Sona.kz

Метка: Басты оқиғалар

  • «Наурыз жұмыскер»: жаңа ипотекалық бағдарлама іске қосылады

    «Наурыз жұмыскер»: жаңа ипотекалық бағдарлама іске қосылады

    Елімізде Жұмысшы мамандықтар жылы аясында «Наурыз жұмыскер» жаңа ипотекалық бағдарламасы іске қосылмақ. Бұл – техникалық мамандарға арналған ипотека. Оған өнеркәсіп, энергетика, көлік, ауыл шаруашылығы және су ресурстары салаларының қызметкерлері қатыса алады.

    2025 жылы «Наурыз жұмыскер» бағдарламасы аясында 72 млрд теңгеге 2 440 несие беру жоспарланған.

    Өтінім қабылдау 2025 жылдың 17 наурызында басталмақ. «Наурыз жұмыскер» қазірдің өзінде белгілі «Наурыз» тұрғын үй бағдарламасының бір бөлігі болады.

    Сондай-ақ «Наурыз жұмыскер» бағдарламасымен қатар «Отбасы банк» отандық кәсіпорындармен «корпоративтік» өнім шеңберінде жұмыс істейді. Оның шеңберінде кәсіпорындар өз қызметкерлеріне несие беру үшін қаражат бөледі.

    Пайыздық мөлшерлеме. «Наурыз жұмыскер» бағдарламасы бойынша ипотека 9%-бен (ЖТСМ 9,4%-дан 13%-ға дейін) беріледі. Ал әлеуметтік осал санатқа жататындарға 7%-бен ұсынылады.

    Бастапқы жарна. Таза әрлеудегі дайын пәтер сатып алғысы келетіндер 10% алғашқы жарна жинауы керек. Ал жөндеу жұмыстары жоқ, жаңа салынған үйлер мен қайталама нарықтан баспана алатындар кемі 20% бастапқы жарна құюы шарт.

    Бағдарлама аясында облыстардағы тұрғын үйлерден пәтер сатып алуға 30 млн теңге ипотекалық несие беріледі. Ал Астана мен Алматы қалалары үшін – 36 млн теңге.

    «Президентіміз 2025 жылды Жұмысшы мамандықтары жылы деп жариялады. Кеншілер, металлургтер, тас қалаушылар, электриктер, құюшылар ауыр жұмыстарды атқарады. Осы және басқа да көптеген мамандық иелері бізді негізгі қажеттілігімізді қамтамасыз етіп отыр. Мұндай мамандарға жасалған қамқорлық – бүкіл қоғамның игілігі үшін жасалған қамқорлықпен тең. Көпшілігі қиын жағдайда жұмыс істейді. Сондықтан олардың баспана мәселесін шешу – қиын еңбек жағдайларының орнын толтыруға септігін тигізеді», – деді «Отбасы банкі» АҚ басқарма төрағасы Ләззат Ибрагимова.

  • Жетісу облысында 111 млн теңгенің 26 мың гектар жері мемлекетке қайтарылды

    Жетісу облысында 111 млн теңгенің 26 мың гектар жері мемлекетке қайтарылды

    Жетісу облысында жерді пайдаланушылар заң талаптарын бұза отырып, ұзақ уақыт бойы 38 жер учаскесін мақсатқа сәйкес пайдаланбаған.

    Прокуратура мәліметінше, Қаратал ауданы прокуратурасының қадағалау актісі бойынша жалпы ауданы 26 мың гектар, кадастрлық құны 111 миллион теңге болатын жер мемлекетке қайтарылды.

    «Мемлекет басшысының 2024 жылғы 2 қыркүйектегі жолдауы шегінде жергілікті атқарушы органдар қайтарылған жерлерді адал субъектілерге пайдалануы үшін беруге бағытталған. Бұл бағыттағы жұмыс жалғасып жатыр», – делінген хабарламада.

