Sona.kz

Метка: Басты жаңалықтар

  • Ақтауда 15 жастағы жасөспірім электромобильмен серуен кезінде ауыр жарақат алды

    Ақтауда 15 жастағы жасөспірім электромобильмен серуен кезінде ауыр жарақат алды

    Ақтауда 15 жастағы жасөспірім саябақта электромобильмен жүрген кезде жарақат алды, деп хабарлайды Sona.kz Halyqstan-ға сілтеме жасап.

    Оқиға 26 қазанда «Ақбота» саябағында болған. Алдын ала мәлімет бойынша, серуен кезінде электромобиль аударылып, жасөспірім ауыр конструкцияның астында қалған.

    Дәрігерлер оның жамбас сүйегі сынғанын, сүйек сынықтары мен ығысу барын анықтады. Ота жасалып, қазір науқас оңалтудан өтуде. Дәрігерлердің айтуынша, жарақаттың ауырлығына байланысты аяқтың деформациясы немесе қысқаруы мүмкін, бұл мүгедектікке әкелуі ықтимал.

    Жәбірленушінің әкесі Сергей Балабаев полицияға шағым түсіріп, кәсіпкерлердің электромобильдерді балаларға ата-анасының қатысуынсыз беретінін мәлімдеді.
    Полиция бұл фактіні растады және қала әкімдігіне көлік иесін тексеріп, шара қолдану туралы хат жолдады.

    Саябақ әкімшілігі мен электромобиль иесі отбасыға көмек көрсетуге дайын екенін айтты. Алайда егер қызмет көрсету ережелерін бұзу фактісі дәлелденсе, кәсіпкерге әкімшілік жауапкершілік қарастырылуы мүмкін.

    ? Қазір оқиғаның мән-жайы анықталып жатыр.

  • Instagram Қазақстанның сұлулығын бүкіл әлемге көрсетті

    Instagram Қазақстанның сұлулығын бүкіл әлемге көрсетті

    Instagram-ның ресми аккаунты «Қазақстанның даласында ойнап жүрміз» деген жазумен бейнеролик жариялады.

    Бейне авторы – қазақстандық видеограф Дастан Мұхамедрахим. Кадрларда – кең дала, жасыл алқаптар мен тау көріністері кинематографиялық стильде түсірілген. https://www.instagram.com/reel/DQm3tP1kZgW/?igsh=MTFjNjgxbzNqOXFyaw==

    Роликті 36,5 миллионнан астам адам көріп, 37,8 мыңнан аса пікір қалдырған.
    Айта кетейік, Instagram-ның ресми парақшасында 696 миллионнан астам жазылушы бар, сондықтан бұл видео Қазақстан табиғатының ғажайып жарнамасына айналды.

  • ҚФФ «Оқжетпесті» қытайлық компания сатып алады деген қауесетке жауап берді

    ҚФФ «Оқжетпесті» қытайлық компания сатып алады деген қауесетке жауап берді

    Әлеуметтік желілерде Қытай компаниясы клубты сатып алуға ниетті деген ақпарат тараған болатын, Sona.kz NUR.KZ-ке сілтеме жасап хабарлайды

    «Әзірге күтейік. Келіссөздер жүргізіледі деп білемін. Олардың нәтижесін кейін көреміз. Егер шетелдік инвестор капитал салуға дайын болса, бұл өте қызықты тәжірибе болмақ», — деді Давид Лория.

    Оның айтуынша, шетелдік инвестиция тарту — әлемдік тәжірибе.

    «Мысалы, Англия премьер-лигасындағы көптеген клубтар америкалық, қытайлық және тай инвесторларға тиесілі. Бұл — қалыпты жағдай. Егер мұндай тәжірибе біздің футболды дамытуға мүмкіндік берсе, неге пайдаланбасқа?» — деп түйіндеді ол.

