Sona.kz

Метка: сот

  • Алика Мұхамадиева ісі бойынша сот шешімі бүгін шығады

    Алика Мұхамадиева ісі бойынша сот шешімі бүгін шығады

    Қарағандыда әлеуметтік желідегі жазбалары үшін ұлтаралық және діни араздық қоздырды деп айыпталған 22 жастағы кәсіпкер Алика Мұхамадиеваға қатысты сот ісі аяқталуға жақын, деп хабарлайды Sona.kz ZTB -ға сілтеме жасап.

    Бүгін сотта айыпталушы соңғы сөзін айтып, тағы да көпшіліктен кешірім сұрады.
    «Барлығына шын өкінемін. Мен кінәмді толық мойындаймын. Маған сенім артқан адамдардың алдында ұялдым. Ең қиыны — қызымнан алыстап қалу. Қазір бәрінен бұрын сонымен бірге болғым келеді», — деді ол.

    Еске сала кетейік, Мұхамадиева әлеуметтік желіде (Threads) ұлтаралық және діни араздық белгілері бар пікірлер қалдырған еді. Кейін ол жұрттан кешірім сұрағанымен, бұл оны жауапкершіліктен босатпады.

    Прокуратура 4,5 жыл бас бостандығынан айыруды сұрады.
    Сот шешімі бүгін сағат 17:00-де жарияланады.

  • Алматыда Қожамжаровтың бұрынғы әріптестері азаптау ісі бойынша сотталды

    Алматыда Қожамжаровтың бұрынғы әріптестері азаптау ісі бойынша сотталды

    Алматы қаласында бұрынғы қаржы полициясының қызметкерлері — Кенжебай Жұмабеков пен Дәурен Есімбеков азаптау дерегі бойынша кінәлі деп танылып, сот үкімі шықты, деп хабарлайды Sona.kz Kazinform-ға сілтеме жасап.
    Сот процесі Алматы қаласының Қылмыстық істер жөніндегі мамандандырылған ауданаралық сотында жабық түрде өтті.
    Ресми мәліметке сәйкес, сотталушылар ҚР Қылмыстық кодексінің (1997 жылғы редакциясы) 141-1-бабы 2-бөлігінің «А, Б» тармақтарында көзделген «Алдын ала сөз байласқан адамдар тобының қайталап азаптауы» қылмысын жасағаны үшін кінәлі деп танылған.
    ? Жаза шарасы:
    •Кенжебай Жұмабеков — 6 жылға,
    •Дәурен Есімбеков — 4 жылға бас бостандығынан айырылды.
    Сонымен қатар, екеуі де 3 жылға мемлекеттік қызметте жұмыс істеу құқығынан айырылды.
    Соттың хабарлауынша, үкім әлі заңды күшіне енген жоқ.
    Қылмыстық іс бойынша жәбірленушілердің нақты саны жарияланбай отыр — себебі материалдарда мемлекеттік және өзге де құпия ақпарат бар.
    БАҚ дерегінше, тергеу ісі «Хоргос» кеден бекетінің бұрынғы брокерлері — Руслан Сыдыков, Нұрлан Сарымбетов және Нұрбек Мұратбековке қатысты жүргізілген, ал айыпталушылар оларды тергеу кезінде азаптаған болуы мүмкін.
    ⚖️ Бұл іс қоғам назарын аударды, себебі сотталушылар кезінде Қайрат Қожамжаров басшылық еткен қаржы полициясы жүйесінде жұмыс істеген.
    Еске сала кетсек, Алматыда бұған дейін «Дикий Арман» атымен белгілі Арман Жұмагелдиевке қатысты 20 жылға бас бостандығынан айыру үкімі шыққан іс бойынша апелляциялық процесс өтіп жатыр.
  • “Біз одан да қорқынышты нәрселер жасадық”

    “Біз одан да қорқынышты нәрселер жасадық”

    Атыраулық 23 жастағы Яна Легкодимованың өліміне қатысты сот процесі қоғам назарында тұр. Сот отырысында айыпталушылардың алдын ала қылмыс жоспарын талқылаған хат алмасулары жарияланып жатыр, деп хабарлайды Sona.kz Tengrinews.kz-ке сілтеме жасап.

    Іс басталар алдында күдіктілер алқабилер сотынан бас тартқан. Адвокаттың айтуынша, олар қоғам тарапынан болатын қысым мен айыптаудан қауіптеніп, істі тек судьяның қарауын жөн көрген.

    Сотта жарияланған хаттамадағы ең көп талқыланған сөйлемнің бірі:

    “Біз одан да қорқынышты нәрселер жасадық”.

