Маңғыстау облысының Бейнеу ауылында болған жаппай төбелес жасөспірімнің қазасына әкелді, деп хабарлайды Sona.kz Lada.kz-ке сілтеме жасап.
Облыстық прокуратураның мәліметінше, төбелес кезінде 17 жастағы бозбала автокөліктің астына түсіп қалған. Көлікті жүргізген азамат қаза тапқан жігіттің өз ортасынан болған.
«Оқиға төбелес аяқталған кезде орын алды. Жастар жан-жаққа қаша бастағанда, марқұм көлік астында қалды. Қазіргі уақытта Бейнеу ауданының 15 жасөспіріміне қатысты Қылмыстық кодекстің “Ауыр дене жарақатын салу” және “Бұзақылық” баптары бойынша сотқа дейінгі тергеу жүргізілуде. Арнайы сараптама тағайындалды. Оның қорытындысы бойынша қайтыс болған баланың өлімі төбелестен алған соққыдан ба, әлде көлік соққысынан ба анықталады», — деді Маңғыстау облысы прокуратурасының басқарма бастығы Данияр Төлегенов.
Тергеу аясында төрт жасөспірім қамауға алынса, 11-іне үйқамақ шарасы қолданылған. Бұдан бөлек, 18 тамызда прокуратураға ұсталғандардың ата-аналары арыз түсіріп, балаларын полиция қызметкерлері азаптағанын мәлімдеген. Бұл дерек бойынша ҚР ҚК-нің 106-бабы («Азаптау») бойынша іс қозғалып, тиісті сараптамалар жүргізіліп жатыр.
Айта кетейік, тамыз айында Бейнеу ауылында болған қақтығыс кезінде бір жас жігіт алған жарақатынан көз жұмған еді.
