Sona.kz

Рубрика: Билік

  • Президент Абай облысының әкімі Берік Уәлиді қабылдады

    Президент Абай облысының әкімі Берік Уәлиді қабылдады

    Мемлекет басшысы Абай облысының әкімі Берік Уәлиді қабылдады, деп хабарлайды Ақорданың баспасөз қызметі.

    Президентке өңірдің әлеуметтік-экономикалық жағдайы туралы есеп беріліп, алдағы кезеңге арналған даму жоспары таныстырылды.

    Облыс әкімі жергілікті бюджеттің шығыс және кіріс бөлігіне жан-жақты талдау жүргізілгенін жеткізді. Соның нәтижесінде қаржыландырудың басым бағыттары анықталды. Ал үнемделген қаражат өзекті мәселелерді шешуге жұмсалады.

    Қасым-Жомарт Тоқаевқа 2028 жылға дейін жүзеге асырылатын 24 инвестициялық жобаның тізімі жасақталғаны туралы баяндалды. Жалпы құны 2,2 триллион теңге болатын бұл бастамалар 8 мыңнан астам жұмыс орнын ашуға мүмкіндік береді. Оның ішінде алты жоба биыл іске қосылады.

    Берік Уәли облыстағы әлеуметтік нысандардың және коммуналдық инфрақұрылымның жай-күйі жөнінде мәлімет берді. Атап айтқанда, тұрғындардың сұранысына сай мектептер мен балабақшалар салу, мәдениет және денсаулық сақтау нысандарын жаңғырту жоспарланып отыр. Бұдан бөлек, коммуналдық шаруашылық саласындағы қордаланған проблемаларды, әсіресе Семей қаласының осы бағыттағы мәселелерін шешу өте өзекті.

    «Жайлы мектеп» ұлттық жобасы аясында 5 нысанның және оқушылар сарайының құрылысы қолға алынды. Облыс орталығындағы аспалы көпірді реконструкциялаудың жобалық-сметалық құжаттамасы әзірленіп, Ертіс өзені арқылы өтетін тағы бір көпір салынып жатыр. Осы ретте аспалы көпірдің жүктемесін азайтып, көлік нөпірін реттеу мақсатында Семей қаласында айналма жол салу мәселесі пысықталуда

    Мемлекет басшысы аймақтағы әлеуметтік-экономикалық мәселелердің шешілуі тұрғындардың тұрмыс деңгейін арттыруға ықпал ететінін атап өтті. Сондай-ақ облыс әкіміне Үкіметпен бірге өңірді қарқынды дамыту жолдарын қарастырып, өзекті мәселелерді кезең-кезеңімен шешуді тапсырды.

    Қасым-Жомарт Тоқаев өңдеу өнеркәсібін өркендету, жаңадан тұрақты жұмыс орындарын ашу, облыс орталығын абаттандыру және инфрақұрылымды дамыту бағытында шаралар қабылдау қажет екеніне тоқталды. Сонымен қатар Абайдың 180 жылдығына арналған мерейтойлық іс-шараларды лайықты деңгейде ұйымдастырудың маңызына назар аударды.

  • Олжас Бектенов су тасқынына қарсы дайындықты пысықтады

    Олжас Бектенов су тасқынына қарсы дайындықты пысықтады

    Премьер-министр Олжас Бектенов Үкімет отырысында мемлекеттік органдарға тасқынға дайындықты күшейтуді тапсырды.

    «Су тасқыны кезеңінің басталуына да көп уақыт қалған жоқ. Әкімдер бұл мәселені ерекше бақылауға алуы қажет. Төтенше жағдай туралы халықты хабардар ететін барлық жүйелердің тұрақты жұмысын қамтамасыз етіңіздер», – деді ол.

    Үкімет басшыы әлеуметтік желілер мен БАҚ-та түсіндіру жұмыстарын күшейту маңызды екеніне де тоқталды.

    «Төтенше жағдайлар министрлігі су тасқынына толығымен дайын болуға тиіс. Сондай-ақ, орталық және жергілікті мемлекеттік органдардың жұмысын ұйымдастырсын», – деді Олжас Бектенов.