    Жәбірленуші тараптың өкілі Ажар Абдилдің айтуынша, бұл сөздер айыпталушылардың өзге де қылмыстарға қатысы бар-жоғын анықтау үшін қосымша тергеу жүргізуге себеп болуы мүмкін.

    “Біз соттан қосымша тергеу жүргізу туралы жеке қаулы шығаруды сұраймыз”, — деді ол.

    Жәбірленуші тарап айыпталушыларға өмір бойы бас бостандығынан айыру жазасын тағайындауды талап етуде.

    Ажар Абдил тергеу тобының кәсіби жұмысын ерекше атап өтті:

    “Тергеуші дәлелдерді мінсіз жинады, тіпті өшірілген хат алмасуларды да қалпына келтірді. Бұл — тергеу мен соттың үйлесімді жұмысының нәтижесі”, — деді ол.

    Тергеу мәліметінше, Яна 2024 жылдың 18 қазанында танысының қоңырауынан кейін үйінен шығып кеткен. Курткасын алмаған — тез ораламын деп ойлаған. Алайда сол күні ол із-түзсіз жоғалып кеткен.

  • Қаржы мониторингі агенттігі: Жанабыловтар әкімшілік жауапкершіліктен бас тартып, істі сотқа жеткізген

    Қаржы мониторингі агенттігі: Жанабыловтар әкімшілік жауапкершіліктен бас тартып, істі сотқа жеткізген

    Ерболат Жанабылов пен Эльмира Толегеноваға қатысты қозғалған қылмыстық іс бойынша блогерлерге екі жылға дейін бас бостандығынан айырылу жазасы тағайындалуы мүмкін.
    Алайда Қаржы мониторингі агенттігі өкілдері мұндай жағдайдың алдын алуға болатынын айтты, деп хабарлайды Sona.kz Tengrinews.kz-ке сілтеме жасап.

    Бұған дейін агенттік 37-ден астам блогердің ісін әкімшілік жауапкершілікке тарту үшін уәкілетті органдарға жолдаған. Бірақ Жанабыловтардың ісі ерекше сипат алып, қылмыстық тергеуге ұласқан.

    Агенттік төрағасының орынбасары Жеңіс Елемесов Сенаттағы брифингте түсіндірме берді:

    «Әкімшілік құқықбұзушылық туралы кодекске сәйкес, егер азамат әкімшілік жазаға келіспесе және өтініш білдірсе, іс сотқа жолданады. Бұл жағдайда сот қылмыстық құқықбұзушылық белгілерін анықтап, істі Экономикалық тергеу департаментіне жіберді», — деді ол.

    Қазір ерлі-зайыптыларға қатысты Қылмыстық кодекстің 214-бабының 1-бөлігі бойынша — «Заңсыз банктік немесе микроқаржылық қызмет» бабымен іс қозғалды.
    Аталған бап бойынша 2000 айлық есептік көрсеткішке дейін айыппұл, түзету немесе қоғамдық жұмыстар, не екі жылға дейінгі бас бостандығынан айыру жазасы қарастырылған.

    Қаржы мониторингі агенттігі бұл істі онлайн-кәсіппен айналысатын өзге блогерлер үшін сабақ болуы тиіс деп атап өтті.

  • Атырауда Яна Легкодимованың өліміне қатысты сот отырысы жалғасуда: айыпталушылардың жазысқан хаты қоғамды дүр сілкіндірді

    Атырауда Яна Легкодимованың өліміне қатысты сот отырысы жалғасуда: айыпталушылардың жазысқан хаты қоғамды дүр сілкіндірді

    Атырау қаласында 23 жастағы Яна Легкодимованың өліміне қатысты сот процесі өтіп жатыр, деп хабарлайды Sona.kz Halyqstan-ға  сілтеме жасап.

    Сотта айыпталушылар — Ризуан Хайржанов пен Алтынбек Катимовтың арасындағы хат алмасу оқылды. Тергеу дерегінше, олар қылмысты алдын ала жоспарлап, мәйіттен қалай құтылуды талқылаған. Хабарламаларда салқынқанды сөздер мен күлкі белгілері кездескен.

    2024 жылдың 18 қазанында Яна Хайржановтың көлігінде тұншықтырылып өлтірілген. Катимов есікті ұстап, қыздың шығуына жол бермеген. Кейін олар мәйітті Талдыкөл маңындағы өзенге тастаған. Сүйегі 2025 жылдың маусымында табылды.

    Қылмыстың себебі — айыпталушының әшкереленуден қорқуы. Яна оның басқа қызбен кездесіп жүргенін білген.
    Хат алмасуда «Біз бұдан да сорақы істер істегенбіз» деген жол бар, бұл өзге зорлық істерінің болуы мүмкін екенін көрсетеді.

