Павлодардағы түзеу мекемелерінің бірінен Sony PlayStation ойын приставкасы, смартфондар және интернетке қосылуға арналған құрылғылар табылды. Прокуратура бұл дерек бойынша сотқа дейінгі тергеу бастады.
Тексеру барысында прокурорлар мекеме ішіндегі бөлмелердің бірінен пайдалануға тыйым салынған техникаларды анықтаған, деп хабарлайды Sona.kz БАҚ-на сілтеме жасап.
Атап айтқанда, 15 смартфон, алты Wi-Fi роутер, Sony PlayStation ойын приставкасы, құлаққаптар, флеш-жинақтауыштар және USB кабельдер тәркіленді.
Бұл құрылғылардың түзеу мекемесіне қалай жеткізілгені және оларды пайдалануға кімнің мүмкіндік бергені әзірге белгісіз.
Аталған факті бойынша «Салғырттық» бабымен сотқа дейінгі тергеу басталды. Қазір оқиғаның мән-жайы анықталып жатыр.
Бұған дейін де Павлодар облысындағы түзеу мекемелерінде байланыс құралдарын заңсыз пайдалануға қатысты жағдайлар тіркелген.
2025 жылы колонияда жазасын өтеп жатқан адамның есірткі саудасын ұйымдастырғаны туралы ақпарат тараған.
Тергеу материалдарына сәйкес, ол сырттағы адамдармен байланысу үшін Starlink спутниктік интернет жүйесін пайдаланған. Құрылғының антеннасы түзеу мекемесінің әкімшілік ғимаратының шатырына орнатылған.
Тергеу деректерінде есірткі АҚШ-тан пошта арқылы жеткізіліп, заңсыз сауда Telegram мессенджері арқылы үйлестірілгені айтылған.
