Жаңаөзен әкімінің бұрынғы орынбасары қалалық аурухананы жабдықтауға бөлінген демеушілік қаражатты жымқыруы мүмкін деген іс бойынша күдікке ілінді.
Қаржылық мониторинг агенттігінің мәліметінше, 2025 жылы Маңғыстау облысының Денсаулық сақтау басқармасы Жаңаөзен көпбейінді қалалық ауруханасында мамандандырылған күйік бөлімін ашуға қаржылай қолдау көрсету туралы «ҚазМұнайГазға» өтініш жасаған.
Жобаны іске асыруға 223 млн теңге бөлінген. Қаражат «ӨзенМұнайГаз» арқылы «Жарылқау» қоғамдық қорына аударылған.
Бастапқы жоспар бойынша сегіз түрлі медициналық жабдық сатып алынып, мамандарды оқыту көзделген.
Алайда тергеу дерегінше, кейін жобаның шарттары өзгертілген.
«Жарылқау» қоры, қалалық аурухана және AKBS Invest компаниясы тек екі арнайы күйікке қарсы төсек жеткізу жөнінде шарт жасасқан. Келісімнің жалпы құны 210 млн теңге болған.
ҚМА нұсқасы бойынша, медициналық жабдықты нақты сатып алуға 92 млн теңге ғана жұмсалған.
Тергеу қалған қаражат аффилирленген компаниялар арқылы қолма-қол ақшаға айналдырылып, кейін ықтимал схемаға қатысушылар арасында бөлінген болуы мүмкін деп есептейді.
Күдіктілер қатарында Жаңаөзен көпбейінді қалалық ауруханасы директорының орынбасары, «Жарылқау» қоғамдық қорының басшысы, Жаңаөзен әкімінің бұрынғы орынбасары және жабдықтаушы компанияның өкілі бар.
Тергеу мәліметінше, AKBS Invest өкілі алынған қаражаттың бір бөлігіне Астанадан пәтер сатып алып, оны үшінші тұлғалардың атына рәсімдеген болуы мүмкін.
Үш күдікті қамауға алынған.
Тергеу аясында фигуранттардың мүлкіне тыйым салынды. Олардың қатарында екі пәтер, екі тұрғын үй және бір автокөлік бар.
Сонымен қатар Жаңаөзен әкімінің бұрынғы орынбасарына қатысты лауазымдық өкілеттіктерін теріс пайдалану дерегі бойынша бөлек тергеу жүргізіліп жатыр.
Сотқа дейінгі тергеу жалғасуда.
Күдіктілердің әрекетіне түпкілікті құқықтық баға тергеу мен сот қорытындысы бойынша беріледі. Заңға сәйкес, олардың кінәсі соттың заңды күшіне енген үкімімен дәлелденгенге дейін олар кінәсіз деп есептеледі.
