Sona.kz

Метка: Басты оқиғалар

  • Орал тұрғыны пәтеріне 95 адамды тіркеген

    Орал тұрғыны пәтеріне 95 адамды тіркеген

    Орал қаласының тұрғыны өз пәтеріне 95 адамды тіркеген,  деп хабарлайды Polisia.kz.

    Батыс Қазақстан облысында көші-қон полициясының қызметкерлері азаматтарды тіркеу саласында заң бұзушылықтарды анықтады. Орал қаласындағы пәтерлердің бірінде пәтерде нақты тұрмайтын 95 адам тіркелгені белгілі болды. Пәтер иесіне қатысты әкімшілік шаралар қабылданды.

    «Естеріңізге сала кетейік, Қазақстан Республикасы әкімшілік құқық бұзушылық туралы кодексінің 493-бабына сәйкес тұрғын үй-жайлардың иелері азаматтарды заңсыз тіркеген әрбір жағдай үшін жауапқа тартылуы мүмкін.  Келесі тармақтарға ерекше назар аудару керек:  – Бір жыл ішінде қайталап бұзу жауапкершілікті күшейтуге әкеп соғады (ҚР ӘҚБтК 493-бабының 2-бөлігі).  – Нақты тұрмайтын адамдарды тіркеуден шығару жөнінде шаралар қолданбау (ҚР ӘҚБтК 493-бабының 4-бөлігі).  Бұдан басқа, жеке басын куәландыратын құжаттарсыз немесе тіркеусіз тұратын адамдар ҚР ӘҚБтК-нің 492-бабы бойынша жауапкершілікке тартылады», – делінген облыстық Полиция басқармасы таратқан ақпаратта.

    Бір жыл ішінде қайталанған бұзушылықтар үшін қатаң санкциялар қарастырылған.  Азаматтарды тіркеу саласындағы заңнаманы сақтау – бұл заңдылық мәселесі ғана емес, сонымен қатар қоғамдағы қауіпсіздік пен құқықтық тәртіпті қамтамасыз етудің маңызды шарты.

  • Саран қаласында қарақшы сатушы әйелді пышақтап өлтірген

    Саран қаласында қарақшы сатушы әйелді пышақтап өлтірген

    Қарағанды облысының Саран қаласында сатушы әйел қарақшының қолынан қаза тапты. Әлеуметтік желіде қылмыс болған сәттің видеосы тарады.

    Дереккөзге сүйенсек, дүкенді тонамақ болған ер адам 27 жастағы сатушы әйелге тап берген. Сатушы қарақшыға қарсылық танытып, оны дүкеннен қуып шықпақ болған. Алайда, камуфляж киіп, бетін бүркелеген ер адам оны бірнеше рет пышақтап, артынша кассадан ақша алып, ізін жасырған.

    Қарағанды облысының полиция департаменті хабарлағандай, күдікті әлі қолға түспеген.

    «Күдікті адамды анықтап, оны ұстау үшін облыстың жеке құрамы түгел бағытталды. Полиция департаменті қызметкерлерінің арасынан жедел-тергеу тобы құрылды. Жедел-іздестіру іс-шаралары өтіп жатыр Оқиғаның мән-жайы анықталып жатыр», – деп хабарлады Қарағанды облысы полиция департаментінің баспасөз қызметі.

     

     

    Посмотреть эту публикацию в Instagram

     

    Публикация от SONA.KZ — НОВОСТИ КАЗАХСТАНА (@sonanews.kz)

  • Жамбыл облысында 18 ауылда жарық сөніп, мыңнан аса көлік жолда қалды

    Жамбыл облысында 18 ауылда жарық сөніп, мыңнан аса көлік жолда қалды

    Жамбыл облысының әкімі Ербол Қарашөкеев ауа райының қолайсыз болуына байланысты тұрғындарға үндеу жасады, деп хабарлайды Jambylinfo.kz.

