Абай облысының Аягөз ауданында ерекше қажеттілігі бар балаларға физикалық және психологиялық зорлық көрсетудің 100-ден астам дерегі анықталды. Заңбұзушылықтар арнайы әлеуметтік қызметтер көрсету орталығында болған, деп хабарлайды SONA.KZ Syrmedia.kz басылымына сілтеме жасап.
Прокуратура тексерісінің нәтижесіне сәйкес, мекеме санитарлары балалардың дәрменсіз жағдайын пайдаланып, оларға жүйелі түрде қатыгездік көрсеткен.
Орталықтың кейбір қызметкерлері мұндай әрекеттерді көргенімен, араша түспеген және тәрбиеленушілерді қорғау үшін шара қолданбаған.
Анықталған деректер бойынша кәмелетке толмағандарды тәрбиелеу жөніндегі міндеттерді тиісінше орындамау бабымен сотқа дейінгі тергеп-тексеру басталды.
Заңбұзушылықтарға қатысы болуы мүмкін қызметкерлер жұмысынан шеттетіліп, олардың балалармен байланысына шектеу қойылды.
Зардап шеккен балалардың нақты саны мен іс бойынша тергеліп жатқан қызметкерлердің саны әзірге жарияланған жоқ.
Тергеу жалғасып жатыр. Күдіктілердің әрекетіне түпкілікті құқықтық баға тергеу нәтижесі бойынша беріледі.
