді. 434-баптың 1-бөлігінің санкциясы 20 АЕК мөлшерінде айыппұл салу немесе 5 күннен 15 тәулікке дейін әкімшілік қамаққа алу түріндегі жауапкершілікті қарастырады. Жауаптылықты жеңілдететін мән-жайлар анықталған жоқ. Сонымен қатар, жауаптылықты ауырлататын мән-жай мас күйінде құқық бұзушылық жасау болып анықталды. Жоғарыда айтылғандардың негізінде К.-ға ӘҚБтК-нің 434-бабының 1-бөлігінде көзделген әкімшілік құқық бұзушылықты жасағаны үшін кінәлі деп танылып, оған 15 тәулікке қамауға алу жазасы тағайындалды», – делінген Алматы соттары тартқан мәліметте. 

    Сот қаулысы заңды күшіне енген жоқ.

  • Бұрқанбұлақ сарқырамасына апаратын жолдың құрылысы биыл басталады

    Бұрқанбұлақ сарқырамасына апаратын жолдың құрылысы биыл басталады

    Соның ішінде 5 көпірді қайта жаңғырту, 1 көпірді орташа жөндеу, Бұрқанбұлақ сарқырамасына апаратын 15 км жолдың реконструкциясы, «Алматы – Өскемен – Лепсі – Ақтоғай» жолының 35-110 км учаскесінің жаңғырту жұмыстары, елді мекендерге кіретін жолдар, ішкі жолдар т.б. жобалар бар.

    Облыстық жолаушы көлігі және автомобиль жолдары басқармасының мәліметіне қарағанда, Жетісу облысы құрылғаннан бері 2023-2024 жылдары облыстық маңызы бар 391,4 км жол және 134 елді мекеннің ішкі көшелері жөнделген. Мәселен, 2024 жылы республикалық және облыстық маңызы бар автомобиль жолдары қайта жаңартылып, «Талдықорған-Үшарал» (313 км), «Лепсі-Балқаш көлі» (27 км), «Сарыөзек-Көктал» (45-68 км) «Жаркент-Қорғас» (328-360 км), «Үштөбе-Көпбірлік» (78 км) бағытындағы ірі жобалар пайдалануға берілді. Сөйтіп жақсы және қанағаттанарлық жағдайдағы обылыстық маңызы бар автожолдардың үлесі 94%-ға жеткізілді.

    Ал биыл өңірде 152 шақырым жолға, 53 елді мекеннің ішкі жолдарына жөндеу жасалады деп межеленген. Сондай-ақ, осы жылы республикалық маңызы бар жолдардың «Үштөбе – Кәлпе» және «Сырымбет – «Тау Жетісу» бағытындағы 2 учаскесіне қайта жаңарту және орташа жөндеу жасалады. Күрделі жөндеу шеңберінде «Сарыөзек – Көктал» автожолындағы Көнбе өзенінен өтетін жаңа көпір салу, «Сарыөзек станциясын айналып өту» автожолының жол құрылымын күшейту және ұзындығы 21 км (Мұқыры асуы учаскесі) «Қонаев – Талдықорған» автожолының жол жабынын қайта жаңарту жоспарда бар. Сонымен қатар осы жылы «Алматы облысының шекарасы — Сарыөзек кенті» (13 км), «Сарыөзек – Көктал» (112 км) және «Айдарлы-Көктал» (15 км) бағытындағы жолдар желісіне орташа жөндеу жұмыстары өткен жылдан өтпелі жоба ретінде жалғасады.

    «Жолдардың нормативтік жай-күйін сақтау мақсатында автоматтандырылған өлшеу станциялары орнатылуда. Облыс бойынша осындай 8 станция қойылды. Олардың 6-ы республикалық трассаларда, 2-еуі облыстық маңыздағы жолдарда орналастырылған. Мұндай станциялар жүк көліктерінің салмағын автоматты түрде өлшеп, белгіленген шектен асып кетпеуін қадағалайды», – делінген басқарманың хабарламасында.

    Атап өтсек, өткен жылы өңірде автомобиль жолдарында 24,0 млн. жолаушы тасымалданып, бұл көрсеткіш 2023 жылмен салыстырғанда 8% жуық өскен. Жолдардың сапасы жақсаруына қарай биыл да бұл көрсеткіш арта түседі деп жоспарланып отыр.

    «ҚазАвтожол» ҰК» АҚ ақпаратына сүйенсек, жолдардың күтімі бойынша өңірдегі республикалық маңызы бар қолданыстағы 873 шақырым жолға қысқы күтім жасалды. Бұл жұмыстарға 72 бірлік меншікті және 10 бірлік жалгерлік техника тартылды. Быиылғы қысқы кезеңде көктайғаққа қарсы материалдың қажетті қоры дайындалды. Оған қоса айта кетсек, 2023 жылдан техника паркін толықтыру жұмыстары басталды, яғни бүгінгі күні мұндағы техника саны 59-ден 72-ге ұлғайды.

    Жалпы облыстың автомобиль жолдарының жалпы ұзындығы
    3 988 км құрайды. Соның ішінде республикалық маңызы бар – 1 034 км, жергілікті маңызы бар – 2 954 км.

