Sona.kz

Метка: Қонаев қаласы

  • Қонаевта 28 отбасы қоныс тойын тойлады

    Қонаевта 28 отбасы қоныс тойын тойлады

    Қонаев қаласында кезекте тұрған әлеуметтік осал топтағы отбасыларға пәтер кілттері табысталды. Тұрғындарды қоныс тойымен құттықтаған қала әкімі Асхат Бердіханов:

    «Қонаев қаласында тұрғын үйлердің құрылысы қарқынды жүруде. Онымен қоса, халықты баспанамен қамту мәселесіне де аса ден қойылуда. Былтырдан бері 165 отбасыға пәтер кілттері табысталса, бүгін 28 отбасы қуанышқа кенелейін деп отыр. Биыл Ұлы Жеңістің 80 жылдығы, біртуар азаматтарымыздың 90-100 жылдығы тойланып, Жұмысшы мамандықтар жылына орай бірқатар іс-шаралар жүзеге аспақ. Осы атаулы күндермен қатар сіздер де көптен күткен пәтерге ие болдыңыздар. Шаңырақтарыңыздың іргетасы мықты, керегесі кең болсын! Ішінде тек қана татулық пен береке, қуаныш пен бақыт, құт пен ырыс салтанат құрсын!», – деді.

    Қуаныш иелерінің атынан Ғалия Момбекова сөз алып, жиналған жұртқа ақжарма тілегін арнады.

    «Біз секілді жанұяларға қолдау көрсеткен Президентімізге, облыс әкімі мен қала әкіміне алғысым шексіз! Бұл күнді өте ұзақ күттік! Іштей толқып, кеудемді керемет сезімдер билеуде! Әр жанұяға биылдан қалмай, үйлі болуын тілеймін! Той тойға ұлассын!», – деді ол.

    Айта кетейік, бұл пәтерлер жекешелендіру құқығынсыз жалға беріледі. Жалға алу құны барша азаматқа қолжетімді.

  • Қонаевта қоқыс тастағандарға 1 млн теңгеден астам айыппұл салынды

    Қонаевта қоқыс тастағандарға 1 млн теңгеден астам айыппұл салынды

    Қонаев қаласында «Таза Қазақстан» акциясы аясындағы іс-шаралар жалғасуда. Оның бірі – тазалық мәдениетін қалыптастыру. Ескертулер мен әкімдіктің ресми хабарламаларына қарамастан, қалада тазалық ережесін бұзушылар өте көп.

    Мысалы, 22-28 наурыз аралығында Қонаев қалалық полиция бөлімі ҚР ӘҚБтК-нің 434-2-бабына (Ортақ пайдаланылатын орындарды ластау) сәйкес, 24 хаттама толтырып, 943 680 теңгеден астам сомаға айыппұл салды.

    Одан бөлек, ҚР ӘҚБтК-нің 505-бабына (Қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру) сай, 67 хаттама толтырылып, 235 920 теңге айыппұл салынды. Барлық айыппұл сомасы 1 179 600 млн.тг. құрады.

    Қала халқына «Коммуналдық қалдықтарды басқару қағидаларын бекіту туралы» бұйрығына сәйкес, ірі көлемді қоқыстар мен құрылыс қалдықтарын шығаруға тұрғындар жауапты екенін жеткіземіз. Жалпы, жыл басынан сенбіліктерге 3000-нан астам адам қатысты. Бұл көрсеткішті ұлғайту мақсатындағы жұмыстар жалғасын табады.

    Сіз де заңбұзушылықтың куәгері болсаңыз, 102 немесе 109 нөміріне хабарласыңыз.

  • Қонаевтағы Бөлек ата кесенесі мемлекетке қайтарылды

    Қонаевтағы Бөлек ата кесенесі мемлекетке қайтарылды

    Аталған нысанды орналастыру үшін алаңы 1,5941 га жер учаскесі 2004 жылы Қапшағай қаласы (қазіргі Қонаев) әкімінің қаулысымен жеке меншікке «Бөлек батыр Жалайыр» Қоғамдық қоры ЖШС-не берілген.

    Ал 2022 жылғы 26 тамыздағы Алматы қаласының мамандандырылған ауданаралық экономикалық сотының шешімімен «Бөлек батыр Жалайыр» қоғамдық қоры мәжбүрлі түрде жойылған. Арада бір жыл өткен соң нысан иесіз мүлік ретінде есепке алынған.

