2023 жылдың маусымында күдікті Алматыдағы банктердің клиенттері атынан телефон нөмірлерін ауыстыру туралы өтініш жіберіп, бес адамның есепшотына қол жеткізген. Ақшаны “дропперлердің” шоттарына аударып, жалпы 230 млн теңгеден астам қаржы жымқырған.
Қаңтарда ол Бішкек әуежайында ұсталып, Қазақстанға экстрадицияланды. Қазір тергеу изоляторында отыр. 5 жылдан 10 жылға дейін бас бостандығынан айырылуы мүмкін.
Бұған дейін де бірнеше алаяқтар шетелден Қазақстанға экстрадицияланған болатын.
Абай облысының Бородулиха ауданына қарасты Қызылжар ауылында өзендегі мұз кептелісінің салдарынан су деңгейі көтеріліп, бір көшедегі үйлердің ауласына су кіре бастаған. Бұл туралы облыс әкімдігінің баспасөз қызметі жазды.
«5 сәуір кешкісін тұрғындар алдын ала қауіпсіздік мақсатында үйлерінен шығып кеткен. 26 адам уақытша ауыл мектебіне орналастырылды. Мал-мүлікті қауіпсіз жерге көшіру жұмыстары жүргізілді. Оқиға орнына 123 адам, 39 техника, соның ішінде үш қайық тартылды. Қазір мұз жару жұмыстары жүргізіліп жатыр», — делінген хабарламада.
6 сәуір күні облыс әкімі Берік Уәли оқиға орнына барып, тікұшақпен өзен арнасын бақылап, жедел штаб отырысын өткізді. Аудан әкімі мен ТЖД басшылары ауылдың 30-ға жуық ауласына су кіргенін хабарлады. Жағдай бақылауға алынған.
«Қызылжар – жыл сайын су басу қаупі туындайтын ауылдардың бірі. Бұл мәселе менің тікелей бақылауымда. Мұз жару жұмыстарын бүгін кешке дейін аяқтау керек», – деді Берік Уәли.
Ақтөбе облысында пышақ ұстаған күдікті ер адамды балаларының көзінше ойын алаңында пышақтап кетті. Қазір ол бостандықта жүр. Бұл туралы Aktobe_live басылымы хабарлайды.
Зардап шеккен адам ауруханаға жатқызылып, оған күрделі шұғыл ота жасалды. Күдікті бостандықта жүргендіктен оның әйелі мен балаларының да өміріне қауіп төніп тұр.
Жантүршігерлік оқиға 6 сәуір күні Абай даңғылы, 15А мекенжайындағы балалар алаңында болды. Зардап шеккен отбасының айтуынша, сағат 15:00 шамасында әкесі аз уақытқа кетіп қалғанда үлкен ұлы бес жасар інісіне қарап қалған. Осы уақытта ересек ер адам пайда болып, үлкен ұлының қолынан ағаш сыпырғышпен ұрған. Артынша салпыншақ пышағымен қорқытып, ағасына жақындауға мүмкіндік бермеген.
Бала осы уақытта әкесіне телефон соғып үлгереді. Ол келіп, жағдайды бейбіт жолмен шешуге тырысқанмен, қаскөй өзін агрессивті ұстап, куәгерлердің айтуынша, әкесін кеуде тұсынан пышақтап кеткен. Мұның бәрі ойын алаңында балаларының және өтіп бара жатқан адамдардың көзінше болған.
Зардап шегуші шұғыл түрде ауруханаға жатқызылды. Отбасының айтуынша, операция екі сағатқа созылған, ер адамның жағдайы әлі белгісіз.
Жәбірленушінің әйелі полицейлер арызды бірден қабылдамағанын, ұлына ешқандай соққы жасалмағанын айтып, сылтауратқан. Шабуыл жасаған адам бостандықта және отбасыны қорқытуын тоқтатар емес.
«Үйден шығуға қорқамын. Ол зорлық-зомбылық көрсетемін деп қорқытады. Мен тек әділдік пен қорғауды сұраймын», — деп жазды зардап шеккен балалардың анасы әлеуметтік желіде.
Оқиғаға қатысты облыстық полиция департаменті жауап берді. Олар «Денсаулыққа қасақана ауыр зиян келтіру» бабы бойынша іс қозғалғанын хабарлады.
«Полиция қызметкерлері күдіктіні пышақтау дерегі бойынша ұстап, полиция бөліміне жеткізді. ҚР Қылмыстық кодексінің 106-бабы бойынша сотқа дейінгі тергеу амалдары жүргізіліп жатыр. Күдікті ешқайда шықпау туралы жазбаша міндеттемеге қол қойды», — деп хабарлады Ақтөбе облысының полиция департаменті.
Пәтерлер комиссия шешімінсіз беріліп, келісімшарттар жасалмаған.
Мұғалім жетім балаға арналған пәтерді заңсыз иеленген. 70 жалға алушы 6,5 млн теңге қарыз болғанымен, шара қолданылмаған. Кейбір пәтерлер үшінші тұлғаларға берілген, кезекте марқұм азаматтар тіркелген.
Бос тұрған 65 пәтер 209 мұқтаж азаматқа берілмеген. Ауданның экономика секторы бөлімінің басшысына ескерту берілді.
Алматы қаласы Мемлекеттік кірістер департаментінің қызметкерлері тексеру шаралары кезінде 18 603 қорап контрафактылық темекі тауып, тәркіледі. Бұл темекі қораптарында идентификациялау кодтары жоқ немесе белгісіз үлгідегі кодтар қолданылған. Заңсыз өнімнің жалпы құны шамамен 17 миллион теңге деп бағаланды.