    Осыған дейін су тасқынының салдарын жою үшін 10 000-ға жуық әскери қызметші жұмылдырылуы мүмкін екені айтылды.

  • Президент мереке қарсаңында бірқатар әйелді мемлекеттік наградамен марапаттады

    Президент мереке қарсаңында бірқатар әйелді мемлекеттік наградамен марапаттады

    Тоқаев бір топ азаматты мемлекеттік наградамен марапаттады, деп хабарлайды Ақорданың баспасөз қызметі.

    Қазақстан Республикасы Президентінің жарлығымен мемлекеттік және қоғамдық қызметке cіңірген еңбегі, елдің әлеуметтік-экономикалық және мәдени дамуына қосқан елеулі үлесі, сондай-ақ әскери және қызметтік борышын үлгілі атқарғаны үшін бір топ азамат мемлекеттік наградалармен марапатталды.

    Олардың қатарында:

    • 4 еңбек ардагері;
    • 19  жұмысшы маман мен кәсіпорын еңбеккерлері;
    • 14 денсаулық сақтау, білім беру, ғылым және мәдениет саласының қызметкерлері;
    • 6 кәсіпорын басшысы;
    • 3 қоғамдық ұйым өкілі;
    • 7 мемлекеттік қызметкер;
    • 6 құқық қорғау, арнаулы және бақылаушы органдарда, әскер қатарында еңбек ететін қызметкерлер бар.

    Бауыржан Момышұлы атындағы ІI дәрежелі «Айбын» орденімен

    • Айтмағамбетова Жұлдыз Рахымқызы – Мемлекеттік күзет қызметінің аға инспекторы
    • Ахметова Айман Рахмеджанқызы – Ұлттық қауіпсіздік комитетінің аса маңызды істер бойынша аға жедел уәкілі
    • Әбуева Анаргүл Аманжолқызы – Төтенше жағдайлар министрлігінің департамент бастығы
    • Канкина Құралай Темірболатқызы – Бас Прокурордың аға көмекшісі
    • Мұсатаева Балжан Төлеужанқызы – Қорғаныс министрлігі 44013 әскери бөлімінің взвод командирі;

     «Парасат» орденімен

    • Әбілдина Қарақат Түлкібайқызы – «Қарақат» мектеп-студиясының бас директоры, Астана қаласы;
    • Жексенбай Бибігүл Нұрғалиқызы – Парламент Сенатының депутаты
    • Құспан Айгүл Сайфоллақызы  – Парламент Мәжілісінің депутаты
    • Ноғайбаева Гүлдана Рахымбекқызы – Абай облысы мәдениет, тілдерді дамыту және архив ісі басқармасының «Ә. Қашаубаев атындағы мемлекеттік филармониясы» КМҚК әншісі-әртісі