    Осыған байланысты Қонаев қаласының әкімдігі сотқа жүгінген. Әкімдік нысанды иесіз және коммуналдық меншікке түскен деп тану туралы уәж айтқан. Ал үшінші тұлғаның өкілі бұл талаппен келісіп, мемориалды кешеннің маңызы зор және оны күтіп ұстау үшін шығындар қажет екенін, қазіргі таңда кешеннің қараусыз екенін көрсеткен. Сот ҚР қолданыстағы заңнамаларына сәйкес, әкімдіктің талабын қанағаттандырып, нысанды мемлекет меншігіне қайтаруды ұйғарды.

    Бұл кешен мәдениет бөлімінің иелігіне өтіп, мемлекет қорғауында болады.

  • Қонаев қаласы: Қоғамдық орындарды ластаған 39 азаматқа айыппұл салынды

    Қонаев қаласы: Қоғамдық орындарды ластаған 39 азаматқа айыппұл салынды

    Қонаев қаласында «Таза Қазақстан» бағдарламасы аясында шаһардағы тазалық мәселесіне аса көңіл бөлінуде. Заңсыз қоқыс үйінділерін жою, ҚР заңнамасы шеңберінде бекітілген ережелерді бұзған тұлғалармен түсіндірме жұмыстарын жүргізу, айыппұл салу шаралары қолға алынған.

    Мысалы, 1-8 наурыз аралығында ҚР ӘҚБтК-нің 434-2-бабына (Ортақ пайдаланылатын орындарды ластау) сәйкес, 39 хаттама толтырылып, 766 мың теңгеден астам сомаға айыппұл салынды. Одан бөлек, ҚР ӘҚБтК-нің 505-бабына (Қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру) сай, 92 жеке және заңды тұлғаға 943 680 теңге айыппұл салынды.

    Қонаевта «Таза Қазақстан» бағдарламасы аясында кестеге сай, күнделікті сенбіліктер ұйымдастырылуда. Әкімшілік нысандардың, мектептердің, кәсіпкерлік нысандардың төңірегі тазартылуда. Одан бөлек, пәтер иелері кооперативтері аулаларды қоқыстан тазартуда. Жалпы Қонаевта 109 бірыңғай байланыс нөмірі іске қосылған. Тұрғындардан тазалық бойынша түскен өтінімдер коммуналды қызмет көрсетуші компаниялармен бірден орындалуда. Азаматтардан қоқысты арнайы орындарға тастауларын сұраймыз. Аталғандардан басқа, полиция басқармасы ҚР ӘҚБтК-нің 434-2 және 505-бабына сәйкес, хаттамалар толтырып, ережені бұзғандарға айыппұл салуда. Бұл шараның барлығы азаматтар арасында тазалық мәдениетін қалыптастыру үшін қолға алынған.

    Аталған бағыттағы жұмыстар ары қарай да жалғасады.

  • Алматыдағы №1 балалар үйі Қонаевқа көшірілмейтін болды

    Алматыдағы №1 балалар үйі Қонаевқа көшірілмейтін болды

    Бұған дейін Алматыдағы №1 балалар үйінің Қонаев қаласындағы әлі құрылысы бітпеген ғимаратқа көшетіні туралы ақпарат тараған еді. Мұны естіген тәрбиеленушілер де жылы орыннан кеткісі келмейтінін жеткізді.

    Алайда, шенеуніктер 1963 жылы салынған балалар үйінің ғимараты апатты жағдайда қалғанын, күрделі жөндеуге келмейтінін айтқан. Яғни, оның орнына Қонаев қаласынан жаңа ғимарат салынып жатқанын, оның 2025 жылдың жазына дейін аяқталатыны туралы уәде етілген. Сондай-ақ, балаларға абаттандырылған аумақ, жолдар, жарықтандыру және инженерлік желілер салып беру жағы да кепілдендірілген.

    Десе де, балалар үйінің тұрғындары мен олардың қорғаушылары бұл қадамды дұрыс емес деп санайды. Олардың пікірінше, «Қонаев қаласында жетім балаларға Алматыдағыдай оқу мен даму мүмкіндігі болмайды».  Сонымен қатар, бұл ғимаратқа түзеу колониялары жақын орналасқандықтан тағы да қосымша мәселе туындауы мүмкін екенін де жасырмайды.

