2022 жылдан бері халықаралық іздеуде жүрген The Finiko құрылымдық бөлімшесінің басшысы Түркиядан Қазақстанға қайтарылды.
Операцияны қаржылық мониторинг қызметкерлері Ұлттық орталық Интерпол бюросымен бірлесіп, прокуратура органдарының үйлестіруімен жүргізген.
Тергеу нұсқасы бойынша, The Finiko нақты кәсіпкерлік немесе инвестициялық қызметпен айналыспаған.
Бұрын тартылған қатысушыларға төлем жаңа салымшылардан түскен ақша есебінен жүргізілген. Осылайша жоба табыс әкеліп жатқандай көрініс қалыптастырып, жаңа азаматтардың қаражатын тартуды жалғастырған.
Тергеу мәліметінше, күдіктінің әрекеті нәтижесінде қаржы пирамидасына салымшылардың 160 млн теңгеден астам қаражаты тартылған.
Бұл соманы күдіктіден тәркіленген мүліктің құнымен шатастырмау қажет.
Сотқа дейінгі тәркілеу аясында күдіктіге тиесілі құны 221 млн теңге болатын жер телімі мемлекет кірісіне өткізілген.
Осы қылмыстық іс бойынша бұған дейін тағы үш фигурант сотталған. Оларға мүлкін тәркілей отырып, алты жылға дейін бас бостандығынан айыру жазасы тағайындалған.
Түркиядан қайтарылған күдіктіге қатысты тергеу жалғасып жатыр.
The Finiko-ға қатысты Қазақстандағы тергеу бірнеше жыл бұрын басталған.
2021 жылғы шілдеде Алматыда қаржы пирамидасын құру және оған басшылық ету дерегі бойынша қылмыстық іс қозғалған.
Жобаға қатысушыларға жоғары табыс уәде етіліп, ақша салу ұсынылған. Алайда жүйеде қолданылған инвестициялық платформа әлемдік биржаларда нақты сауда жасайтын алаң болмаған.
Кейін Алматыдағы іс бойынша 300-ден астам адам арызданған. Сол кездегі тергеу дерегінде ұйымдастырушылар тартқан қаражат көлемі шамамен 1,8 млн доллар және 630 млн теңгеден астам болғаны айтылған.
Ал қазіргі іс бойынша көрсетілген 160 млн теңгеден астам қаражат Түркиядан қайтарылған күдіктінің әрекетіне қатысты. Бұл The Finiko-ның Қазақстандағы барлық құрылымдары арқылы өткен қаражаттың жалпы көлемін білдірмейді.
Тергеудің өзге деректері әзірге жарияланбайды.
Заңға сәйкес, күдіктінің кінәсі соттың заңды күшіне енген үкімімен дәлелденгенге дейін ол кінәсіз деп есептеледі.
