Павлодар қаласында Республикалық жеке сот орындаушылары палатасының өңірлік филиалының басшысы ұсталды. 41 жастағы ер адам 21 ақпанға қараған түні кроссовер тізгінінде тоқтатылған.
Тексеру барысында оның орта дәрежедегі алкогольдік масаң күйде болғаны анықталған. Бұл факт медициналық куәландырумен расталды.
Сот отырысында ер адам кінәсін мойындаған. Оның айтуынша, жолға шығар алдында көп мөлшерде қымыз ішкен.
Іс Павлодар қаласының мамандандырылған ауданаралық әкімшілік құқық бұзушылықтар жөніндегі сотында қаралды.
Сот оны Әкімшілік құқық бұзушылық туралы кодекстің 608-бабы бойынша кінәлі деп таныды.
Сот қаулысымен оған 15 тәулікке әкімшілік қамау жазасы тағайындалып, 7 жыл мерзімге көлік құралын басқару құқығынан айырылды.
Қаулының заңды күшіне енген-енбегені туралы ақпарат нақтыланбады.