  • Трамп: Ресеймен қақтығысқа Зеленскийді кінәлі

    Трамп: Ресеймен қақтығысқа Зеленскийді кінәлі

    «Ресей мен Украинаның соғысын 24 сағаттың ішінде тоқтатамын» деп бірнеше рет мәлімдеген Дональд Трамп Украина президенті Владимир Зеленский келісімге келуге дайын екенін айтты.

    Алайда, Трамп Ресеймен қақтығысқа Зеленскийді кінәләді.

    Ол (Зеленский) бұл соғысты болдырмауы керек еді. Зеленский – періште емес. Ол әлдеқайда үлкен, әлдеқайда алып, күшті құрылыммен күресіп жүр. Ол бұған жол бермеуі керек еді, себебі келісімге келуге болатын, – дейді АҚШ президенті Fox News телеарнасына берген сұхбатында. 

    Еске салайық, бұған дейін Трамп Путинге арнап пост жариялаған болатын. АҚШ президенті Дональд Трамп Украинамен соғысты тоқтату туралы келісім жасалмаса, Ресейге жаңа санкциялар мен сауда баждарын енгізетінін мәлімдеген. Бұл туралы ол өзінің Truth Social әлеуметтік желісінде жазды.

    Егер біз «мәміле» жасаспасақ жақын арада Ресейдің Америка Құрама Штаттарына және басқа елдерге сататын барлық тауарына жоғары салықтар, баждар мен санкциялар салудан басқа амалым қалмайды. Мен президент болсам, ешқашан басталмауы тиіс болған осы соғысты аяқтайық! Біз мұны оңай немесе қиын жолмен жасай аламыз, бірақ оңай жолы қашан да жақсырақ. «Мәміле жасасар» уақыт келді, – деді АҚШ президенті.   

  • Жамбыл облысында ер адам өзін өртеп, суицид жасамақ болды

    Жамбыл облысында ер адам өзін өртеп, суицид жасамақ болды

    Жамбыл облысында ер адам өзін өртеп, суицид жасамақ болды. Оны құтқарушылар аман алып қалды. ТЖМ мәліметінше, бүін Жамбыл облысы ТЖД «112» қызметіне Тараз қаласындағы орта мектептің жанында ер адамның өз-өзіне қол жұмсамақ болғаны туралы хабарлама түскен.

    «Оқиға орнына жедел жеткен Төтенше жағдайлар министрлігінің құтқарушылары әрекеттің алдын алды. Жәбірленуші жеңіл күйік алып, ауруханаға жеткізілді», – делінген хабарламада.

  • Ақтаудағы ұшақ апаты: тергеу қорытындысы қашан жарияланады?

    Ақтаудағы ұшақ апаты: тергеу қорытындысы қашан жарияланады?

    Бұл туралы премьер-министрдің орынбасары Қанат Бозымбаев баспасөз мәслихатында айтты. Ол қара жәшіктердегі жазбаның көшірмелері Ресей мен Әзербайжанда екенін алға тартты.

    «Қара жәшік бойынша нақтылап өтсем деймін. Ешқандай залал келмеген, ештеңе жоғалған жоқ. Жазбалар оқылды. Барлық мәліметтің көшірмелері Ресей мен Әзербайжанға берілді. Біз жасыратын ештеңе жоқ», – деді вице-премьер Бозымбаев.

    Естеріңізге сала кетейік, Әзербайжанның Azerbaijan Airlines (AZAL) компаниясына тиесілі Embraer жолаушы ұшағы 2024 жылғы 25 желтоқсанда Ақтау қаласынан 30 шақырым апатқа ұшыраған еді.

  • Түркияда тағы да жер сілкінді

    Түркияда тағы да жер сілкінді

    Еуропалық Жерорта теңізі сейсмологиялық орталығы эпицентрі Маниса қаласынан солтүстік-батысқа қарай 135 км жерде орналасқан, 243 мың адам тұратын елді мекенде 5 балдық жерасты дүмпулері болғанын анықтады.