     «Құрмет» орденімен

    • Абиева Раиса Леонидовна – «Абиев А.А.» ШҚ басшысы, Жетісу облысы
    • Ағыбаева Раиса Мұхамедиқызы – Астана қаласының ардагерлер кеңесі медиатобының төрағасы
    • Айтбаева Шолпан Сашкенқызы – еңбек ардагері, Астана қаласы
    • Әбдірайымова Тілеукүл Шайымқызы – Су ресурстары және ирригация министрлігінің «Қазсушар» РМК Жамбыл филиалы «Шу» өндірістік бөлімшесінің инженері
    • Әбенова Күлпаш Қайроллақызы – Сауда және интеграция министрлігі Техникалық реттеу және метрология комитетінің «Ұлттық аккредиттеу орталығы» РМК жұмысқа тартылатын бағалаушысы
    • Әзімқұлова Әділет  Срадинқызы  – еңбек ардагері, Түркістан облысы
    • Гияги Роза Римовна – «Қазақстан темір жолы» ҰК» АҚ «Шымкент магистральдық желі бөлімшесі» филиалы Арыс жол дистанциясының диспетчері, Түркістан облысы
    • Егізбаева Сәуле Әбутәліпқызы –  «М. Шоқай атындағы № 187 ақпараттық технологиялар мектеп-лицейі (IT мектеп-лицейі)» КММ мұғалімі, Қызылорда облысы
    • Елеуова Қаракөз Темірбекқызы – еңбек ардагері, Алматы қаласы
    • Земляная Людмила Дмитриевна – «Жер су» ЖШС директоры, Шығыс Қазақстан облысы
    • Кәпенова Гүлмира Амангелдіқызы – «BESTKZ.KST» ЖШС басшысы, Қостанай қаласы
    • Қанапина Гүлнар Бекежанқызы – «Қазақстан Алюминийі» АҚ гидрометаллургы-аппаратшысы, Павлодар облысы
    • Қараева Бибігүл Атшыбайқызы – Маңғыстау облысы Жаңаөзен қаласы бойынша білім бөлімінің «№ 14 жалпы білім беретін мектеп» КММ мұғалімі
    • Құрманғалиева Бикеш Қайдарқызы – «Цифрлық экономиканы дамыту орталығы» ЖШС бас директоры
    • Молдашева Бағдашжан Қадыржанқызы – «Хромтау тау-кен техникалық жоғары колледжі» МКҚК директоры, Ақтөбе облысы
    • Одинцова Маргарита Владимировна – Жоғарғы Соттың судьясы
    • Сағынтаева Аида Қыстаубайқызы  –  «Назарбаев университет» ДББҰ вице-провосты, Астана қаласы
    • Үмбеталина Марал Әбдірашқызы  – «Қалалық жұқпалы аурулар ауруханасы» МКҚК дәрігері, Шымкент қаласы
    • Хамитова Алмагүл Мәжитқызы –  «Желаев нан өнімдері комбинаты» АҚ директоры, Батыс Қазақстан облысы
    • Хорошаш Ғалия Нәсіболлақызы – «Қазақстан Республикасы Президенті Іс басқармасы Медициналық орталығының ұлттық госпиталі» РМК дәрігері;

    III дәрежелі «Еңбек Даңқы» орденімен

    • Қамбарова Баянгүл Қожабергенқызы  – «Қазақмыс» корпорациясы» ЖШС филиалы «Қ. Сәтбаев атындағы «Жезқазғантүсмет» ӨБ электрмен дәнекерлеушісі
    • Мадимарова Анар Серікбайқызы – «Тараз металлургиялық зауыты» ЖШС шикіқұрамшысы, Жамбыл облысы
    • Нұрғалиева Зинагүл Әбенқызы – «Altyntau Kokshetau» АҚ шикіқұрамшысы, Көкшетау қаласы
    • Санқыбаева Бахытгүл Қуанышбайқызы –  «Ақ Жайық-7» ЖШС вагон жөндеу депосының кран машинисі, Атырау қаласы
    • Сәрсенова Ботагөз Ғабитқызы – «Қазақстан темір жолы» ҰК» АҚ «Павлодар магистральдық желі бөлімшесі» филиалы Ерейментау жол дистанциясының жол шебері;

     «Ерен еңбегі үшін» медалімен

    • Арпабаева Бибігүл Төлегенқызы – «Өскемен ЖЭО» ЖШС отын-көлік цехының аға жүк және багаж қабылдап-тапсырушысы
    • Әбелдинова Надежда Николайқызы – Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) аса маңызды істер жөніндегі офицері
    • Бәкірова Қарлығаш  Тастанбекқызы – «№ 13 қалалық емхана» МКК дәрігері, Астана қаласы
    • Жамалиева Әлима Аманжолқызы  –  Ішкі істер министрлігі Астана қаласы полиция департаментінің аса маңызды істер жөніндегі аға тергеушісі
    • Жолдыбаева Маржан Жолдыбайқызы  – «Кажсервис» ЖШС Қарағанды облыстық филиалының жол жұмысшысы
    • Игбаева Меруерт Асылханқызы – Сыртқы істер министрлігі департамент директорының орынбасары
    • Қожамсейітова Мақпал Қамашқызы – «Алматыэлектротранс» ЖШС троллейбус жүргізушісі, Алматы қаласы
    • Молдыбаева Гүлшарат Тоқанқызы – «Астана-АЭК» АҚ жедел-диспетчерлік қызметінің операторы
    • Русинова Ольга Владимировна – «Қазтелерадио» АҚ бөлім басшысы, Алматы қаласы
    • Сарымсақова Айна Абылайқызы –  Шымкент қаласы № 7 округтік сайлау комиссиясының төрағасы
    • Сәрсембаева Жанаркүл Оразалықызы  – «Almaty turmystyq tehnika zavody» ЖШС сапа инспекторы, Алматы облысы
    • Табергенова Айгүл Олжабайқызы – «Дара» қайырымдылық қоры «Ерте қолдау» жобасының жетекшісі, Астана қаласы
    • Тұрсынқанбетова Еркежан Саятқызы – «Туризм және спорт индустриясын қолдау қоры» КҚ бас директорының орынбасары
    • Шек Наталья Анатольевна  – Қазақстан Республикасы Ұлттық Банкінің бас маманы, Астана қаласы;