    Тергеу барысында күдіктілердің прокурорға пара беруді ойлағаны да анықталған. Катимовтың әкесі — бұрынғы полиция қызметкері, ал Хайржановтың туысы — аудандық әкімдікте жұмыс істейді.

    Яна — жалғыз перзент, үздік студент, болашағынан үміт күттірген жас ғалым болған. Істі судья Зарема Хамидуллина қарап жатыр.

  • Қазақстанда кәмелетке толмағандарды «алып қашу» бойынша алғашқы қылмыстық істер қозғалды

    Қазақстанда кәмелетке толмағандарды «алып қашу» бойынша алғашқы қылмыстық істер қозғалды

    Қазақстанда алғаш рет «алып қашу» — яғни, қызды еріксіз некеге мәжбүрлеу деректері бойынша қылмыстық істер тіркелді, деп хабарлайды Sona.kz Hola.news-ке сілтеме жасап. Оқиғалар Шымкент қаласы мен Қызылорда облысында болған. Жәбірленушілер — кәмелетке толмаған қыздар.

    2025 жылдың қыркүйегінен бастап елде жаңартылған Қылмыстық кодекс күшіне енген. Енді «алып қашу» үшін екі жылға дейін бас бостандығынан айыру жазасы қарастырылған. Егер бұл әрекет ауыр зардаптарға әкелсе, жаза мерзімі он жылға дейін ұлғаяды.

    Қазіргі таңда істер прокуратураның бақылауында. Жәбірленушілерге психологиялық және құқықтық көмек көрсетіліп жатыр.

  • Алматыда “Дикий Арманның” ісі бойынша аппеляциялық сот басталды

    Алматыда “Дикий Арманның” ісі бойынша аппеляциялық сот басталды

    14 қазан күні Алматыда 2022 жылғы Қаңтар оқиғаларына қатысты іс бойынша апелляциялық сот отырысы басталды. Фигуранттардың бірі — “Дикий Арман” атанған Арман Жұмагелдиев, деп хабарлайды Sona.kz Tengrinews.kz-ке сілтеме жасап.

    Қалалық сотта өтіп жатқан тыңдау жабық режимде ұйымдастырылды — БАҚ өкілдері мен тыңдармандар қатыстырылған жоқ. Апелляциялық шағымдарды сотталғандар, соның ішінде Арман Жұмагелдиевтің өзі де түсірген. Ол үкімнің қайта қаралуын сұрап отыр.

    Еске салайық, 2025 жылғы 27 қаңтарда сот Арман Жұмагелдиевті қылмыстық топ құрғаны, жаппай тәртіпсіздіктерге қатысқаны және 24 адамды ұрлағаны үшін кінәлі деп танып, 20 жылға бас бостандығынан айырған болатын.

    Сонымен қатар, Алматы қалалық мәслихатының бұрынғы депутаты Қайрат Құдайберген 8 жылға, ал ҰҚК-нің 5-басқармасының экс-басшысы Руслан Искаков 15 жыл 6 айға сотталып, өмір бойына мемлекеттік қызметте жұмыс істеу құқығынан айырылған.

    Дикий Арманның ұйымдасқан тобының 13 мүшесіне 10 жылдан 15 жыл 6 айға дейін жаза тағайындалды. Ал өзге қатысушыларға 1,5 жылдан 7 жылға дейінгі мерзім берілді. Кейбірі сот залынан босатылды — тергеу абақтысында өткізген уақыты жазасына есептелді.

    Апелляциялық сот отырыстары алдағы күндері жалғасады.

  • Қарағандыда Threads желісінде жазба жариялағаны үшін 22 жастағы Алика Мұхамадиева сот алдында жауап беруде

    Қарағандыда Threads желісінде жазба жариялағаны үшін 22 жастағы Алика Мұхамадиева сот алдында жауап беруде

    Қарағандыда 22 жастағы Алика Мұхамадиеваға қатысты сот процесі басталды. Ол әлеуметтік және ұлттық алауыздықты қоздырды деген айыппен жауапқа тартылуда, деп хабарлайды Sona.kz Tengrinews.kz-ке сілтеме жасап.

    Қылмыстық іс Қазыбек би аудандық сотында қаралуда. Отырысты судья Арғын Құтышев жүргізіп отыр. Айыпталушыға Қазақстан Республикасының Қылмыстық кодексінің 174-бабы, 1-бөлігі бойынша («Әлеуметтік, ұлттық, рулық, нәсілдік немесе діни алауыздықты қоздыру») айып тағылған.