    Айта кету керек. бұл жағдайға Аружан Саин бастаған қоғам белсенділері араласты. Ол Instagram парақшасында балалар үйіне барып, тәрбиеленушілермен кездесіп, пікір алмасқанын салды. Онда балалар ғимараттың ешқандай апаттық жағдайда емес екенін айтқан.

    Ал Алматы облысының білім басқармасы жаңа балалар үйінің құрылысы бекітілген жоспар бойынша жүргізіліп жатқанын хабарлады.

    «Учаскенің таңдауы бірқатар факторларға, соның ішінде санитарлық және экологиялық нормаларға сәйкес, сондай-ақ әлеуметтік инфрақұрылымды одан әрі дамыту мүмкіндігіне байланысты болды. Заречное ауылы Қонаев қаласынан 20 шақырым жерде орналасқан. Ауыл Алматы мен Қонаев қалаларының арасында орналасқан», – деп хабарлады ведомство.

    Құрылыс аяқталғаннан кейін балаларға қолайлы жағдай жасалады: абаттандырылған аумақ, асфальт жолдар, жарықтандыру және инженерлік желілер бәрі салынады.

    Сондай-ақ, Алматы облысы Білім басқармасы балалар үйінің жерін Әлия Назарбаева сияқты жеке тұлғаларға сату туралы қауесеттерді жоққа шығарды және балаларды қорлау фактілері расталмаған деп сендірді. Балалар үйіне арнайы келген Алматы облысы білім басқармасының басшысы Салтанат Беспаева:

    «Біз балалар үйі мен оның тәрбиеленушілеріне қатысты барлық мәселелерді бақылауда ұстаймыз. Жаңа ғимаратты қажетті құрал-жабдықтармен, көліктермен және оқу құралдарымен қамтамасыз ету ғана емес, балалардың өмір сүруіне жайлы және қауіпсіз жағдай жасау маңызды. Ал Алматыдан Қонаевқа қалай келіп-кетеміз деген қызметкерлер үшін сол жерде арнайы жатып істейтін бөлмелер қарастырылады», – деді Салтанат Беспаева.

    Сонымен, Алматыдағы №1 балалар үйі Қонаевқа көшірілмейтін болды. Бұл туралы №1 балалар үйінің тәрбиеленушілерімен және Алматы облысының әкімі Марат Сұлтанғазиевпен кездескен Бала құқықтары жөніндегі уәкіл Динара Зәкиева да хабарлады.

    Ол балалар үйінің тәрбиеленушілері мен Алматы облысының әкімімен өткен кездесудің қорытындысы бойынша келесі ақпаратпен бөлісті:

    – Баганашылдағы балалар үйінде тұрып жатқан балалар осы үйде қала береді;
    – Жаңа ғимарат Нүсіпбаев атындағы интернаттың балаларына беріледі (бұған дейін ол жерде жағдайдың өте нашар екенін және балаларға тиісті жағдай жасалмағанын жазған едім);
    – Жаңа ғимараттың бір корпусын Кәмелетке толмағандарды бейімдеу орталығына береді, ол жерге облыстың барлық ауданынан келген балалар қабылданады, осылайша оларды қалаға тасудың қажеті болмайды, – деді ол.

    Ал Алматы облысының әкімі Марат Сұлтанғазиев Алматы қаласындағы №1 балалар үйінің тәрбиеленушілерімен кездесу барысында: «Балалар Алматыда қалғысы келетіндерін айтты, өйткені жаңа ортаға бейімделу және әлеуметтік ортадан ажырау олардың психологиялық жағдайына кері әсер етуі мүмкін. Бұл фактор шешім қабылдауда басты назарға алынды. Сондықтан қалада білім алып жүрген тәрбиеленушілер өздеріне үйреншікті ортада оқуын жалғастырады, ал жаңадан қабылданатын балалар Қонаев қаласына орналастырылады», – деді облыс әкімі.

    Айта кетейік, 240 орынға есептелген жаңа балалар үйінің ауданы 4000 шаршы метр. Онда жайлы тұрғын бөлмелер, оқу сыныптары және демалыс аймақтары қарастырылған. Жақын маңда 900 орындық мектеп орналасқан, ал балаларды тасымалдау үшін арнайы автобус бөлінеді. Кешеннің ашылуы жаз айларына жоспарланған. Бұдан бөлек, жаңа ғимараттың бір бөлігі инфрақұрылымдық мәселелерге тап болған Нүсіпбаев атындағы интернатқа беріледі.