     «Шапағат» медалімен

    • Әлімбаева Динара Төлегенқызы – «Қарағанды қаласының № 2 арнаулы әлеуметтік қызметтер көрсету орталығы» КММ аға мейіргері
    • Әуренова Мәдина Дәулетханқызы – «DEMEY» оңалту және түзету орталығы» ҚБ төрағасы және негізін қалаушы, Шығыс Қазақстан облысы
    • Васина Светлана Станиславовна – «Moon-Ай» музыкалық дуэтінің қатысушысы, Астана қаласы
    • Жақыпова Жанар Бексұлтанқызы – «New Decision Group» ғылыми-зерттеу агенттігі» ЖШС басшысы, Алматы қаласы
    • Михеева Елена Валериевна – «Moon-Ай» музыкалық дуэтінің қатысушысы, Астана қаласы
    • Орынбаева Алтынай Романқызы – «Қызылорда облысының тілдерді оқыту орталығы» КММ бөлім бастығы
    • Уайысова Гүлмәрия Қажағалиқызы – Солтүстік Қазақстан облысы Шал ақын ауданы Жаңажол ауылдық округінің мал дәрігері наградталды.

     «Қазақстанның еңбек сіңірген ұстазы» құрметті атағы

    • Аханова Бақытжан Омарғалиқызы –   Шығыс Қазақстан облысы Ұлан ауданының білім басқармасы «Балалар музыка мектебі» КМҚК директоры;

    «Қазақстанның еңбек сіңірген дәрігері» құрметті атағы

    • Үкібасова Талшын Мұқадесқызы  – «University medical centre» корпоративтік қорының бас консультанты, Астана қаласы;

    «Қазақстанның еңбек сіңірген құрылысшысы» құрметті атағы

    • Шелудько Ольга Николаевна – Өнеркәсіп және құрылысы министрлігі «Жобаларды мемлекеттік ведомстводан тыс сараптау» РМК Оңтүстік өңір бойынша филиалы Жамбыл облысы бойынша департаментінің сарапшысы;

    «Қазақстанның еңбек сіңірген өнеркәсіп қайраткері» құрметті атағы

    • Ерманова Майра Жұратбекқызы – «Қазақмыс корпорациясы» ЖШС филиалы — «Жезқазғантүстімет» ӨБ №1, 2, 3 Жезқазған байыту фабрикаларының флотаторы, Жезқазған қаласы берілді.
  • Жеті кеншінің қазасына кімдер кінәлі?

    Жеті кеншінің қазасына кімдер кінәлі?

    Мемлекет басшысының тапсырмасы бойынша ҚР премьер-министрінің орынбасары Қанат Бозымбаевтың төрағалығымен өткен Үкіметтік комиссияда «Қазақмыс корпорациясы» ЖШС «Жомарт» кенішіндегі апатты тергеудің алдын ала қорытындылары қаралды.

    Тергеу аясында 8 кіші комиссия құрылып, ғылыми-зерттеу институттары мен зертханаларының сарапшылары мен мамандары да тартылды.

    Тергеу барысы туралы Төтенше жағдайлар, Ішкі істер, Еңбек және халықты әлеуметтік қорғау министрлігі өкілдерінің баяндамалары тыңдалды. Атап айтқанда, комиссиялар мен кіші комиссиялардың мүшелері оқиғаны көзімен көрген куәгерлер арасында сауалнама жүргізді, өндіріс технологиясын зерттеп, техникалық құрылғылар мен жабдықтардың жұмысқа жарамдылығын тексерді, тиісті сараптамалар жүргізілді.

