Алматыда 61 жастағы тұрғынды өлтіру дерегі бойынша төрт адам ұсталды. Тергеушілер олардың марқұмның пәтерін заңсыз иемденуге қатысы болуы мүмкін екенін де тексеріп жатыр.
Бұл туралы Қазақстанның Ішкі істер министрлігі хабарлады.
Бұған дейін Алматыдағы көпқабатты үйлердің бірінің тұрғындары көршісінің күмәнді жағдайда жоғалып кеткенін мәлімдеген болатын.
Kazakh Inform таратқан мәліметке сәйкес, тұрғындар 30 қыркүйек күні сағат 04:34-те белгісіз адамның басына қап кигізілген ер адамды подъезден алып шыққанын айтқан.
Олардың сөзінше, бұл сәт бейнебақылау камерасына түскен. Көршілері ер адамның сол кезде ес-түссіз болуы мүмкін екенін болжаған.
Тұрғындар оқиғаға дейін подъезге күмәнді адамдардың келгенін де хабарлаған. Олардың айтуынша, 29 қыркүйекте екі ер адам пәтерлердің біріне асығыс көтерілген.
Ал 10 қазанда көршілер жоғалған ер адамның пәтері сатылғаны туралы ақпарат алған.
Осыдан кейін тұрғындар полиция мен прокуратураға жүгініп, ер адамның қайда екенін анықтауды және жылжымайтын мүлікке қатысты ықтимал мәміленің заңдылығын тексеруді сұраған.
Олар оқиғаға «қара риелторлардың» қатысы болуы мүмкін деген күдік білдірген.
Енді Ішкі істер министрлігі Алматыда 61 жастағы ер адамды өлтіру ісі бойынша төрт күдіктінің ұсталғанын мәлімдеді.
Ведомствоның мәліметінше, тергеу барысында күдіктілердің жеке басы мен қылмыстың мән-жайы анықталған.
Төрт адам да уақытша ұстау изоляторына қамалды.
Тергеушілер олардың марқұмның пәтерін заңсыз иемденуге ықтимал қатысын тексеріп жатыр.
Қылмыстық істі тергеу үшін ІІМ-нің тәжірибелі қызметкерлерінен арнайы тергеу-жедел тобы құрылды. Тергеу барысы ішкі істер министрінің жеке бақылауында.
Алайда ІІМ-нің жарияланған хабарламасында бұл қылмыстық істің бұған дейін тұрғындар айтқан оқиғамен байланысы бар-жоғы нақты көрсетілмеген.
Тергеу мүддесіне байланысты өзге мәліметтер жарияланбайды.