    Жер сілкінісінің ошағы 10 шақырым тереңдікте жатыр. Зардап шеккендер мен ғимараттың қирауы жайлы ақпарат болған жоқ.

    AFAD төтенше жағдайлар басқармасы, сонымен қатар жер сілкінісі Чанаккале провинциясына жақын жерде 23:38-де тіркелгенін хабарлады, ошақ Түркия жағалауынан 7 км қашықтықта Эгей теңізінде 8,65 км тереңдікте орналасыпты.

    Жер сілкінісі көрші провинцияларда да сезілген. Басқарманың хабарлауынша, қазіргі уақытта жағымсыз әсерлер тіркелген жоқ. Қызметкерлері мен жергілікті билік тексеруді жалғастырып жатыр.

    Айта кетейік, 2023 жылдың 6 ақпанында Түркияның Кахраманмараш провинциясының Пазарджик аймағында магнитудасы 7 балдан асатын екі жер сілкінісі тіркелген еді.

  • Алматыда ұшқышсыз дрондар шығарылады

    Алматыда ұшқышсыз дрондар шығарылады

    Yesil Technology Company компаниясы өнеркәсіптік пилотсыз дрондар шығаруды арнайы құрылатын өндірістік және ғылыми-зерттеу аймағында жүзеге асырмақ, деп хабарлайды aqshamnews.kz.

    50 000 шаршы метр аумаққа жаңартылған өндірістік инфрақұрылым, зерттеу орталықтары мен жаңа технологияларға негізделген кешенді жүйелер енгізіледі.

    «Жобаның нәтижесінде 500 жаңа жұмыс орны ашылып, жергілікті халықтың жұмыспен қамтылуына елеулі үлес қосылады. Бұл жоба елімізде жоғары технологиялық саланың дамуына ықпал етіп, жаңа мамандарды даярлау мен кәсіби біліктілікті арттыруға бағытталған түрлі бағдарламаларды іске асыруға мүмкіндік береді», – делінген хабарламада.

    Инвестиция көлемі 12 млн доллар болса, өнімдер тек Қазақстан нарығына ғана емес, Орта­лық Азия елдеріне де жеткізілетін болады. Бұл елдермен тығыз экономикалық байланыстар орнатуға және жаңа нарықтарды игеруге септігін тигізбек.

  • 97-ші «Оскар» сыйлығының иегерлері анықталды

    97-ші «Оскар» сыйлығының иегерлері анықталды

    23 қаңтар Америка киноакадемиясы 97-ші «Оскар» сыйлығының номинанттарын жария етті. Биылғы жылдың басты фавориті ретінде француз режиссері Жак Одиардың «Эмилия Перес» атты криминалдық комедиясы көш бастап тұр. Фильм бірден 13 номинацияға ұсынылған.

    Сонымен қатар «Бруталист», «Анора» және «Дюна 2» секілді көрнекті картиналар мен Деми Мур, Киран Калкин және Тимоти Шаламе секілді атақты актерлер де кино саласындағы ең беделді сыйлық үшін таласады.

    «Үздік фильм» номинациясы бойынша ұсынылған фильмдер:

    • «Анора» (реж. Шон Бейкер)
    • «Бруталист» (реж. Брэйди Корбет)
    • «Эмилия Перес» (реж. Жак Одиар)
    • «Конклав» (реж. Эдвард Бергер)
    • «Никому не известный» (реж. Джеймс Мэнголд)
    • «Дюна: Екінші бөлім» (реж. Дени Вильнев)
    • «Мен әлі осындамын» (реж. Вальтер Саллес)
    • «Субстанция» (реж. Корали Фаржа)
    • «Зұлым: Батыс ведьмасының хикаясы» (реж. Джон Чу)
    • «Никель ұлдары» (реж. РаМелл Росс).

    «Үздік режиссер» номинациясының үміткерлері:

    • Шон Бейкер («Анора»)
    • Брэйди Корбет («Бруталист»)
    • Корали Фаржа («Субстанция»)
    • Жак Одиар («Эмилия Перес»)
    • Джеймс Мэнголд («Никому не известный»).