    Комиссия тау-кен қазбасынан метанның жиналуы мен бөлінуі, содан кейін электр жабдықтарының ұшқынынан жарылыс болуы сияқты апаттың негізгі себебін анықтады. Сондай-ақ өнеркәсіптік қауіпсіздік пен еңбекті қорғау бойынша айтарлықтай ереже бұзушылықтар анықталып, жауапты тұлғалар тобы белгілі болды.

    «Жиында Ұлытау облысының әкімі Дастан Рыспеков пен «Қазақмыс корпорациясы» ЖШС басқарма төрағасы Нұрахмет Нұриев апатта қаза тапқандардың отбасыларына әлеуметтік қолдау мен көмек көрсету және өтемақы төлеу бойынша атқарылып жатқан шаралар туралы баяндады.

    Қазіргі уақытта «Жомарт» кенішінің жұмысы тоқтатылды. Комиссия қауіпті өндірістік объектілерде осындай оқиғалардың алдын алу шараларын әзірледі.

    Кеңес қорытындысы бойынша комиссия төрағасы Қанат Бозымбаев «Қазақмыс корпорациясы» ЖШС-ға бұзушылықтарды жою мен апаттардың алдын алу бойынша, оның ішінде кеніштегі қауіпсіздікті арттыру, ауадағы газ құрамын анықтаудың автоматтандырылған жүйелерін енгізу, бейнебақылау орнату және басқа да бірқатар тапсырма берді.

    Тергеу жұмыстары жалғасуда әрі ұдайы бақылауда болады», — делінген Үкіметтің хабарламасында.

  • БҰҰ-ның аймақтық орталығын Алматыда ашу туралы қарар қабылданды

    БҰҰ-ның аймақтық орталығын Алматыда ашу туралы қарар қабылданды

    Бұл туралы Қазақстан Республикасы Президентінің кеңесшісі – Баспасөз хатшысы Руслан Желдібай әлеуметтік желідегі парақшасында жазды.

    «Бүгін БҰҰ Бас Ассамблеясы 152 елдің бірлескен авторлығымен Орталық Азия мен Ауғанстан үшін Орнықты даму мақсаттары жөніндегі БҰҰ-ның аймақтық орталығын Алматыда ашу туралы қарарды консенсус негізінде қабылдады.

    Бұл – еліміздің сыртқы саясаттағы айтулы жетістігі. Президент Қазақстанның бастамасын қолдағаны үшін барлық серіктес мемлекеттерге ризашылық білдірді.

    Мемлекет басшысының пікірінше, БҰҰ-ның Аймақтық хабы халықаралық іс-қимылды үйлестірудің маңызды алаңына айналады», – деп жазды Қазақстан Республикасы Президентінің кеңесшісі – Баспасөз хатшысы Руслан Желдібай.

  • Айбек Смадияров – Қазақстан СІМ Халықаралық ақпарат комитетінің төрағасы һәм ресми өкілі

    Айбек Смадияров – Қазақстан СІМ Халықаралық ақпарат комитетінің төрағасы һәм ресми өкілі

    Қазақстан СІМ Халықаралық ақпарат комитетінің төрағасы – Ресми өкілі ретінде Айбек Смадияров тағайындалды.

    Айбек Смадияров 1983 жылғы 7 шілдеде Оңтүстік Қазақстан облысында дүниеге келген. 2004 жылы Абылай хан атындағы Қазақ халықаралық қатынастар және әлем тілдері университетін бітірген.

    Еңбек жолын 2005 жылы «Қазақстандағы Қытай банкі» АҚ Административтік департаментінің маманы ретінде бастаған. 2006 жылдан 2008 жылға дейін Қазақстан Республикасының Сыртқы істер министрлігі Консулдық қызмет департаментінің маманы ретінде қызмет атқарды.

    2008-2010 жылдары ҚР СІМ Еуропа департаментінің атташесі және үшінші хатшысы лауазымдарында жұмыс істеді.