    Сот отырысы ашық форматта өтуде. Алайда Мұхамадиева мен оның қорғаушысы журналистерге айыпталушының жүзін фото және бейнежазбаға түсірмеу туралы өтініш білдірген. Судья бұл өтінішті қанағаттандырды. Прокурор Фарида Сәдуова процесті жабық өткізуді сұрағанымен, сот бұл ұсынысты қабылдамады.

    Соттың мәліметінше, Алика Мұхамадиева — жүк жеткізу және киім дүкені бизнесін жүргізетін кәсіпкер. 2025 жылдың жазында ол Threads әлеуметтік желісінде жазған пікірлерінен кейін қоғам назарын аударған.

    Айыпталушы сотта кінәсін толық мойындап, өкініш білдіріп, халықтан кешірім сұрады. Қорғаушысы істі қысқартылған тәртіпте қарауды сұрады.

    Бұған дейін Мұхамадиева өзінің сөздері контекстен үзіп алынғанын және ешкімнің намысына тию ниеті болмағанын айтқан еді. Қазір ол қамауда отыр, іс бойынша тергеу жалғасуда.

  • Блогер Ерболат Жанабылов пен жұбайының ісі бойынша апелляция қанағаттандырылмады

    Блогер Ерболат Жанабылов пен жұбайының ісі бойынша апелляция қанағаттандырылмады

    Апелляциялық сот блогер Ерболат Жанабылов пен оның жұбайы Эльмира Толегеноваға қатысты шешімді өзгеріссіз қалдырды, деп хабарлайды Sona.kz Kazinform-ға сілтеме жасап.

    Қорғаушы тарап істі тоқтату туралы шешімнің негізсіз екенін айтты. Адвокат Олег Черновтың мәлімдеуінше, сот Жанабыловтың әрекетінде Қылмыстық кодекстің 214-бабы (заңсыз кәсіпкерлік қызмет) бойынша ешқандай нақты белгі таппаған.

    Алайда апелляциялық алқа бірінші сатыдағы соттың шешімін күшінде қалдырды. Сот төрағасы Жанна Нұрғалиева Жанабылов өткізген іс-шараларда лотерея белгілері бар екенін, сондай-ақ қатысу құны мен қатысушылар саны нақты анықталмағанын айтты.

    Эльмира Толегенованың да шағымы қанағаттандырылмады.

    Еске салайық, бұл іс блогердің 10 автокөлік ойнатуы салдарынан қозғалған еді. Тексеру барысында Ойын бизнесі мен лотереяны реттеу комитеті Жанабыловтар сатқан курстардың мазмұны формалды болғанын және 30 мың теңгелік бағасы негізсіз жоғары екенін анықтаған.

    Туризм және спорт министрі бұған дейін басқа блогерлерге де қатысты тексерістер жүріп жатқанын, бірақ олардың есімдері әзірге жарияланбайтынын мәлімдеген болатын.

  • Яна Легкодимованың өлімі: айыпталушылар «мінсіз қылмыс» жасауды жоспарлаған

    Яна Легкодимованың өлімі: айыпталушылар «мінсіз қылмыс» жасауды жоспарлаған

    Атырау облысында 23 жастағы Яна Легкодимованың өліміне қатысты сот процесі жалғасып жатыр. Айыпталушылар орындығында — Ризуан Хайржанов пен Алтынбек Катимов. Сотта прокурор олардың қылмысты алдын ала жоспарлап, із жоймақ болғанын мәлімдеді, деп хабарлайды Sona.kz «НеМолчи.KZ»  сілтеме жасап.

    Тергеу деректеріне сүйенсек, айыпталушылар хат алмасу барысында қылмысты егжей-тегжейлі талқылаған: қызды қай жерде өлтіретіні, дәлелдерді қалай жоятындары және мәйітті қайда тастайтыны. Барлығы “мінсіз” өтуі керек болған — куәгерсіз, айғақсыз.

    Алайда бұл жоспар іске аспады. Янаның анасы Галина қызынан күдіктеніп, іздеуді өздігінен бастаған. Ол үстел үстінен қызының күнделігін тапқан — Яна оны өлерінен алты күн бұрын бастаған. Бұл жазбалар тергеуге айыпталушыларға шығуға көмектесті.

    Тергеу өшірілген WhatsApp пен “ВКонтакте” хаттарын қалпына келтіріп, сотта прокурор сол деректерді оқыды. Материалдарға сәйкес, Ризуан Хайржанов қызды көлікте тұншықтырған, ал Алтынбек Катимов есікті ұстап тұрған. Кейін олар мәйітті Талдыколь ауылы маңындағы Жайық өзеніне тастаған.

    Қоғамдық «НеМолчи.KZ» қоры айыпталушыларға өмір бойы бас бостандығынан айыру жазасын талап етуде. Қордың айтуынша, бұл — ерекше қатыгездікпен жасалған фемицид.