«Алтын глобус» сыйлығын табыстау рәсімінде киноиндустрияның бірқатар өкілдері АҚШ-тың Иммиграция және кеден қызметінің (ICE) қызметіне қарсы наразылық білдіретін белгішелермен көрінді. Бұл туралы Sona.kz Kazinform-ға сілтеме жасап хабарлайды.
Қара-ақ түсті «Be Good» және «ICE OUT» деген жазуы бар белгішелерді салтанатты кештің қызыл кілемінде бірнеше қатысушы, соның ішінде актер Марк Руффало таққан. Бұл акция рәсімге саяси сипат берді. Айта кетейік, өткен жылы марапаттау кеші айқын саяси мәлімдемелерсіз өткен болатын.
Акция Миннеаполис қаласында өз көлігінде оққа ұшып қаза тапқан Рене Гудтың өліміне байланысты ұйымдастырылған. Осы оқиғадан кейін АҚШ-тың бірқатар қалаларында оның өліміне қатысты әділ тергеу жүргізуді талап еткен наразылық шерулері өтті. Кейбір акциялар кезінде полициямен қақтығыстар тіркелген. Сонымен қатар Портленд қаласында шекара қызметі қызметкерлерінің атыс қолдануы салдарынан екі адамның жараланғаны хабарланды.
Working Families Power ұйымының өкілі Нелини Стамптың айтуынша, өнер және мәдениет өкілдерінің азаматтық бастамаларға қатысуы қоғам назарын әлеуметтік мәселелерге аударуға ықпал етеді.
«ICE OUT» белгішелерін тарату идеясы белсенділер Нелини Стамп пен Maremoto құқық қорғау ұйымының атқарушы директоры Джесс Моралес Рокетто арасындағы талқылаулар барысында пайда болғаны айтылды. Ұйымдастырушылар ірі мәдени шаралар миллиондаған көрерменге маңызды әлеуметтік тақырыптарды жеткізуге мүмкіндік береді деп есептейді.
Лос-Анджелестегі Beverly Hilton қонақүйінде өтіп жатқан «Алтын глобус» сыйлығының 83-рәсімінің тікелей көрсетілімі CBS телеарнасы мен Paramount+ стримингтік платформасында жүргізілуде.