    «Жабық аумақтарда 627 жүк және 573 жеңіл автомобиль, сондай-ақ, 15 жолаушылар автобусы (200 адам, оның ішінде 10 бала) жиналған.  Жолда қалған жүргізушілер мен жолаушыларға барлық қажетті көмек көрсетілуде. Олар ыстық тамақ пен сусынмен қамтамасыз етілуде. Бұл шараларға барлығы 71 қызметкер мен 45 бірлік техника жұмылдырылды. Шақпақ ата, Б.Момышұлы, Нұрлыкент, Айша бибі ауылдарында 6 жылыту пункті ашылды. Оларға орналасуға ешқандай өтініш түспеді. Сағат 12: 00-де Жамбыл ауданы Айша бибі ауылынан 10 автобуспен жолаушыларды Тараз қаласының темір жол вокзалына жеткізу ұйымдастырылды. Қиын жағдайға тап болған 377 жолаушы жедел түрде темір жол қатынасымен тиісті бағыттарға жөнелтілді», – деп жазды әкім.

    Жуалы ауданында бүгін қатты желдің салдарынан 18 елді мекенде электр желісінде апат болып, жарық сөндірілген. Қалпына келтіру жұмыстарына «ЖЭС» ЖШС  тарапынан тиісті мамандар жұмылдырылуда.

  • Алматыда көше қары тоқтаусыз күреледі

    Алматыда көше қары тоқтаусыз күреледі

    Алматы әкімінің орынбасары Бейбіт Шахановтың айтуынша, қаланың коммуналдық қызметі көшелерді, жолдар мен тротуарларды жедел қардан арылтуға кірісті. Қар күреу жұмыстары тәулік бойы жүргізіледі.

    «Бүгін сағат 9:00-де қалада және таулы аудандарда қар жауа бастады. Екі күн бойы қар жауып, 20 мм қар түседі деп болжанып отыр. Бұл едәуір мөлшер, сондықтан бұл ауқымды жұмыс. Таңертеңнен бастап коммуналдық қызмет көшелеге көктайғаққа қарсы арнайы қоспалар сеуіп, қозғалыс қауіпсіздігін қамтамасыз етті. Негізгі жұмыс қар күрелген соң басталады. Біз магистралды және орталық көшелерде қар үйінді жасалған соң қарды шығаруға кірісеміз, – деді Алматы әкімінің орынбасары.

    Қазгидрометтің мәліметінше, 23-24 қаңтарда Алматыда ауа температурасы -15…-20 градусқа дейін төмендейді. Қазіргі уақытта жолдар көктайғаққа қарсы материалдар себіліп жатыр. 152 құмсепкіш техника жұмылдырылған. 950 тонна көктайғаққа қарсы материалдар және 60 м³ сұйық реагенттер пайдаланылған. Қауіпті жол учаскелерінде жолдың жағдайын бақылап отыратын 46 жедел топ жұмыс істеуде.

    Магистралды көшелерді қардан толық тазалау 3 күнге, аудандық маңызы бар көшелерді тазалау 7 күнге созылады.

    «Қазіргі уақытта жолдарда 600-ден астам арнайы техника жұмыс істеп жатыр, күндізгі уақытта шамамен 1,5 мың адам жұмылдырылды. Жұмыс түнде де жалғасады, қар толық шығарылғанға дейін тоқтатылмайды. Тазалықты бақылау үшін аудан әкімдіктерінде тәулік бойы кезекшілік ұйымдастырылды», – деді Бейбіт Шаханов.

    «Қардың жаууы қала тұрғындарына уақытша қолайсыздық тудыратынын түсінеміз. Коммуналдық қызметтің жұмысына түсіністікпен қарап, көмектесуді сұраймыз: арнайы техниканың жұмысын қиындатпау үшін көліктерді жол жиектеріне қоймауларыңызды өтінеміз», – деді әкімнің орынбасары.

