Непал мен Тибеттегі табиғи апаттан кейін із-түзсіз жоғалды деп есептелген үш қазақстандық әйелдің бірі Қазақстанда екені анықталды. Ол сапардан бас тартып, апат аймағына мүлде бармаған.
Бұл туралы Қазақстан Сыртқы істер министрлігінің өкілі Жанболат Үсенов мәлімдеді, деп хабарлайды Sona.kz ZTB Kazakhstan-ға сілтеме жасап.
Бұған дейін ведомство жойқын су тасқынынан кейін үш қазақстандық туристпен байланыс үзілгенін хабарлаған. Алдын ала мәлімет бойынша, олардың екеуі Непалда, біреуі Тибетте болуы мүмкін еді.
Кейін әйелдердің бірі сапарға шықпағаны және Қазақстанда жүргені белгілі болды.
Ал қалған екі қазақстандықтың қайда екені әлі белгісіз.
СІМ мәліметінше, жоғалған әйелдердің туыстары ДНҚ үлгілерін тапсырған. Олар табылған мәйіт қалдықтарының кімге тиесілі екенін анықтау қажет болған жағдайда генетикалық сараптама жасау үшін пайдаланылады.
Непалда іздеу-құтқару операциясы 5 қазанда аяқталды. Қазір мамандар апат салдарын жоюмен айналысып, табылған мәйіт қалдықтары мен жеке заттарды сәйкестендіру жұмыстарын жүргізіп жатыр.
Ал Қытайдың Тибет аймағында, соның ішінде қатты зардап шеккен Гьиронг уезінде іздестіру жалғасуда.
Жарияланған мәліметтерде табиғи апаттан кейін кемінде 5 285 адамның із-түзсіз жоғалғаны айтылған. Алайда бұл санның нақты қай аумаққа қатысты екені мен бастапқы дереккөзі қосымша тексеруді қажет етеді.
Қазақстанның Сыртқы істер министрлігі жоғалған әйелдердің отбасыларымен байланысын үзбей, қажетті көмек көрсетіп жатқанын мәлімдеді.