  • Шеңгелдідегі суару желілері күрделі жөндеуден өтеді

    Шеңгелдідегі суару желілері күрделі жөндеуден өтеді

    Қонаев қаласының әкімі Асхат Бердіханов Шеңгелді ауылдық округінде қызмет ететін шаруалармен, сорғы станцияларының басшыларымен кездесті.

    Ауқымды жиында ауыл шаруашылығы саласын дамыту мәселесі талқыланды. Жауапты бөлімнің басшысы Асқар Ибраимовтың сөзінше, елдімекенде 9 сорғы станциясы орналасқан. Қазір оның төртеуінде көктемгі дала жұмыстарына дайындық басталып, ағымдағы жөндеу жасалуда.

    Ал №4 сорғы станциясының басшылығы қаржылық тапшылықтың болуына байланысты жөндеу жүргізудің кешіктіріліп жатқанын мәлім етті. Осы орайда, Асхат Бердіханов әкімдікпен үшжақты меморандумға қол қою арқылы қажетті қондырғыларды уақытша пайдалану туралы ұсыныс білдірді. Егер бұл шара жүзеге асса, №4 сорғы станциясы 1000 гектардан астам жерді суарға мүмкіндік болады.

    Сондай-ақ басқосуда басқа да сорғы станцияларының желілерін жаңғыртуға қажетті құжаттар дайындалып жатқаны айтылды. Ал №5 сорғы станциясының суару желілерін күрделі жөндеу жұмыстары 2022 жылы басталған болатын. Барлық жобаларда тапсырыс беруші – Алматы облысының құрылыс басқармасы.

    Суды үнемдеу мәселесіне келсек, қазіргі таңда тамшылатып суаруға қажетті құрал-жабдықтарды өндіруші «Жібек жолы» ЖШС-мен шаруалар келіссөздер жүргізіп жатыр. Биыл жаңа технология пайдаланылатын егістік алқабының көлемін ұлғайту жоспарлануда.

    Сонымен қатар шаруаларға берілетін мемлекеттік қолдауларды алудың түрлі тетіктері де айтылды. (Ол туралы қосымша ақпарат жарияланады).

    Айта кетейік, былтыр Шеңгелдіде 8050 гектар жер игерілген.

  • Қонаевта әйел адам қайтыс болған баласының «еміне» халықтан ақша жинаған

    Қонаевта әйел адам қайтыс болған баласының «еміне» халықтан ақша жинаған

    Алматы облысында полицейлер 2023 жылы қайтыс болған баласын емдеуге қаражат сұрап, алаяқтық жасаған әйелді ұстады. Тергеу мәліметінше, 31 жастағы Қонаев қаласының тұрғыны адамдардың сеніміне кіріп, заңсыз ақша жинаған.

    Сонымен қатар оның тағы бір алаяқтық ісіне қатысы бары анықталды: ол науқас баланы емдеуге қаражат қажет деген желеумен азаматтарды алдап келген. Қазіргі уақытта аталған факті бойынша қылмыстық іс қозғалып, тергеу амалдары жүргізілуде.

  • Жағажайдағы ескі-құсқының көзін жоятын кез келді – Асхат Бердіханов

    Жағажайдағы ескі-құсқының көзін жоятын кез келді – Асхат Бердіханов

    Қонаевтағы 6,7-ші жағажайларды жаңартып, жаңғыртатын уақыт келді. Бұл туралы кәсіпкерлермен кездескен қала әкімі Асхат Бердіханов айтты.

    Баршаға мәлім, 2024 жылы №5 жағажай қолданысқа берілді. Қазір «Фридом финанс» компаниясы 1 шақырым жағажайды абаттандырып жатыр. Құрылысы жақын арада аяқталады деп жоспарланған. Сондай-ақ құрылыс жұмыстары №8 жағажайда да жүріп жатыр. Алдағы уақытта 5 шақырымнан астам жағажайды абаттандыру, Солтүстік жағажайларды да кезең-кезеңімен дамыту көзделуде.