    Мәселелерді жедел шешу үшін тұрғындар Telegram-боттарға келесі сілтемелер арқылы аудан әкімдіктеріне жүгіне алады:
    1. Әуезов ауданы — https://t.me/akimatAuezov1
    2. Алатау ауданы — https://t.me/akimat_alatau
    3. Алмалы ауданы — https://t.me/almalyaudany/1
    4. Бостандық ауданы — https://t.me/bostandykaudanyy/1717
    5. Жетісу ауданы — https://t.me/obzhetysu
    6. Медеу ауданы — https://t.me/medeu_audany
    7. Наурызбай ауданы — https://t.me/+jD3nmPVIVrw1YWQ6
    8. Түрксіб ауданы — https://t.me/turksib_audany

    23 қаңтарға арналған болжам: кейде қар жауады, түнде температура -13…-15°C, күндіз -7…-9°C.
    24 қаңтарға арналған болжам: көшпелі бұлт шығады, жауын-шашынсыз. Түнде -18…-20°C, күндіз -10…-12°C.

  • Тоқаевтың төрағалығымен Үкіметтің кеңейтілген отырысы өтеді

    Тоқаевтың төрағалығымен Үкіметтің кеңейтілген отырысы өтеді

    Ақорда атап өткендей, жиында еліміздің 2024 жылға арналған әлеуметтік-экономикалық дамуының қорытындысы шығарылып, алдағы кезеңге арналған міндеттер тұжырымдалады. 

    Премьер-министр Олжас Бектенов, Ұлттық банк басшысы Тимур Сүлейменов және облыс әкімдері есеп береді.

    Бұл 28 қаңтар сейсенбі күні болады,  бір аптадан аз уақыт қалды. Еске салайық, өткен жылғы кеңейтілген отырыс алдында Тоқаев үкіметті отставкаға жіберген болатын.

  • Қырғызстанның астанасын көшіру ұсынылды

    Қырғызстанның астанасын көшіру ұсынылды

       «Мен астанамызды басқа жерге көшіруді ұсынамын. Бұл мәселені қарастыру керек. Ыстықкөл облысында Асман қаласы салынып, оған 10 миллиард сом инвестиция тартылып жатыр. Темір жолды елорданың сыртына жылжыту үшін 550 миллион доллар, ал айналма жол салу үшін 1 миллиард доллардан астам қаражат қажет. Егер астананы көшіріп, министрлер кабинетін қала сыртына көшірсе, кептеліс мәселесі шешіледі», – деді депутат Бақытбек Марипов.

    Бұған дейін Бішкектегі кептеліс мәселесін шешу үшін депутат Эльмурза Сатыбалдиев елорда әкімдігіне оң рульді көліктерге кіруге тыйым салуды ұсынған болатын. Сондай-ақ, ел парламенті  Бішкектегі шығарындыларды азайту үшін Қазақстаннан көмір сатып алуды да қарастырып жатыр.

     

  • Былтыр жемқорлардан 220 млрд теңгенің дүние-мүлкі қайтарылды

    Былтыр жемқорлардан 220 млрд теңгенің дүние-мүлкі қайтарылды

    2024 жылы Қазақстанға қайтарылған активтердің жалпы сомасы 220 млрд теңгені құрады. Бұл туралы қаржы вице-министрі Ержан Біржанов мәлімдеді.

    Вице-министрдің айтуынша, бұл қаражат инфрақұрылымдық жобаларға бағытталған.

    «Комиссия оларды қарап, білім беру мен әлеуметтік нысандарды дамыту үшін аймақтарға жібереді. Қайтарылған активтерді пайдалана отырып, біз 2 жобаны іске асырдық, комиссия тағы 18 жобаны іске асыру туралы шешім қабылдап жатыр», – деп түсіндірді қаржы вице-министрі.

    Еске салайық, қазірдің өзінде Үкімет арнайы мемлекеттік қордан әлеуметтік маңызы бар нысандардың құрылысына 50,6 млрд теңгеге жуық қаражат бөлді. Олардың қатарында төрт мектеп, оның ішінде бір музыка мектебі, спорт кешені, көпсалалы аурухана кешені, жатақхана, екі балабақша бар.

    «Заңсыз алынған мүлікті мемлекет меншігіне қайтару туралы» заңның субъектілері есебінен Арқалық, Астана, Алматы қалаларында да бірқатар әлеуметтік инфрақұрылым нысаны салынып жатыр.

