Мемлекеттік қызметтен таксиге: Талғардың бұрынғы басшысы желіде трендке айналды

Талғар қаласының бұрынғы әкімі Арыстанбек Әбілқайырұлы қызметінен кеткеннен кейін такси жүргізушісі болып жұмыс істеп жүр. Бұл туралы экс-шенеуніктің өзі берген сұхбатында мәлімдеді. Оның айтуынша, қазіргі уақытта ол автокөлікті жалға алып, нәпақасын тауып жүр.
Бұрынғы қала басшысы өз таңдауын отбасылық жағдайымен түсіндірді. «Үйде әрекетсіз отыруға болмайды, отбасымды асырауым керек. Сондықтан таңғы үшке дейін жұмыс істеймін. Күнделікті жоспар бойынша 18 500 теңге төлеуім қажет», — деп атап өтті ол.
Еске сала кетейік, Талғар қаласының әкімі лауазымынан шамамен бір ай бұрын босатылған болатын. Ресми мәлімет бойынша, оның қызметтен кетуіне денсаулық жағдайы себеп болған. Ол әкімдік тізгінінде жүргенде әлеуметтік желілерде, атап айтқанда TikTok-та белсенділігімен танымал болды.
Сұхбат барысында экс-әкім өзінің кәсіби тәжірибесіне де тоқталды. Ол мемлекеттік қызметке қайта оралу мүмкіндігін жоққа шығармайды. Егер тиісті ұсыныс түсіп, денсаулығы мүмкіндік берсе, ел игілігі үшін жұмыс істеуге дайын екенін жеткізді.
Айта кету керек, Талғар қаласы әкімдігіндегі ауыс-түйістер соңғы уақытта қоғам назарында. Арыстанбек Әбілқайырұлының отставкасы аймақтағы бірқатар кадрлық өзгерістермен тұспа-тұс келді. Қазіргі уақытта қала әкімінің міндетін басқа тұлға атқаруда.
Желі қолданушылары бұрынғы шенеуніктің бұл әрекетін түрліше қабылдады. Кейбіреулер оның еңбекқорлығын қолдаса, енді бірі бұл жағдайды мемлекеттік қызметкерлердің әлеуметтік кепілдіктерімен байланыстыруда.