Sona.kz

Метка: Басты жаңалықтар

  • Құрылыс — тәртіппен: Қонаевтағы рейд нәтижесі

    Құрылыс — тәртіппен: Қонаевтағы рейд нәтижесі

    Қонаев қаласында заңсыз орнатылған құрылыс нысандары мен сауда павильондарына қатысты бірлескен тексеру жүргізілді. Шараға қалалық сәулет, кәсіпкерлік бөлімдері мен прокуратура өкілдері қатысты.

    Рейд барысында рұқсатсыз қойылған нысандар анықталып, иелеріне заңбұзушылықтарды жою туралы ескерту берілді. Сонымен қатар, құрылыс нормаларына сәйкес келмейтін жұмыстар да тіркеліп, құжаттар тиісті органдарға жолданды.

    Мұндай бақылау жұмыстары Қонаевта тұрақты түрде жалғасады. Мақсат — қаланың заңға сай әрі қауіпсіз дамуын қамтамасыз ету.

  • Гүл өсірген аулалар марапатталды

    Гүл өсірген аулалар марапатталды

     

    1-орын иегері — Ольга Попова. Ол бірнеше жылдан бері ауланы сәндік және көпжылдық гүлдермен көмкеріп келеді. «Гүлдер тек әдемілік үшін емес, олар көңіл қуантады. Қала – ортақ үйіміз, оны көркейту – әркімнің міндеті», – дейді зейнеткер.

    2-орынды агроном зейнеткер Абдували Асылбеков алды. «Алғашқы гүлдерді 10 жыл бұрын ектім, қазір көршілермен бірге бәріміз айналысамыз. Келінім еңбегімді байқап, конкурсқа ұсынды», – дейді ол.

    3-орын — Лилия Петрушинаға. Оның ауласын тұрғындар бірігіп көгалдандырған. «Бұл тек менің емес, барлығымыздың еңбегіміз», – дейді олар.

    Конкурс аясында қала аулалары жасыл желекке оранып, тұрғындар табиғатқа жанашырлықпен қарай бастаған.

  • Қонаев — 3 жылда дамудың жаңа белесінде

    Қонаев — 3 жылда дамудың жаңа белесінде

    2050 жылға дейінгі даму жоспары бекітілді
    Қала болашағын айқындайтын бас жоспар қабылданып, Қонаевты заманауи әкімшілік, өндірістік және туристік орталыққа айналдыру көзделді. Жоспарға сәйкес:
    • Қалалық орта ыңғайлы әрі қауіпсіз болмақ;
    • Өндірістік, коммуналдық және демалыс аймақтары дамытылады;
    • Транспорт жүйесі жаңғыртылып, қала логистикалық хабқа айналады;
    • Әлеуметтік нысандар салынады;
    • Туризм мен экотуризм дамиды.

    Құрылыс және инфрақұрылым
    3 жылда 158 мың м² тұрғын үй пайдалануға берілді, 25 үй (1047 пәтер) жеке құрылысшылар есебінен салынды. Қазір 56 көпқабатты үй салынып жатыр. Биыл 3 әлеуметтік үй тапсырылады.

    Су және жылумен жабдықтау
    Соңғы үш жылда 26 км су және кәріз желісі жаңартылды. 2024 жылы 3 микроауданда жаңа жылу желілері іске қосылды. «Жылу орталығында» 4 қазандық жаңартылып жатыр.

    Газдандыру
    Қалада қуаты 20 МВт газ электр станциясы іске қосылды. 6408 нысан газға қосылған (2022 ж. – 3540). Қазір бұл көрсеткіш 42%-ға жетті. Жаңа магистралдар салынып, «Жаңа Іле» массивіне газ тарту жоспарлануда.

    Электрмен қамту
    Жаңа трансформаторлар, 8000 м кабель, 1020 «ақылды шам» орнатылды. «Алтын алма» және №7 дачалық массивтерінде 47 км желі жаңартылып, тұрақты электрмен қамту жолға қойылды.