  • Петропавлда жыл басынан бері 10 адамды үсік шалды

    Петропавлда жыл басынан бері 10 адамды үсік шалды

    Емдеу мекемесі баспасөз қызметінің мәліметінше, қаралғандардың жартысы көшеде жарақаттанған. Мәселен өткен демалыс күндері 60 адам дәрігер көмегіне жүгінді. Әр екінші адам көшеде жарақат алған, оның ішінде құлап аяқ-қолын сындырғандар да, сіңірін созып алғандар да бар. 29 адам тұрмыстық, бір адам спорттық жарақат және бір адам күйік алды. Ит қапқан бір тұрғынға да дәрігер көмегі көрсетілді.

    Травматология бөлімі 80 науқасқа шақталса, қазір мұнда 50 адам ем алып жатыр.

    – Петропавлда тұрамын. Абайсызда екі аяғымды үсітіп, ауруханаға түстім. Қазір қажетті ем-домды алып жатырмын, – дейді Оразбай Айтмұхамбетов.

    Қаңтар айы жылы болып, қатты аяз болмаса да жыл басынан бері 10 адамды үсік шалған. Осы аралықта 136 адам стационарлық ем алды.

  • Астанада қарды күреуге 1900-ден астам арнайы техника жұмылдырылды

    Астанада қарды күреуге 1900-ден астам арнайы техника жұмылдырылды

    Коммуналдық қызметтер ауа райының қолайсыздығына және боранға қарамастан тәулік бойы күшейтілген режимде жұмыс істеп жатыр.

    22 қаңтарға қараған түні коммуналдық қызметтер елордадан 4 508 жүк көлігі қар шығарды, Бұл – 54 мың текше метрден астам қар. 22 қаңтар күні таңертең қар тазалау жұмысына 2600-ден астам жол жұмысшы мен 1900-ден астам арнайы техника жұмылдырылды.

    Қыс мезгілінің басынан бастап полигондарға қаладан 290 936 рейс арқылы 3,6 млн текше метрден астам қар шығарылды. Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады.

    Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

    Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.

    Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.

    Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.

    Төтенше жағдай туындаған кезде «112» нөміріне хабарласыңыз.

  • Салық қарызы бар қазақстандықтардың шоты бұғатталмауы мүмкін

    Салық қарызы бар қазақстандықтардың шоты бұғатталмауы мүмкін

    Салық бойынша 20 айлық есептік көрсеткіштен аспайтын қарызы бар азаматтардың шоттары бұғатталмауы мүмкін. Қаржы министрлігі жаңа Салық кодексі аясында осындай өзгеріс ұсынып отыр.

    Қаржы вице-министрі Ержан Біржановтың айтуынша, жаңа Салық кодексі аясында берешек сомасына сараланған әдіс қолданылады.

    «Біріншіден, егер қарыз мөлшері 20 АЕК-тен (биыл 78 640 теңге) аспаса, біз борышкерге жай ғана хабарлама жібереміз. Үш градация жасап қойдық. Берешек сомасы өскен сайын шоттарды бұғаттау шарасы да көбірек қолданылады. Сосын бізде салықтан басқа әлеуметтік аударымдар, зейнетақы, медициналық аударымдар бар. Олар бойынша да 1 немесе 10 теңге қарыз болса, шотты бұғаттап тастайды. Біз осы мәселені депутаттармен пысықтадық. Шотты бұғаттау шегі ұлғаю жағына қарай қайта қаралады. Яғни 1000 теңге үшін ешкім шотты бұғаттамайды. Бұл жаңа Салық кодексінің жобасына енгізілген», – деп түсіндірді ол Мәжіліс кулуарында.

    Біржановтың айтуынша, қарыз үшін шотты бұғаттау Қаржы министрлігіне де тиімсіз.

    «Азғантай ғана қарыз үшін шотты бұғаттап тастау бізге де ұнамайды. Бірақ біз салық бойынша ғана емес, әлеуметтік аударымдар бойынша да бақылау жасауға міндеттіміз», – деді вице-министр.