    Бұған дейін Қазақстан президенті Қасым-Жомарт Тоқаев кәсіпкерлерді клубтық футболды бизнес ретінде қарастыруға шақырған еді. Биыл бәсекелестік ортаға берілетін нысандар тізіміне елдегі жеті футбол клубы енгізілген.

  • Парижде Swarovski зергерлік бутигі тоналды

    Парижде Swarovski зергерлік бутигі тоналды

    Парижде кезекті ірі ұрлық тіркелді — Лувр музейінен король әшекейлерінің жоғалғанынан кейін екі апта өтпей жатып, белгісіз адамдар Swarovski зергерлік бутигін тонап кетті, деп хабарлайды Sona.kz Kazinform агенттігіне сілтеме жасап.

    Le Parisien басылымының мәліметінше, қылмыскерлер шамамен 200 мың еуро тұратын зергерлік бұйымдар мен сағаттарды ұрлап кеткен.

    Дүкендегі дабыл жүйесі іске қосылмаған, ал бейнебақылау камералары қылмыскерлерді тіркемеген. Оқиға тек келесі күні таңертең, қызметкер жұмысқа келген кезде белгілі болған.

    «Кіреберіс есік бұзылған, касса мен әйнек сөрелер қираған», — деп жазады басылым.

    Париж прокуратурасы ұрлық фактісін растады.

    «Алдын ала деректер бойынша, дүкен есігінің құлпы бұзылған. Залал шамамен 200 мың еуро деп бағаланып отыр. Тергеу жалғасуда», — деп мәлім етті құзырлы орган.

    Бұл — соңғы апталардағы Париждегі зергерлік дүкендерге жасалған екінші ірі қылмыс. Бұған дейін Лувр музейінен король әшекейлері ұрланған болатын.

  • Қарағандыда 100 млн теңгелік қаржы пирамидасы анықталды

    Қарағандыда 100 млн теңгелік қаржы пирамидасы анықталды

    Қарағанды облысы бойынша Қаржы мониторингі агенттігінің департаменті «Үміт Самғау» атты қаржы пирамидасын құру және басқару фактісі бойынша сотқа дейінгі тергеу жүргізіп жатыр, деп хабарлайды Sona.kz Қаржы мониторингі агенттігіне сілтеме жасап.

    Тергеу деректеріне сәйкес, аталған компания өз қызметін қайырымдылық қоры ретінде көрсетіп, жалғызбасты аналарға, көпбалалы және аз қамтылған отбасыларға көмек көрсетуді мақсат еткенін мәлімдеген. Алайда іс жүзінде жоба қаржы пирамидасы болып шыққан.

    Азаматтарға 300%-дан 800%-ға дейін пайда түсіретін түрлі «салым» түрлері ұсынылған. Шарт бойынша, салым көлемі неғұрлым жоғары болса, кіріс те соғұрлым көп болады делінген.

    Тергеу барысында төлемдердің нақты экономикалық қызмет есебінен емес, жаңа қатысушылардың қаражаты есебінен жүзеге асқаны анықталды.

    Ұйымдастырушылар жүйені кеңейту үшін туыстары мен таныстарын «дроппер» ретінде тартқан. Олардың банктік есепшоттары арқылы қатысушылардың ақшасы қабылданып, әрі қарай үлестірілген.

    Нәтижесінде 400-ден астам азамат зардап шегіп, жалпы келтірілген залал 100 млн теңгеден асты.

    Соттың санкциясымен күдіктінің пәтері мен автокөлігіне тыйым салынды.

    Қазір тергеу амалдары жалғасуда.
    Қаржы мониторингі агенттігі азаматтарды күмәнді инвестициялық жобаларға және жоғары табыс уәде ететін платформаларға сенбеуге шақырады.

    «Кез келген жобада заңдылық пен лицензияның бар-жоғын тексеру маңызды. Қаржы пирамидасын ұйымдастыру – қылмыс, ал оған қатысу қаржылық шығын мен заң алдында жауапкершілікке әкеледі», – деп ескертті құзырлы мекеме.

