19 қаңтарда италиялық әйгілі дизайнер, Valentino сән үйінің негізін қалаушы Валентино Гаравани 93 жасқа қараған шағында дүниеден өтті. Ол Римдегі өз резиденциясында, жақындарының ортасында көз жұмған.
Қоштасу рәсімі 21 және 22 қаңтар күндері өтеді. Ал жерлеу рәсімі 23 қаңтарда сағат 11:00-де Рим қаласындағы Санта-Мария-дельи-Анджели-э-дей-Мартири базиликасында ұйымдастырылады.
Валентино Гаравани 1932 жылы Италияда дүниеге келген, кәсіби білімін Францияда алған. 1960 жылы ол Джанкарло Джамметтимен бірге Римде Valentino сән үйін құрды. Бренд әлемге талғампаз кешкі көйлектерімен және қызыл кілемге арналған образдарымен танылды.
Дизайнер көптеген әлемдік жұлдыздарға киім тіккен. Олардың қатарында Жаклин Кеннеди, Одри Хепбёрн, Элизабет Тейлор, Софи Лорен, Диана ханшайым, Наоми Кэмпбелл және басқа да танымал тұлғалар бар.