    Көгалдандыру мен абаттандыру
    134 нысан абаттандырылды: 10 саябақ, 52 аула, 23 спорт алаңы, 49 көпқабатты үйдің қасбеті мен шатыры. Б.Соқпақбаев саябағы, Жамбыл көшесі, 5-жайлау мен жағажай, скейт-парк жаңғыртылды. 1 км жағалау құрылысы аяқталды. 62 га аумақта жаңа жағалау жобалануда.

    Жол және көлік
    106 км инженерлік желі мен жолдар жөнделді. Автобус саны артты: 2023–2024 жж. – 14 жаңа автобус сатып алынды, 2025 ж. – тағы 5 автобус алынады. 50 жаңа аялдама орнатылды. Қалаішілік бағыттар көбейіп, қолжетімділік артты.

    Инвестиция және бюджет
    2021–2024 жж. бюджет кірісі 53%-ға өсіп, 142 млрд теңгеге жетті. 2025 жылға болжам — 161,9 млрд. Соңғы үш жылда 250 млрд теңге инвестиция тартылды. МСБ субъектілері 2,1 трлн теңгенің қызметін көрсетті.

    Білім
    3 жылда 2 жаңа мектеп (900 және 100 орындық) ашылды. 2022–2025 жж. оқушы саны 1000-нан астамға артты. 3 мектепте күрделі жөндеу жүргізілуде. Жаңа білім ошақтары салыну жоспарында.

    Жұмыспен қамту
    2022–2024 жылдары 7130 жұмыс орны құрылды, оның 3298-і тұрақты. 6628 адам «Ұлттық жоба» арқылы қамтылды, 3115 адам жұмысқа орналастырылды.

    Денсаулық сақтау
    Шеңгелді ауылындағы амбулатория жөнделді. Қалада 3 медициналық нысан салынады.

    Әлеуметтік қорғау
    Жаңа 3 орталық ашылды: отбасын қолдау, тұрмыстық зорлық-зомбылық құрбандарына көмек, күндізгі орталық. Кәсіпкерлер есебінен аутизмге шалдыққан балаларға арналған орталық іске қосылды.

    Ауыл шаруашылығы
    Шеңгелдіде суару инфрақұрылымы қалпына келтірілуде. 2025 ж. көктемінде 8150 гектарға егін егілді. 1200 га су үнемдеу технологияларымен қамтылады.

    Туризм
    5-жайлау абаттандырылды, №6 және №7 жағажайлар жаңғыртылады. Капшагай су қоймасының жағалауын кешенді дамыту жобасы әзірленіп жатыр.

    Әлеуметтік тұрғын үй
    3 жылда 193 әлеуметтік аз қамтылған отбасыға пәтер кілті табысталды.

    ⸻

    Қонаев — заманауи қала. Даму жалғасуда.

  • Қонаевта көгалдандыру жұмыстары жалғасуда

    Қонаевта көгалдандыру жұмыстары жалғасуда

    2025 жылы Қонаев қаласында көгалдандыру мен абаттандыру жұмыстары жалғасты. Маусымдық іс-шаралар аясында қала аумағына біржылдық және көпжылдық гүлдер отырғызылды. Негізгі гүлдер қатарында раушан, лаванда, стахис, циния, тагетис, целозия және сурфиния сынды сегіз түрі бар.

    Гүлдермен безендірілген негізгі орындар – «Барыс» айналма жолы, Алматы көшесі, Б.Соқпақбаев атындағы орталық саябақ, Жеңіс саябағы, С.Сейфуллин және Қонаев көшелері. Сондай-ақ Жамбыл мен Абай аллеялары бойындағы барлық гүлзарлар, 4-гимназия маңы, 5 жағажай, орталық мешіт аумағы гүлмен көмкерілді.