  • Арқалықтағы жаппай улану себебі анықталды — сальмонелла қызметкерлерден табылды

    Арқалықтағы жаппай улану себебі анықталды — сальмонелла қызметкерлерден табылды

    Арқалықта 86 адам жаппай уланған оқиға бойынша эпидемиологиялық зерттеу аяқталды, деп хабарлайды Sona.kz Kazinform-ға сілтеме жасап.

    20–23 қазан аралығында Арқалық, Жангелдин және Қостанай қалаларындағы жұқпалы аурулар бөлімшелеріне 86 адам ішек инфекциясы белгілерімен жүгінген. Олардың басым бөлігі жергілікті мейрамханада өткен отбасылық шараға қатысқан немесе сол жерден әкелінген тағамды тұтынған.

    «Барлығы 83 адам ауруханаға жатқызылды, 82-сі сауығып шықты. Бір науқас дәрігерлер бақылауында. Лабораториялық зерттеу нәтижесінде Salmonella enteritidis бактериясы анықталды», — деді департамент мамандары.

    Тексеру барысында мекемеде санитарлық нормалардың өрескел бұзылғаны анықталып, нысанның қызметі уақытша тоқтатылды. Зерттеу кезінде алынған 40 сынаманың жетеуінен ішек таяқшасы табылған.

    Сонымен қатар, қызметкерлердің екеуінен де Salmonella enteritidis бактериясы анықталып, олардың инфекция тасымалдаушысы болуы мүмкін екені айтылды.

    Қазір кафе жабық, барлық кемшіліктер жойылған соң ғана қайта ашылуы мүмкін. Материалдар құқық қорғау органдарына берілді. Егер қылмыстық құрам анықталса, іс сотқа жіберіледі, ал болмаған жағдайда иелеріне әкімшілік жауапкершілік қарастырылады.

  • Қарағандыда Алика Мұхамадиеваға 3,5 жылға бас бостандығынан айыру жазасы тағайындалды

    Қарағандыда Алика Мұхамадиеваға 3,5 жылға бас бостандығынан айыру жазасы тағайындалды

    Қарағандылық 23 жастағы Алика Мұхамадиева ұлтаралық араздықты қоздырғаны үшін кінәлі деп танылып, 3,5 жылға сотталды.

    Бұл іс қоғамда үлкен резонанс тудырған болатын. Жаздың ортасында Мұхамадиеваның Threads желісіндегі пікірлері әлеуметтік желілерде қызу талқыланды. Ол кей жазбаларында Қазақстан мен мұсылмандарға қатысты орынсыз пікір білдірген. Кейін көпшіліктен кешірім сұрап, елден кетуге тырысқан, бірақ ұсталып, шамамен төрт ай тергеу изоляторында болды.

    Қазан айында ҚК 174-бабы 1-бөлігі (“Әлеуметтік, ұлттық, рулық, нәсілдік немесе діни араздықты қоздыру”) бойынша сот процесі басталды. Прокуратура 4,5 жыл сұраған болатын.

    Бүгін өткен соңғы отырыста Мұхамадиева тағы да кешірім сұрап, өкінетінін айтты:
    «Барлығына шын өкінемін. Ең қиыны — қызымнан алыстап қалу. Қазір бәрінен бұрын сонымен бірге болғым келеді», — деді ол көзіне жас алып.

    Сот үкімі бойынша, оған 3,5 жыл бас бостандығынан айыру жазасы тағайындалды, бірақ жаза екі жылға кейінге қалдырылды.