    Енді жуық арада 6,7-ші жағажайды абаттандырып, қолданысқа беру қажеттілігі туындап отыр. Себебі, шомылу маусымында осы қалалық жағажайға келіп, демалатын адамдардың саны басқа орындармен салыстырғанда айтарлықтай көп. Туризмді дамыту, демалушыларға қолайлы орта құру, қызмет көрсету сапасын жоғарылату – әкімдіктің басты міндеттерінің бірі. Жағажайды абаттандыру – инвестициялық тартымдылықты арттыру, облыс орталығының сәулеттік келбетін жақсарту үшін де таптырмас мүмкіндік.

    Мұндағы бизнес орындарының қазіргі жағдайы көңіл көншітпейді: қираған темір жабдықтар, қоқыс толған аумақтар, тапшандар.

    Бұған дейін бірнеше жыл қатарынан мұнда 42 кәсіпкер қызмет еткен. Олар коммуналдық мемлекеттік мекемемен келісімшартқа отырып, арзан бағада бизнес орындарын жалға алып әрі ағымдағы жөндеу ғана жасап отырған. Енді ол заман келмеске кетті, – дейді әкім.

    Мәселені түбегейлі шешу үшін әкімдіктің дөңгелек үстелінде «Қонаев әлеуметтік-кәсіпкерлік корпорациясы» АҚ-ның өкілдері, бөлім басшылары, кәсіпкерлер жиналды.

    «Жыл басында аумағы 7,5706 гектар жағажай«Қонаев әлеуметтік-кәсіпкерлік корпорациясы» АҚ-ға 10 жылға уақытша пайдалануға берілді. Енді корпорация жағажайды жаңғыртуға белсене кіріспек ниетте», — деді Асхат Бердіханов.

    Ал корпорация мамандары кәсіпкерлерге керемет мүмкіндіктер ұсынды:

    1. Егер құрылыс корпорация қаржысына ғана жүргізілсе, абаттандыру толық аяқталған соң, сенімгерлік басқарушы компания бизнес орындарын жалға алуға конкурс өткізеді. Оған кез келген кәсіпкер қатысуына болады;

    2. Егер құрылысқа кәсіпкерлер өздері қаржы құйса, нысанды бірден бірнеше жыл жалға алуға мүмкіндік қарастырылады.

    Кәсіпкерлер әлі де бұл мәселені талқылау қажеттілігін жеткізді. Олар құрылыстың қымбатқа соғатынын алға тартты.

    «Жағажайды жөндеуге инвестор тартсақ, жаңа жұмыс орындары құрылғанымен, басқа кәсіпкерлердің жұмысы тоқтап қалады. Сондықтан шағын және орта бизнес өкілдерін қолдау мақсатында «Қонаев ӘКК» АҚ-мен серіктес болуға шешім қабылдадық», — деді әкім.

    Сонымен қатар ол былтыр шомылу маусымында қалаға 1,5 млн демалушы келгенін айтты.

    «Биыл көрсеткішті жоғарылату қажет. Ол үшін жағалауларды заманауи әрі көрікті етсек артық болмайды», — деді Асхат Бердіханов сөзін қорытындылап.

    Аталған мәселеге байланысты қосымша ақпараттар алдағы уақытта жарияланатын болады.

  • Қонаев қаласында балықшылар өзара мықтыны анықтады

    Қонаев қаласында балықшылар өзара мықтыны анықтады

    Алматы облыстық балық аулау федерациясы Қонаев қаласы әкімдігімен бірлесіп, Қапшағай су қоймасында балық аулаудан ашық біріншілік ұйымдастырды.

    Жарысқа Алматы облысының бірнеше өңірінен, сондай-ақ Алматы және Қонаев қалаларынан балықшылар қатысты. Барлығы 15 команда (әрқайсысы 3 адамнан) жеке және командалық есеп бойынша өзара сынға түсті. Біріншілік 5 сағатқа созылды.

    Нәтижесінде ең үлкен балықты аулап, «Big Fish» арнайы жүлдесін Е. Кембаев жеңіп алды. Жеке есепте 1-орынды К. Курбанов, 2-орынды Д. Канавалов, 3-орынды Н. Шуляков иеленді. Ал командалық есепте «Қонаев-3» командасы 3-орынды, «Наутилус» командасы 2-орынды, ал «Feeder.kz» командасы 1-орынды қанжығасына байлады.

