Алматыда Республикалық физика-математика мектебі оқушыларының жаппай ауыруына байланысты қылмыстық іс қозғалды. Бұған дейін 48 бала жедел ішек инфекциясының белгілерімен ауруханаға жатқызылған болатын.
Бұл туралы Zakon.kz Алматы қаласының полиция департаментіне сілтеме жасап хабарлады.
Ведомство мәліметінше, тергеуді Бостандық ауданы полиция басқармасының полиция бөлімі жүргізіп жатыр.
«Аталған дерек бойынша Бостандық ауданы полиция басқармасының полиция бөлімі қылмыстық іс қозғады. Тергеу шараларының нәтижесінде, оның ішінде санитариялық-эпидемиологиялық қызметтің тексеру қорытындысы негізінде оқиғаның мән-жайы анықталып, процестік шешім қабылданады», — деп хабарлады полиция.
Еске салайық, Алматы қаласының Қоғамдық денсаулық сақтау басқармасының мәліметінше, 12–14 қазан аралығында Республикалық физика-математика мектебінің 48 оқушысы қалалық балалар клиникалық инфекциялық ауруханасына жатқызылған.
Тағы алты бала интернатта оқшауланып, дәрігерлердің бақылауына алынған.
Оқушылардың жаппай ауыруынан кейін мектептің, интернаттың және ас блогының жұмысы уақытша тоқтатылды. Мамандар зертханалық тексеру үшін сынамалар алды.
Балалардың ауруына нақты не себеп болғаны әзірге ресми түрде анықталған жоқ. Санитариялық-эпидемиологиялық тексеру нәтижелері тергеу барысында ескеріледі.