  • Екі ай бұрын жоғалған бойжеткеннің денесі табылды

    Екі ай бұрын жоғалған бойжеткеннің денесі табылды

    Марқұм Айша Хамитті жақын араласқан жігіті өлтіріп, денесін сөмкеге бөлшектеп салғаны белгілі болды. Полицейлер 19 жастағы күдіктіні ұстаған.

    Еске салайық, марқұм былтыр қараша айында үйінен «туған күн кешіне барамын» деп шығып кеткеннен табылмаған еді. Бірақ, оның телефонынан жақындарының хатына жауап келіп отырған.

    Айшаның әпкесі Әсия Хамиттің айтуынша, қызға 2 миллион теңгеден аса несие алдыртқан.

    – 19 жастағы бала екен, есімі – Нұрмахан. Несие алдыртқан, сомасы да үлкен. Екі миллионнан асу керек, біздің білуіміз бойынша. Қайтармаймын дегеннен кейін, Айша айтқан: «Ата-анама айтамын, полицияға арызданамын». Бұл сол жерде, пәтерде өлтірген, – дейді ол.

    Марқұм қыз сырқат әпкесін «осы кісіге көрсетемін» деп оның көмекшісімен, яғни күдікті жігітпен жаз айларында танысқан. Содан бері екеуі сөйлесіп жүрген көрінеді.

    – Ауру әпкесін емдеймін деп, TikTok-тан алаяққа кезігіп қалады. Сонымен барған кезде, жаңағы балдызы екен, көмекшісі боп жүрген, сөйтіп танысады. Біз сүйегін алып шыққан кезде, төрт жігіт әрең көтердік. Қыздың салмағы кемі – 60 келі. 19 жастағы жігіт ол 60 келі денені жалғыз өзі көтеріп жүре алмайды, – дейді марқұмның нағашысы Табиғат Әлібек.

    26 жастағы Айша отбасының жалғыз асыраушысы саналыпты. Мектепте қазақ тілі мен әдебиеті пәнінен сабақ берген.

    – Адам өлтіру дерегі бойынша Медеу аудандық полиция басқармасы қылмыстық іс қозғады. Күдікті ұсталып, қамауға алынды. Болған қылмыстың басқа да мән-жайы анықталып жатыр, – деп хабарлады Алматы қаласы ПД ресми өкілі Салтанат Әзірбек.

    Марқұмның денесінде зорлық белгілері болған-болмағанын сот-медициналық сараптасы арқылы анықтайды.

  • Сейсмикалық аймақта үй салу үшін ТЖМ рұқсатын алуға тура келеді

    Сейсмикалық аймақта үй салу үшін ТЖМ рұқсатын алуға тура келеді

    Сейсмикалық аймақтағы халықтың қауіпсіздігін қамтамасыз ету үшін жаңа жүйелі тәсілдер енгізіледі. Бұл туралы Төтенше жағдайлар министрі Шыңғыс Әрінов айтты.

    Министр Мәжіліс депутаттарына заң жобасындағы өзгерістерді таныстырды. Оның айтуынша, мемлекеттің, шаруашылық жүргізу субъектілерінің және халықтың өзара қарым-қатынасын реттейтін сейсмикалық қауіпсіздікті қамтамасыз ету жөніндегі іс-шаралар жеке тарау ретінде енгізіледі.

    «Атап айтқанда, министрлік пен жергілікті атқарушы органдарға сейсмикалық қауіптілікке бағалау жүргізу өкілеттігі беріледі. Мұнда халықты жер сілкінісінен қорғау және олардың салдарын жою жөніндегі іс-шаралар көзделеді. Сонымен қатар Министрлікке сейсмикалық, сел және көшкін қауіпсіздігін қамтамасыз етуде қала құрылысы жобаларын келісу бойынша функция беріледі. Жалпы Мемлекет басшысының тапсырмасы бойынша құрылған Төтенше жағдайлардың алдын алу комитетіне орталық мемлекеттік және жергілікті атқарушы органдарға қатысты төтенше жағдайлардың алдын алу жөніндегі бақылау функциялары беріледі»,  – дейді Шыңғыс Әрінов.

  • AZAL ұшағы сыртқы объектілердің әсерінен зақымданғаны белгілі болды

    AZAL ұшағы сыртқы объектілердің әсерінен зақымданғаны белгілі болды

    Көлік министрлігі «Azerbaijan Airlines» әуе компаниясының «Embraer-190» ұшағының апатқа ұшырауын тергеу туралы алдын ала есебін жариялады.

    Құжат Көлік министрлігінің ресми сайтында жарияланды.

    Құжатта көрсетілген дерекке сәйкес, Ақтау маңына құлаған ұшақты тесіп өткен зақымдар конструкцияға сыртқы объектілердің енгенін көрсетеді.

    «Апаттан кейінгі фрагменттерді тексеру кезінде фюзеляждың артқы бөлігінде, тік тұрақтандырғышта, лифт пен рульде әртүрлі өлшемдегі және пішіндегі зақымданулар анықталды. Сол сияқты ұқсас зақымданулар ұшақтың сол жақ қозғалтқышы мен сол қанатында, сондай-ақ ұшақтың тораптары мен бөлшектерінен табылды. Кейбір жерлерде зақым кәдімгі төртбұрышты пішінге ие», – делінген хабарламада.