    2010-2012 жылдар аралығында Қазақстанның Мажарстандағы Елшілігінде үшінші хатшы қызметін атқарды.

    2012 жылдан 2013 жылға дейін ҚР Президентінің Баспасөз қызметінде сарапшы, ал 2013-2014 жылдары ҚР СІМ Сыртқы саяси сараптау мен болжамдау комитетінің бірінші хатшысы лауазымын атқарды.

    2014 жылдан 2018 жылға дейін Вьетнамдағы ҚР Елшілігінде екінші және бірінші хатшы қызметінде жұмыс істеді.

    2018-2019 жылдары ҚР СІМ Баспасөз қызметін басқарып, 2019-2023 жылдар аралығында ҚР СІМ Халықаралық ақпарат комитеті төрағасының орынбасары – Баспасөз хатшысы лауазымын атқарды.

    ҚР СІМ Халықаралық ақпарат комитетінің төрағасы болып тағайындалғанға дейін 2023 жылғы маусымнан бастап ҚР СІМ Коммуникациялар департаментінің директоры – Ресми өкілі болды. II сыныпты Төтенше және Өкілетті Уәкіл дипломатиялық дәрежеге ие. Қазақ, орыс, ағылшын және түрік тілдерін меңгерген.

     

  • Президент «Түркістан қаласының ерекше мәртебесі туралы» заңға қол қойды

    Президент «Түркістан қаласының ерекше мәртебесі туралы» заңға қол қойды

    Мемлекет басшысы «Түркістан қаласының ерекше мәртебесі туралы» Қазақстан Республикасының заңына қол қойды, – деп хабарлайды Ақорда.

    Заңда еліміздің рухани, тарихи-мәдени, туристік орталығы және сәулет мұрасы ретіндегі Түркістан қаласының ерекше мәртебесі бекітілген.

    Құжатта:

    — тарихи-мәдени мұраны сақтау;

    — Қожа Ахмет Ясауи кесенесі мен басқа да ескерткіштерді қорғау;

    — археологиялық және ғылыми-реставрациялық жұмыстарды реттеу;

    — тарихи-мәдени мұраны қайта жаңғырту және ұлттық қолөнерді дәріптеу;

    — қорғау аймағында биіктігі мен сәулеті үйлеспейтін ғимараттарды салмау;

    — археологиялық ескерткіштердің резерватын құру;

    — мүгедектігі бар адамдарға қолжетімді инфрақұрылым және инклюзивті туризм құру арқылы қалада жайлы орта қалыптастыру;

    — қаланың бірыңғай келбетін – сәулет ерекшелігін сақтау үшін дизайн код енгізу;

    — тиімді басқару мен бақылау үшін әкімдік пен мәслихат өкілеттігін кеңейту;

    — мемлекет тарапынан қолөнер шеберлерін қолдау мен көлік транзитін реттеу;

    — туризмді дамыту және тұрмыс сапасын арттырумен қатар қаланың тарихи ерекшелігін сақтау қарастырылған.

    Заңның мәтіні баспасөзде жарияланады.

  • Үкімет басшысы бизнес өкілдеріне ескерту жасады

    Үкімет басшысы бизнес өкілдеріне ескерту жасады

    Қазақстан Республикасының Премьер-министрі Олжас Бектенов вице-премьер – ұлттық экономика министрі Серік Жұманғаринмен және қаржы министрі Мәди Такиевпен жұмыс кеңесін өткізді.

    Салық-бюджет реформасы және салық түсімдерін бақылауды күшейту мәселелері қаралды.

    Қаржы министрі Мәди Такиев жүргізілген талдау шеңберінде жосықсыз салық төлеушілердің салық міндеттемелерін оңтайландырудың құқықтық схемасы ретінде шағын кәсіпкерлікті қолдау және дамыту мақсатында бұрын енгізілген арнайы салық режимдерін (СРП) пайдалану фактілері анықталғанын баяндады.

    Бүгінде елімізде 2,3 млн салық төлеуші тіркелген. Оның 8%-ы немесе 137 мыңы ғана – ҚҚС төлеушілер. Жалпы субъектілер санының 81%-ы оңайлатылған декларацияны пайдалана отырып, арнайы салық режимінде жұмыс істейді, ал олардың 85%-ы 15 млн теңгеге дейінгі кірістерді көрсетеді.