    «Біздің федерация құрылғанына 1 жылдан енді асты. Осы уақыт ішінде мүшелік ететін адамдар саны айтарлықтай артты. Біз жылына 6-7 рет балық аулау жарысын ұйымдастырып отырамыз. Бұл жолы бізге қолдау көрсеткен Қонаев қаласы әкімдігіне алғыс білдіреміз», – деді федерация басшысының орынбасары Дамир Сергибаев.

    Жарыс барысында барлық қауіпсіздік талаптары сақталды. Бұл күні мұздың қалыңдығы 70 см болды.

    Айта кетейік, балықшылар демалыстан кейін су қоймасының үстіндегі қоқыстарды жинап кетуге міндетті. Табиғатқа жанашырлық – әр демалушының жауапкершілігінен басталады. Қоршаған ортаны ластағаны үшін әкімшілік жаза қарастырылғанын еске саламыз.

  • Қонаев қаласындағы 9 сынып оқушысына қатысты: Төбелес пе, суицид жасамақ болды ма?

    Қонаев қаласындағы 9 сынып оқушысына қатысты: Төбелес пе, суицид жасамақ болды ма?

    Бұған дейін әлеуметтік желіде журналист Гүлмира Әбіқай Алматы облысының орталығы Қонаев қаласына  кіреберіс алып көпірдің асты күші тасыған оқушыларға күшті мекен екенін, топтық төбелес те, тығылып ішу мен темекі тарту да осында болатынын жазған еді. «Оған себеп – 9 сынып оқушылары топтасып өз сыныптасын өлімші етіп ұрып тастаған. Жасөспірім аурухананың жансақтау бөліміне түсті. Бірақ ата-анасы өзімізді кінәлі қылуда деген. Ата-ананы тыңдамайтын, тәртіпке бағынбайтын, инспектордан ықпайтын баланың орны – колония. Ешкім баласын бақша, мектеп, әскерге мүгедек болсын деп жібермейді», – деген жазбасында журналист.

    Алайда, оқушының анасы жолдаған бейнеүндеуде «Осы жылдың 31 қаңтарында кәмелетке толмаған ұлым жергілікті ауруханаға түсті. Қаланың кіреберіс көпірінің астында ұлымды ешкім соққыға шыққан жоқ және ешқандай топтық төбелес болған жоқ. Желіде тарап жатқан ақпаратқа емес, тек ресми мекеменің, ақпарат құралының мәліметіне сенулеріңізді сұраймын» деген.

    Бұған қатысты Қонаев қалалық білім бөлімі арнайы комиссия құрып, қарастырған соң түсініктеме берді.

    «2025 жылдың 31 қаңтар күні кәмелетке толмаған  А. есімді оқушы Қонаев қаласы көпсалалы ауруханасының жан сақтау бөліміне «Химиялық антисептикпен ұлану» диагнозымен түскен. 31 қаңтар күні Қонаев қаласының полиция басқармасында іс тіркеліп, бүгінгі күні тергеу амалдары жүргізілуде.  Қазіргі кезде жасөспірім толық есін жиып, ауруханада ем қабылдауда, жағдайы қалыпты. Білім бөлімі тарапынан орта мектеп-гимназиядағы тәртіптік жағдайды тексеруге комиссия құрылды. Тексеріс қорытындысына сәйкес, қосымша хабарлама беріледі», – деп жауап берді.

    Ал жергілікті Полиция департаменті істің мән-жайы туралы: «Өзін-өзі өлтіруге дейін жеткізу дерегі бойынша қылмыстық іс қозғалғанын хабарлаймыз. Қазіргі уақытта болған оқиғаның барлық мән-жайларын толық және жан-жақты зерттеу үшін барлық қажетті тергеу әрекеттері жүргізілуде. Аталған жұмыстардың нәтижесі бойынша түпкілікті процестік шешім қабылданатын болады. Өзге ақпарат тергеу мүддесіне орай жария етілмейді», – деген түсініктеме берді.

    Сонымен, ата-анасы баласының жағдайына төбелестің қатысы жоқ десе де, өзін-өзі өлтіруге әрекеттенуіне не себеп?

     

    Посмотреть эту публикацию в Instagram

     

    Публикация от SONA.KZ — НОВОСТИ КАЗАХСТАНА (@sonanews.kz)