Құрылтай депутаты Юрий Ли азаматтарға қарыз беретін платформалардың қызметін тексеруді сұрады. Ол Alem Credit-ке қатысты түсіп жатқан шағымдарға ерекше назар аударды.
Депутат Ішкі істер министрлігіне, Бас прокуратураға және Қаржылық мониторинг агенттігіне жүгінді.
Юрий Лидің айтуынша, азаматтардан ақша алу шарттары мен кейін қарызды өндіріп алу тәсілдеріне байланысты шағымдар түсіп жатыр.
Депутат мысал ретінде бір қарыз алушының жағдайын келтірді.
Оның сөзінше, азамат 50 мың теңге қарыз рәсімдеген. Алайда оның шотына іс жүзінде 32 мың теңге ғана аударылған.
Кейін одан 752 мың теңге қайтару талап етілген.
Егер талап етілген соманы адамның нақты алған 32 мың теңгесімен салыстырсақ, айырмашылық шамамен 23,5 есеге жетеді.
Депутат қарызды өндіріп алу тәсілдеріне байланысты да шағымдар барын мәлімдеді.
Оның айтуынша, мұндай сервистердің өкілдері қарыз алушылардың туыстарына қоңырау шалып, жұмыс берушілеріне хабарласып, психологиялық қысым көрсетуі мүмкін.
Юрий Ли жасанды интеллект арқылы қорқыту фактілері туралы шағымдарға да тоқталды.
Депутаттың сөзінше, ИИ көмегімен адамның беделіне нұқсан келтіретін жалған суреттер жасалып, оларды борышкердің туыстарына, әріптестеріне немесе таныстарына таратамыз деген қоқан-лоқы көрсетілген жағдайлар айтылған.
«Бұл енді несие беруші мен қарыз алушының арасындағы жеке дау ғана емес», — деді Юрий Ли.
Оның пікірінше, құқық қорғау және қадағалау органдары мұндай әрекеттерге құқықтық баға беріп, осындай тәсілмен жұмыс істейтін платформалардың қызметін тексеруі керек.
Alem Credit бұған дейін де құқық қорғау органдарының назарына іліккен.
2026 жылғы тамызда платформа қызметіне байланысты қылмыстық іс қозғалғаны хабарланған. Тергеуді Алматы қаласы бойынша Экономикалық тергеп-тексеру департаменті жүргізіп жатыр.
Alem Credit өз қызметін кәдімгі микрокредит беру ретінде сипаттамайды. Компания пайдаланушыларға цифрлық активтерге, соның ішінде USDT-ге қол жеткізу мүмкіндігін беретінін мәлімдейді.
Сондықтан платформаның нақты құқықтық моделі, қаражат ұсыну шарттары және қарызды өндіріп алу тәсілдері құзырлы органдардың тексеру нысаны болуы тиіс.
Заң бұзушылықтардың болған-болмағаны және нақты тұлғалардың жауапкершілігі жөніндегі түпкілікті қорытынды тергеу мен сот нәтижесінде ғана жасалады.