    «Біз арнайы салық режимдерін қолданатын субъектілердің жалпыға бірдей белгіленген режимде жұмыс істейтін компаниялармен өзара есеп айырысуларына талдау жасадық. Талдау көрсеткендей, мұндай режимдер арасындағы өзара есеп айырысу өткен жылы 2 есеге – 5 трлн-нан 10 трлн теңгеге дейін өсті. Бұл ретте арнайы салық режимдері бойынша 16 трлн теңгенің жалпы айналымынан жалпыға бірдей белгіленген режиммен өзара есеп айырысу 10 трлн теңгені құрайды. Яғни, жүздеген миллиард теңге табыс тауып, салық төлеушілер аз ғана салық төлейді», – деген Мәди Такиев бизнес пайдаланатын бірқатар бөлшектеу схемаларын айтты.

    Салықтарды оңтайландыру және пайданы азайту үшін компаниялар «құжаттық» шығындарды арттыру принципін ұстанады. Бір компания тауарларды сатып алады және оны оңтайландырылған режимде жұмыс істейтін басқа заңды тұлғаға өзіндік құны бойынша қайта сатады. Нәтижесінде, бірінші компания шығынды көрсетсе, ал екіншісі жеңілдік шарттарын пайдалана отырып, ҚҚС төлеуден жалтарып отыр.

    Сонымен қатар бизнесті бірнеше заңды тұлғаларға бөлу әдісі қолданылуда. Мысалы, бір мекемеде бар, асхана және караоке жеке компания ретінде тіркелген немесе қонақ үйдің әр қабаты әртүрлі жеке кәсіпкерге тиесілі. Олардың бірінің табысы 78 млн теңге шегіне жеткенде, қызметі тоқтатылады, ал оның орнына басқа заңды тұлға келіп, бұл ҚҚС төлеуден жалтаруға мүмкіндік береді.

    «Еңбекақы қорына түсетін жүктемені азайту үшін кәсіпорын қызметкерлері штаттан шығарылып, жеке кәсіпкер ретінде тіркеліп, бұрынғы жұмыс берушіге жұмысшы ретінде емес, жеке тұлға ретінде қызмет көрсетеді. Тиісінше, еңбекақы төлеу қорына түсетін салық төлемдері азайып, жұмыс берушіден әлеуметтік жауапкершілік алынып тасталады, одан әрі оны кәсіпкер өз мойнына алады», – деді Мәди Такиев.

    Осыған байланысты ҚР Қаржы министрлігі салықтық әкімшілендіруді жетілдіру мақсатында бөлшектеуге қарсы күрес бойынша бірқатар шара ұсынады:

    бизнестің бөлшектенуінің заңнамалық критерийін енгізу;

    салық дауларында нысаннан мәннің басым болу қағидатын енгізу;

    мұндай фактілерді бақылау және дәлелдеу әдістерін енгізу;

    жеке кәсіпкерлер үшін қызмет түрлерін шектеу.

    «Қаржы министрінің ақпаратынан салық жүктемесін оңтайландырудың әртүрлі схемаларын қолдана отырып, міндетін адал атқармайтын кәсіпкерлердің барын көріп отырмыз. Миллиардтаған айналыммен олар бюджетке өздерінің тапқан пайдасына мүлдем сәйкес келмейтін сомаларды төлейді. Бізде осындай ірі компаниялардың толық тізімі бар. Ол тізімде BI Group, BAZIS және басқа да көптеген ірі құрылыс компаниялары жүр. Экономиканың басқа салаларында жұмыс істейтін белгілі әрі танымал мейрамханалар, фитнес-клубтар және әртүрлі компаниялар бар.

    Осы мүмкіндікті пайдалана отырып, мен қазір салық жүктемесін оңтайландырудың түрлі схемаларын қолданатын ірі компаниялардың иелері мен басшыларына қарата айтқым келеді. Бүгін-ертең сіздердің компанияларыңызға салық органдарынан қосымша салық сомаларын төлеу қажеттілігі туралы хабарламалар келіп түседі. Баршадан екі апта ішінде салық органдарына қосымша салық декларацияларын тапсыруды және әділетті салық сомасын төлеуді сұраймын.