    «Үздік әйел рөлі» номинациясы бойынша:

    • Деми Мур («Субстанция»)
    • Майки Мэдисон («Анора»)
    • Карла София Гаскон («Эмилия Перес»)
    • Синтия Эриво («Зұлым: Батыс ведьмасының хикаясы»)
    • Фернанда Торрес («Мен әлі осындамын»).

    «Үздік ер рөлі» номинациясының үміткерлері:

    • Эдриен Броуди («Бруталист»)
    • Рэйф Файнс («Конклав»)
    • Тимоти Шаламе («Никому не известный»)
    • Колман Доминго («Синг-Синг»)
    • Себастьян Стэн («Оқушы: Трамптың көтерілуі»).

    «Үздік анимациялық фильм» номинациясы бойынша:

    • «Поток» (Латвия)
    • «Дикий робот»
    • «Ойжұмбақ 2»
    • «Уоллес және Громит: Құстар кегі»
    • «Улитканың мемуарлары».

    Айта кетейік, үміткерлер ертерек жариялануы керек еді, бірақ Лос-Анджелестегі орман өртіне байланысты кейінге қалдырылған еді.

  • Әсет Масабаев Алматы әкімінің орынбасары болып тағайындалды

    Әсет Масабаев Алматы әкімінің орынбасары болып тағайындалды

    Алматы облысы әкімінің өкімімен Әсет Дүйсебекұлы Масабаев 2025 жылғы 23 қаңтарынан бастап Алматы облысы әкімінің орынбасары лауазымына тағайындалды.

    Әсет Дүйсебекұлы 1985 жылы туылған, білімі жоғары, 2008 жылы Алматы энергетика және байланыс институтын «Электрэнергетикалық жүйелер және тораптар» мамандығы бойынша, 2014 жылы Экономика және құқық академиясын «Қаржы» мамандығы, Ресей халықтар достығы университетін «Құқықтану» мамандығы бойынша бітірген.

    Еңбек жолын 2007 жылы «Алматы электр станциялары» АҚ-ның электромонтеры болып бастаған.
    Әр жылдары «Наз» ЖШС-ның бас энергетигі, «Алмаз және КЮС» ЖШС техникалық директоры, Алматы қаласы энергетика және коммуналдық шаруашылық басқармасының жетекші маманы, бөлім басшысы, Алматы қаласы Жетісу және Медеу ауданы әкімдерінің орынбасары, Алматы қаласы әкімі аппаратының бас инспекторы, Алматы қаласы табиғи ресурстар және табиғат пайдалануды реттеу басқармасының басшысы, Алматы қаласы энергия тиімділігі және инфрақұрылымдық даму басқармасы басшысының орынбасары, басқарма басшысы, Алматы қаласы Медеу ауданының әкімі, Жетісу облысы Талдықорған қаласының әкімі лауазымдарында қызмет атқарған.

    2024 жылғы 16 тамызынан бастап бүгінгі күнге дейін «ULKEN GROUP LTD» жеке компаниясының басқарушы директоры лауазымында қызмет етті.

  • Ауа райы: -38 градусқа дейін аяз болады

    Ауа райы: -38 градусқа дейін аяз болады

    «Қазгидромет» синоптиктері 24 қаңтарда Қазақстанның барлық аймағында ауа райына байланысты ескерту жариялады. 

    Ақмола облысының солтүстігінде оңтүстік-батыстан жел соғады, екпіні 15-20 м/с. Көкшетауда оңтүстік-батыстан жел соғады, күндіз екпіні 15-20 м/с.

    Абай облысының солтүстігінде аздаған қар, жаяу бұрқасын күтіледі. Жел батыстан, солтүстік-батыстан соғады, түнде облыстың солтүстігінде, шығысында 15-20 м/с.

    Алматы облысының солтүстігінде, таулы аудандарында 31 градус аяз болады. Облыстың солтүстігінде, оңтүстігінде, таулы аудандарында кей уақытта тұман болады.