Құқықтық шаралар:
• Тәркіленген темекі өнімдері бойынша материалдар Алматы қаласының сот органдарына жолданды;
• Құқық бұзушылық үшін әкімшілік және қылмыстық жауапкершілік қарастырылған.
Мемлекеттік кірістер департаменті азаматтарды күмәнді темекі өнімдерін сатып алмауға шақырады. Темекі өнімдерінің шынайылығын “NAQTY ONIM” мобильді қосымшасы арқылы тексеруге болады.
Щучинск қаласында 33 жастағы ер адам тау бөктерінен құлап, жарақат алды. Құтқарушылар оны медициналық көмек көрсету үшін тапсырып, емханаға жеткізді.
Мәлімет бойынша, “101” пультіне “103” қызметінен хабарлама түскен. Онда “Телевышка” бақылау алаңы маңында адам құлағаны айтылған. Құтқарушылар жарақат алған ер адамды таудан түсіріп, жедел жәрдем бригадасына тапсырды.
Енді отандық сынама мөрі жоқ зергерлік бұйымдарды сатуға жауапкершілік күшейтілді.
Жаңа ережелер:
• 2025 жылдың 13 наурызынан бастап қолданысқа енгізілген
• Бұйымның сынама мөрі және сараптама туралы құжаттары болмаған жағдайда сатушылар әкімшілік жауапкершілікке тартылады.
• Салық төлемдері: 190 мыңнан 580 мың теңгеге дейін, кәсіпкерлік түріне қарай.
Министрлік бұл шаралар сатушыларға зергерлік бұйымдар сапасына бақылауды күшейту мақсатында енгізілгенін хабарлады.
Қазақстанда есірткі зертханасын ұйымдастырғаны үшін Латвияның екі азаматы 11 жылға сотталып кетті.
ШҚО қылмыстық істер жөніндегі мамандандырылған ауданаралық сотының үкімімен екі Латвия азаматы Қазақстан Республикасы Қылмыстық кодексінің 297-бабы 1-бөлігі 3-тармағының 1,3-тармақшалары бойынша кінәлі деп танылып, 11 жылға бас бостандығынан айыру жазасына кесілді.
«Бұған дейін, 2024 жылғы шілдеде, облыс прокуратурасы ҰҚК ШҚО бойынша департаментімен қадағалау органының үйлестіруімен синтетикалық есірткі өндіруге арналған жасырын зертхананың анықталғаны туралы хабарлаған болатын.
Еске сала кетсек, тінту барысында 125 кг мефедрон (630 мың бір реттік дозаға баламалы), 500 литр прекурсорлар және тәулігіне 30 кг синтетикалық есірткі өндіруге мүмкіндік беретін жаңа буынды зертханалық жабдық тәркіленген.
Тәркіленген есірткінің қара нарықтағы құны 3,5 миллиард теңгеден асады», – делінген облыстық прокуратура хабарламасында.
Қылмыстық іс сотта 3 ай бойы қаралды. Сот процесі барысында айыпталушылардың кінәсі толық дәлелденіп, мемлекеттік айыптаушы соттан 11 жыл бас бостандығынан айыру жазасын тағайындауға бағдар берді.
Сотталғандар жазасын орташа қауіпсіздік деңгейіндегі түзеу мекемесінде өтейді. Сот үкімі заңды күшіне енген жоқ.
Жамбыл облысы Шу ауданында босану кезінде ана мен бала көз жұмған оқиға бойынша дәрігерлер кінәлі деп танылып, жауапты тұлғалар жазаланды. Арнайы комиссия акушерлердің салғырттығын анықтаған.
Жазаланғандар:
• Аурухана бас дәрігері қызметінен босатылды
• Орынбасары мен босандыру бөлімінің басшысы — жұмыстан қуылды
• Облыстық денсаулық сақтау басқармасындағы екі басшыға қатаң сөгіс берілді
25 жастағы Әдемі Ешеналиеваның қан қысымы 170-ке дейін көтерілген, ал дәрігерлер алдын ала белгілерге көңіл бөлмеген. Сәбиі іште шетінеген, әйел 12 күн комада жатып көз жұмды.
ІІМ әкімшілік полиция комитетінің төрағасы Қайсар Сұлтанбаев Алматыда автобус жүргізушісі 7 жасар баланы жүргіншілер өткелінен өткізбегені үшін жауапқа тартылғанын айтты.
«Алматыда бір-екі күннің ішінде екі жол-көлік оқиғасы болды. Оның бірі жүк көлігінің қатысуымен болды. Расын айту керек, қайтыс болған жасөспірім кәдімгі жүргінші өтетін өткелген өтіп бара жатқан. Бұл қаланың орталығында болған жағдай емес, қаланың шетінде болған. Алматыда Айнабұлақ деген шағын аудан бар. Сол ауданнан төмен жақта, қаланың шетінде. Ол жақта жүк көліктеріне өтуге құқығы бар. Жаңағы бала жаяу жүргінші өткелінен өтіп келе жатқанда бір автобус алдынан өтіп кетеді де, содан қорқып, ол артқа қарай жүргенде қасында келе жатқан жүк көлігі баланы байқамай қалып, басып кетіп отыр», – деді ІІМ өкілі.
Қайсар Сұлтанбаевтың айтуынша, автобус жүргізушісі баланы жүргінші өткелінен өткізбегені үшін жауапқа тартылды. Бұл дерек бойынша қылмыстық іс қозғалды.
«Қылмыстық істің шеңберінде жол апатына қатысты әрбір азаматтың жауапкершілігі қаралатын болады», – деді ол.