Қазақстанның Ұлттық қауіпсіздік комитеті Қытайдың Қоғамдық қауіпсіздік министрлігімен бірлесіп, халықаралық интернет-алаяқтыққа қарсы арнайы операция жүргізді. Нәтижесінде Қытай Халық Республикасының 13 азаматы ұсталды, деп хабарлайды SONA.KZ ҰҚК мәліметіне сілтеме жасап.
Ведомствоның хабарлауынша, шетелдіктер Қазақстан аумағында жасырын түрде жұмыс істеген халықаралық интернет-алаяқтық схемасын ұйымдастырған.
Күдіктілердің әрекеттері Қазақстан азаматтарына емес, басқа мемлекеттердің тұрғындарына бағытталған.
«Топтың әрекеттері Қазақстан Республикасының резиденттері болып саналмайтын басқа елдердің азаматтарының мүдделеріне қарсы бағытталған және шетелден үйлестірілген», — делінген ҰҚК хабарламасында.
Осылайша, арнайы қызмет мәліметінше, Қазақстан аумағы заңсыз әрекеттерді ұйымдастыру үшін пайдаланылған, ал күдіктілердің қызметі шетелден басқарылған.
Бірлескен арнайы операцияның нәтижесінде ұсталған Қытайдың 13 азаматы Қазақстаннан шығарылып, ҚХР құқық қорғау органдарына тапсырылды.
Алаяқтық схемасының нақты қалай жұмыс істегені, келтірілген шығын көлемі, зардап шеккендердің саны және олардың қай елдердің азаматтары екені туралы қосымша ақпарат жарияланған жоқ.