    Алматыда кей уақытта тұман түседі. Қонаевта 24 қаңтарда кей уақытта тұман түседі.

    Ұлытау облысының солтүстігінде, шығысында кей уақыттарда тұман түседі. Шығыстан, оңтүстік-шығыстан жел соғады, күндіз облыстың солтүстігінде екпіні 15-20 м/с.

    Қарағанды облысының солтүстігінде, шығысында кей уақыттарда тұман түсуі мүмкін. Түнде облыстың басым бөлігінде 35-38 градус қатты аяз.

    Жетісу облысының солтүстігінде, таулы аудандарында қатты аяз, ауа температурасы 30-33 градусқа дейін төмендейді. Өңірдің шығысында, таулы аудандарында аздаған қар күтіледі. Облыстың шығысында, таулы аудандарында жаяу бұрқасын, тұман. Солтүстік-шығыстан жел соғады, облыстың солтүстігінде, шығысында екпіні 15-20, кей уақыттарда 25 м/с. Түнде қатты аяз 25-29 градус. Талдықорғанда түнде қатты аяз 27-29 градусқа дейін төмендеуі мүмкін.

    Батыс Қазақстан облысының батысында аздаған қар, жаяу бұрқасын күтіледі. Түнде және таңертең облыстың солтүстігінде, шығысында тұман күтіледі. Жел шығыстан, оңтүстік-шығыстан соғады, күндіз облыстың батысында, оңтүстігінде, шығысында екпіні 15-20 м/с. Оралда түнде және таңертең тұман күтіледі.

    Атырау облысында оңтүстік-шығыстан жел соғады, екпіні 15-20 м/с. Атырауда оңтүстік-шығыстан жел соғады, екпіні 15-20 м/с.

    Шығыс Қазақстан облысының солтүстігінде, шығысында қар, бұрқасын күтіледі. Жел батыстан, солтүстік-батыстан соғады, түнде облыстың солтүстігінде, шығысында 15-20 м/с.

    Солтүстік Қазақстан облысының солтүстігінде аздаған қар, жаяу бұрқасын күтіледі. Оңтүстік-батыстан жел соғады, түнде облыстың батысында, солтүстігінде, оңтүстігінде екпіні 15-20 м/с, күндіз күші 15-20, облыстың батысында, солтүстігінде, оңтүстігінде екпіні 25 м/с. Петропавлда күндіз аздаған қар, жаяу бұрқасын күтіледі. Оңтүстік-батыстан жел соғады күші 15-20, күндіз екпіні 23 м/с.

    Ақтөбе облысында оңтүстік-шығыстан жел соғады, облыстың батысында, орталығында екпіні 15-20 м/с.

    Қызылорда облысында жел шығыстан соғады, таңертең және күндіз облыстың орталығында екпіні 15-20 м с.

    Маңғыстау облысында оңтүстік-шығыстан жел соғады, облыстың батысында, солтүстігінде, орталығында екпіні 15-20, түнде кей уақыттарда 23 м/с күтіледі. Ақтауда оңтүстік-шығыстан жел соғады, түнде және таңертең екпіні 15-20 м/с.

    Түркістан облысының солтүстігінде, таулы аудандарында жаяу бұрқасын, оңтүстігінде тұман түседі. Шығыстан жел соғады, облыстың солтүстігінде, таулы аудандарында күші 15-20 м/с.

    Жамбыл облысының таулы аудандарында аздаған қар, жаяу бұрқасын күтіледі. Облыстың оңтүстігінде, таулы аудандарында тұман күтіледі. Солтүстік-шығыстан жел соғады, облыстың оңтүстік-батысында, солтүстік-шығысында, таулы аудандарында 15-20 м/с. Таразда кей уақыттарда тұман күтіледі.

    Қостанай облысының оңтүстігінде, шығысында тұман күтіледі. Оңтүстік-батыстан жел соғады, күндіз облыстың солтүстігінде 15-20 м/с.