    Тік көгалдандыруға ерекше көңіл бөлінді. Қонаев, Жамбыл, Қойшыманов және Алматы көшелері бойына 630 гүлзарлар орнатылды. Бұдан бөлек, қала аумағына 58 мыңнан астам бөріқарақат пен спирея ағаштары отырғызылды.

    Қазіргі уақытта жасыл желектерге күтім жасау – суару, арамшөптерден тазарту және гүл композицияларын жаңарту жұмыстары жүргізілуде.

    Аталған жұмыстар Қонаев қаласының экологиялық жағдайын жақсарту және эстетикалық келбетін арттыру мақсатында жүзеге асырылып отыр.

  • Солтүстік жағалауда сенбілік өтті: 95 қап қоқыс жиналды

    Солтүстік жағалауда сенбілік өтті: 95 қап қоқыс жиналды

    Қонаев қаласында 5 маусым – Дүниежүзілік қоршаған ортаны қорғау күніне орай және «Таза Қазақстан» экологиялық акциясы аясында кезекті сенбілік ұйымдастырылды.

    Бұл жолы тазалық жұмыстары солтүстік жағалауға апаратын жол бойы мен «Күншуақ» жазғы лагері аумағында өтті. Шараға 70-ке жуық қала тұрғыны мен мекеме өкілі қатысып, барлығы 95 қап қоқыс жиналды.

    Жалпы, жыл басынан бері Қонаев қаласында өткен сенбіліктерге 2000-нан астам адам қатысқан. Нәтижесінде 62 тоннадан астам тұрмыстық қалдық жиналып, 16 техника жұмылдырылған.

    Қалалық әкімдік тұрғындарды табиғатты аялауға, қоршаған ортаны таза ұстауға және мұндай игі бастамаларға белсенді атсалысуға шақырады.

  • «Таза аула» конкурсының жеңімпаздары анықталды

    «Таза аула» конкурсының жеңімпаздары анықталды

    Көңілді кеш барысында қала әкімі Асхат Бердіханов «Таза аула» конкурсының жеңімпаздары марапаттады. 3-орынды Қойшыманов көшесі №6 көпқабатты тұрғын үйдің ауласын көгалдандырған Лилия Петрушина иеленді, 2-орын 5-ш/а №56 көпқабатты үйдің тұрғыны Абдували Асылбековке бұйырды, ал 1-орын-Бас жүлдені 3-ш/а №28Б көпқабатты үйінің тұрғыны Ольга Попова жеңіп алды. Қаланың көркіне көрік қосып, табиғат пен ауланың жанашыры атанған азаматтарға 100, 200 және 300 мыңның сертификаттары табыс етілді.

    Бұл «Таза аула» конкурсының алғашқы кезеңі болатын. Ерекше жарыс ары қарай да жалғасын табады. Басталуы жайлы қосымша хабарланады.

    Айта кетейік, «Таза Қазақстан» акциясының басты мақсаты – тазалық мәдениетін қалыптастару. Аталған бағыттағы жұмыстар қала әкімдігімен жүйелі түрде жүргізілуде.

  • Қарағандыда полицейлер 9-қабаттан секірмек болған ер адамды құтқарып қалды

    Қарағандыда полицейлер 9-қабаттан секірмек болған ер адамды құтқарып қалды

    Қарағандыда адам өмірі араша түскен сәт тіркелді. 5 маусым күні Тәттімбет көшесіндегі көпқабатты үйдің 9-қабатында ер адам балконнан секіруге әрекеттенген. Арқанға ілініп тұрған азаматты көрген тұрғындар жедел түрде полиция мен құтқару қызметіне хабар берген.

    Оқиға орнына жеткен тәртіп сақшылары мен құтқарушылар шұғыл шешім қабылдап, әр секундты тиімді пайдалануға тырысқан. Полиция капитаны Адлет Әмірбеков ер адаммен сөйлесіп, оны райынан қайтаруға тырысқан сәтте, құтқарушылар есікті ашып, ер адамды ішке тартып үлгерген.

