22 жастағы Ақнар Гүлстанның өліміне қатысты іс Ұлттық қауіпсіздік комитетіне берілді, деп хабарлайды Sona.kz Tengrinews.kz-ке сілтеме жасап.
Алматыдағы қайғылы оқиға
2024 жылдың мамырында Ақнар көпқабатты үйдің терезесінен құлап, қаза тапқан. Туыстары өзіне қол жұмсады деген нұсқаға сенбейді. Анасы Қамит Гүлстанның айтуынша, қызы азапталып, соққыға жығылған.
Сараптама қорытындысы бойынша, марқұмның денесінен жарақат іздері, тістелген және тырналған жерлер, сынған тырнақтар мен жұлынып қалған шаштар табылған. Анасы бұл дәлелдерді фото және видео түрінде ұсынған.
Іс бірнеше мәрте ведомство ауыстырды
Алғашында істі полиция, кейін Антикор, енді ҰҚК қарауда.
Құқық қорғаушы Инга Иманбайдың айтуынша, жәбірленуші тарап полицияға сенімсіздік білдіріп, Бас прокуратура істі арнайы топқа тапсырған.
ҰҚК істің жалғасып жатқанын растады, алайда қылмыстық бап әзірге жария етілмеген.
«Істің сотқа қашан және қандай баппен жіберілетіні әзір белгісіз», — деді Иманбай.
Құрбылары не дейді?
Оқиға кезінде қасында болған қыздар Ақнардың күйзеліс жағдайында болғанын айтады.
Дидар есімді құрбысының қорғаушысы Жандос Палманов бейнежазба ұсынған: онда Ақнар би билеп, кейін жылап тұр.
Оның айтуынша, қыздар оны жұбатуға тырысқан, бірақ арада жанжал туындап, Ақнар терезеден құлап кеткен.
Іс тергелу үстінде.