    Егер бұл әрекеттер жасалмаса, онда мемлекет фискалдық және құқық қорғау органдарын қосқанда, мемлекет иелігіндегі барлық ресурстарды қолдану құқығын өзіне қалдырады.

    Талап қатаң болады, бірақ егер бизнес мемлекет алдындағы міндеттемесін әділетті түрде орындаса, біз диалог құруға дайынбыз», – деп атап өтті Олжас Бектенов.

  • Қанат Шарлапаев отставкаға жіберілді

    Қанат Шарлапаев отставкаға жіберілді

    Қанат Шарлапаев президенттің экономикалық мәселелер жөніндегі көмекшісі болып тағайындалды.

    Қанат Шарлапаев өнеркәсіп және құрылыс министрі лауазымынан босатылып, президенттің экономикалық мәселелер жөніндегі көмекшісі болып тағайындалды.

    Бұл туралы Ақорданың хабарламасында:

    «Мемлекет басшысының Жарлығымен Қанат Бисимбайұлы Шарлапаев Қазақстан Республикасы Президентінің экономикалық мәселелер жөніндегі көмекшісі болып тағайындалды, ол бұрынғы атқарған лауазымынан босатылды», – делінген.

    Шарлапаев 2023 жылдың 4 кыркүйегінен бастап Қазақстан Республикасы Өнеркәсіп және құрылыс министрі болып қызмет атқарған.

  • Сенат төрағасы: Әскерде мүгедек болып қалатындай ауыр жарақат алу – төтенше жағдай

    Сенат төрағасы: Әскерде мүгедек болып қалатындай ауыр жарақат алу – төтенше жағдай

    Бүгін Сенаттың жалпы отырысында резервтегі әскери қызмет туралы заңды қарау барысында палата төрағасы Мәулен Әшімбаев Қазақстан армиясындағы резервтегілердің құқықтарына және оларды әлеуметтік қорғау мәселелеріне назар аударды.

    Еңбек және халықты әлеуметтік қорғау бірінші вице-министрі Ақмәди Сарбасовтың сөзіне қарағанда, егер резервтік әскери қызметтегілер жаттығулар кезінде жарақат алып, тіпті мүгедек болып қалса, оларға өтемақы мемлекетімізде бар нормалар бойынша төленеді. Ал, әскери қызметшілер, офицерлер осындай жағдайға тап болса, оларға төленетін төлемақы басқа жүйемен жүргізіледі.

    Сенат төрағасы осы мәселеге баса мән беріп, бұл бағытты әлі де пысықтау қажет екенін айтты.

    – Егер резервистер әскери жаттығулар, яғни 60 күннің немесе ай сайын баратын екі-үш күннің ішінде жарақат алса, оларға өтемақылар неге әскери қызметшілерге төленетін төлем деңгейімен берілмейді? Олар өз үйінде емес, жұмысында емес, сол әскери жаттығулар кезінде жарақат алса, логика қайда?! Сондықтан осы мәселені тағы да пысықтау керек. Заң қабылданып, әрі қарай іске асырыла бастағанда, болған жағдайлардың бәрін назарға алып, мұқият зерделеу қажет. Әрине, офицерлер ондай жағдайларға жеткізбеуге тиіс. Соған сенеміз. Өйткені әскерде мүгедек болып қалатындай ауыр жарақат алу – нағыз төтенше жағдай. Дегенмен өмір болған соң әртүрлі жағдай болуы мүмкін. Сол себепті бәрін ескеруіміз керек. Өйткені бұл – әлеуметтік маңызы зор мәселе, – деді Мәулен Әшімбаев.

    Айта кетейік, бүгін Сенат отырысында Палата депутаттары «Қазақстан Республикасының кейбір заңнамалық актілеріне резервтегі әскери қызмет және жекелеген орталық мемлекеттік органдардың функцияларын қайта бөлу мәселелері бойынша өзгерістер мен толықтырулар енгізу туралы» заңды екі оқылымда қарап мақұлдады.