    Қазіргі таңда 39 жастағы азамат медициналық бақылауға алынды. Дәрігерлер мен психологтар оның бұл әрекетке не себепті барғанын анықтауда.

    Полицейлердің жедел шешімі мен кәсібилігі адам өмірін аман сақтап қалды.

  • ШЖҚ «Жылу орталығы» МКК директоры тағайындалды

    ШЖҚ «Жылу орталығы» МКК директоры тағайындалды

    Ол 1983 жылы Жамбыл облысы, Жуалы ауданында дүниеге келген. Білімі – жоғары, 2007 жылы Алматы энергетика және байланыс институтын инженер мамандығы, 2017 жылы Қазақ инновациялық гуманитарлық-заң университетін экономика және бизнес мамандығы бойынша аяқтаған.

    Еңбек жолын 2008 жылы «Алатау Жарық Компаниясы» АҚ жетекші инженері болып бастаған. Әр жылдары Шемонаиха аудандық электр желісінің бас инженері және бастығы, «АлТС» АҚ бас инженердің орынбасары, «Жетісу Су Арнасы» МКК директордың орынбасары, «JADKAZ GROUP» ЖШС бас инженері лауазымында қызмет атқарған.

  • Шерзаттың отбасы моральдық өтемақы ретінде жүздеген миллион теңге алады

    Шерзаттың отбасы моральдық өтемақы ретінде жүздеген миллион теңге алады

     

    Басты айыпты Абзал Шынасыл марқұмның туыстарына — Қаржаубай Нұрымов, Гүлбарам Бейшембиева және Жұмабике Қадыроваға — әрқайсысына 20 миллион теңгеден, жалпы 60 миллион теңге төлеуге міндеттелді.

    Равиль Сакиев те осы үш жәбірленушіге 15 миллион теңгеден, барлығы 45 миллион теңге өтемақы төлейді.

    Қалған сотталушылар — Азамат Тоқтаубаев, Нұркияс Ілиясов, Шыңғыс Белғожаев, Дархан Аскентаев, Нұрбол Тоқтаубаев және Дидар Қалиахмет — әрқайсысы 30 миллион теңгеден өтеуі тиіс.

    Кәмелетке толмаған Думан Ысқаққа азаматтық талап қойылмады.

    Осылайша, сот Шерзаттың отбасына келтірілген моральдық зиянды өтеу үшін сотталғандарға жүздеген миллион теңге төлеуді міндеттеді.

  • Қала әкімі жағажайларды тексерді

    Қала әкімі жағажайларды тексерді

    ТЖБ мамандарының сөзінше, шомылу маусымы басталғалы мұнда кезекшілік пен патрульдеу ұйымдастырылған. Сондай-ақ 10-нан астам құтқарушы посттарда отыр.

    Бейнебақылау камералары арқылы полиция басқармасы бақылау жүргізуде. Әр жерлерде ақпараттық баннерлер орнатылған.

    Ал кәсіпкерлермен тілдескен шаһар басшысы халықтың қауіпсіздігін қамтамасыз ету, нысандарды санитарлық-эпидемиологиялық талаптарға сәйкестендіру – ең басты шаралар екенін атап өтті.

    «Келісімшарт жасалған соң, нысандарды талаптарға сай ете отырып, халыққа жоғары деңгейде қызмет көрсету қажет. Қайғылы жағдайлар орын алмас үшін бірлесе әрекет етейік. Жағажайды, бизнес орындарын таза ұстаңыздар. Халық пен қонақтар, демалушылар тарапынан түскен сын-пікірлерді басшылыққа алып, кемшілікті түзетіңіздер», – деді Асхат Бердіханов.

    Айта кетейік, биыл Қонаевта 140-тан астам демалыс орны жұмыс істейді. 6,7 жағажайларды абаттандыру шомылу маусымынан кейін басталады деп жоспарлануда.