  • OpenAI ChatGPT қызметін шектейді: медицина және қаржы жөнінде кеңес беруге тыйым салынды

    OpenAI ChatGPT қызметін шектейді: медицина және қаржы жөнінде кеңес беруге тыйым салынды

    OpenAI компаниясы өнімдерін пайдалану саясатын жаңартты. Енді ChatGPT медицина, құқық, қаржы және басқа да мамандандырылған тақырыптар бойынша кеңес бермейді, деп хабарлайды Sona.kz Kazinform-ға сілтеме жасап.
    Шектеуге білім беру, жұмысқа орналасу, несие және сақтандыру, көші-қон және мемлекеттік қызметтерге қатысты бағыттар да енгізілді.
    Сонымен қатар енді:
    •адамның келісімінсіз оның бейнесін немесе дауысын жасауға болмайды;
    •қылмысқа бейімділікті болжау тыйым салынған;
    •сервисті қорқыту, жала жабу, зорлық-зомбылық пен терроризмді насихаттау, сондай-ақ өз-өзіне қол жұмсауға итермелеу мақсатында қолдануға болмайды;
    •жасөспірімдерге арналған шектеулі контентті таратуға болмайды;
    •ақша тігілетін құмар ойындар ұйымдастыруға тыйым салынады.
    OpenAI бұл өзгерістердің барлығы қауіпсіз әрі жауапты пайдалану мақсатында енгізілгенін атап өтті.
  • Тұрсынбек Қабатов дауы: әзілкеш бұрынғы жұбайының мәлімдемесіне жауап берді

    Тұрсынбек Қабатов дауы: әзілкеш бұрынғы жұбайының мәлімдемесіне жауап берді

    Белгілі шоумен Тұрсынбек Қабатов пен оның бұрынғы жұбайы Мөлдір арасындағы дау әлеуметтік желілерде қызу талқыланып жатыр, деп хабарлайды Sona.kz.

    Журналист Жанар Байсемізге берген сұхбатында Мөлдір ауыр ажырасу мен опасыздық туралы алғаш рет ашық айтты. Продюсердің айтуынша, бұл оқиға 14 жылға созылған, ал балалар әкесінен алыстауды ауыр қабылдап жүр. Ол сондай-ақ Қабатовтың өзін және балаларын бұғаттағанын мәлімдеді.

    Инфлюенсерлер де әйелді қолдап, әлеуметтік желіде пікір қалдырды:

    «Мөлдірдің сұхбаты менің де жанымды ауыртты. Мұндайды тек басынан өткергендер ғана түсінеді».

    Алайда кей желі қолданушылары артистің жеке өмірі мен шығармашылығын шатастырмауға шақырды.

    Өз кезегінде Тұрсынбек Қабатов айыптауларды жоққа шығарды:

    «Мен ешқашан балаларымды бұғаттаған жоқпын. Мен олармен біргемін, оларды жақсы көремін. Бүгінге дейін балаларым үшін еңбектендім және еңбектенемін. Алла бәрімізге саулық берсін!», — деді ол.

  • Алика Мұхамадиева ісі бойынша сот шешімі бүгін шығады

    Алика Мұхамадиева ісі бойынша сот шешімі бүгін шығады

    Қарағандыда әлеуметтік желідегі жазбалары үшін ұлтаралық және діни араздық қоздырды деп айыпталған 22 жастағы кәсіпкер Алика Мұхамадиеваға қатысты сот ісі аяқталуға жақын, деп хабарлайды Sona.kz ZTB -ға сілтеме жасап.

    Бүгін сотта айыпталушы соңғы сөзін айтып, тағы да көпшіліктен кешірім сұрады.
    «Барлығына шын өкінемін. Мен кінәмді толық мойындаймын. Маған сенім артқан адамдардың алдында ұялдым. Ең қиыны — қызымнан алыстап қалу. Қазір бәрінен бұрын сонымен бірге болғым келеді», — деді ол.

    Еске сала кетейік, Мұхамадиева әлеуметтік желіде (Threads) ұлтаралық және діни араздық белгілері бар пікірлер қалдырған еді. Кейін ол жұрттан кешірім сұрағанымен, бұл оны жауапкершіліктен босатпады.

    Прокуратура 4,5 жыл бас бостандығынан айыруды сұрады.
    Сот шешімі бүгін сағат 17:00-де жарияланады.