Қазақстан Премьер-министрі Олжас Бектенов Семей қаласының жылу желілерін уақытында дайындамағаны үшін Абай облысы әкімінің осы салаға жауапты орынбасарын тәртіптік жауапкершілікке тартуды тапсырды.
Премьер-министр бұл тапсырманы 6 қазанда өткен Үкімет отырысында берген.
Бұған дейін өңірлерге жылу көздері мен желілерін 1 қазанға дейін толық дайындау тапсырылған. Бектеновтің айтуынша, белгіленген мерзімді бір өңірден басқасының барлығы сақтаған.
Премьер-министр Семей қаласының жылу желілерін уақытында дайындамау және тиісті үйлестіру жұмыстарының болмауына байланысты Абай облысы әкімінің жауапты орынбасарын тәртіптік жауапкершілікке тартуды тапсырды.
Семейдегі жағдай бұған дейін де Үкіметтің ерекше бақылауында болған. 22 қыркүйекте Бектенов Семей, Степногорск және Петропавл қалаларында жылуды іске қосуға ерекше назар аударуды тапсырған еді.
29 қыркүйектегі мәлімет бойынша Семейдегі үш жоба бойынша жұмыстардың жалпы дайындығы 82 пайызды құраған. Сол кезде Абай облысының әкімдігіне жөндеу жұмыстарын барынша қысқа мерзімде аяқтау тапсырылды.
6 қазандағы Үкімет отырысында Бектенов өңір әкімдеріне жылыту маусымын бақылау жөніндегі штабтардың жұмысын қайта жандандыруды да тапсырды. Әкімдіктер жылу көздері мен желілердің жағдайын тұрақты тексеріп, нормативтік отын қорын және резервтік жабдықтардың дайындығын бақылауға тиіс.
Сонымен қатар халыққа арналған көмірдің жеткілікті болуы мен бағаның тұрақтылығын бақылау тапсырылды.
Үкімет мәліметінше, қазір еліміздің 11 өңірінде жылыту маусымы басталды. Оңтүстік және батыс өңірлерде жылу кесте мен ауа райына қарай қосылады.
