Sona.kz

Рубрика: Мәдениет

  • Тұрсынбек Қабатов дауы: әзілкеш бұрынғы жұбайының мәлімдемесіне жауап берді

    Тұрсынбек Қабатов дауы: әзілкеш бұрынғы жұбайының мәлімдемесіне жауап берді

    Белгілі шоумен Тұрсынбек Қабатов пен оның бұрынғы жұбайы Мөлдір арасындағы дау әлеуметтік желілерде қызу талқыланып жатыр, деп хабарлайды Sona.kz.

    Журналист Жанар Байсемізге берген сұхбатында Мөлдір ауыр ажырасу мен опасыздық туралы алғаш рет ашық айтты. Продюсердің айтуынша, бұл оқиға 14 жылға созылған, ал балалар әкесінен алыстауды ауыр қабылдап жүр. Ол сондай-ақ Қабатовтың өзін және балаларын бұғаттағанын мәлімдеді.

    Инфлюенсерлер де әйелді қолдап, әлеуметтік желіде пікір қалдырды:

    «Мөлдірдің сұхбаты менің де жанымды ауыртты. Мұндайды тек басынан өткергендер ғана түсінеді».

    Алайда кей желі қолданушылары артистің жеке өмірі мен шығармашылығын шатастырмауға шақырды.

    Өз кезегінде Тұрсынбек Қабатов айыптауларды жоққа шығарды:

    «Мен ешқашан балаларымды бұғаттаған жоқпын. Мен олармен біргемін, оларды жақсы көремін. Бүгінге дейін балаларым үшін еңбектендім және еңбектенемін. Алла бәрімізге саулық берсін!», — деді ол.

  • Алматы облысында «Тең мүмкіндіктер» инклюзиялық спорт фестивалі өтті

    Алматы облысында «Тең мүмкіндіктер» инклюзиялық спорт фестивалі өтті

    Алматы облысында «AMANAT» партиясының «Кедергісіз келешек» жобасы аясында «Тең мүмкіндіктер» инклюзиялық спорт фестивалі ұйымдастырылды. Фестивальдің өтуіне «AMANAT» партиясының Алматы облыстық филиалы жанындағы Әйелдер қанаты қолдау көрсетті.

    Осылайша, сайысқа ерекше білімге мүдделі мектеп оқушылары қатысты. Мұндағы мақсат – инклюзиялық мәдени-спорттық іс-шаралар арқылы достық байланысты, әлеуметтік белсенділікті, өзара сыйластықты нығайту.

    «AMANAT» партиясы Алматы облыстық филиалының атқарушы хатшысының орынбасары Аслан Кубентаевтың айтуынша, мұндай іс-шара өңірде үшінші рет өткізілуде.

    «Партияның бастамасымен үшінші жыл қатарынан «Тең мүмкіндіктер» атты инклюзивті спорт фестивалі өткізіліп келеді. Бұл – «Кедергісіз келешек» атты партиялық жобамыздың маңызды бөлігі. Бүгінгі іс-шараға облыстың түкпір-түкпірінен 50-ге жуық жасөспірім жиналды. Балалар бочча, жеңіл атлетика, эстафета сынды спорт түрлері бойынша өнер көрсетті. Талапшыл, жігерлі балалар бәрімізді тәнті етті», – деді Аслан Кубентаев.

    Жеңімпаздар дипломдармен және бағалы сыйлықтармен марапатталды. Командалық есеп бойынша Еңбекшіқазақ ауданы бірінші орын, Қарасай ауданы екінші орын, ал Іле ауданы үшінші орын иеленді. Нәтижесінде республикалық кезеңге 18 оқушы жолдама алды.

    Айта кетейік, ерекше қажеттілігі бар адамдарға қолдау көрсету – «AMANAT» партиясы атқаратын жұмыстағы негізгі басымдықтың бірі. Мәселен, партияның «Халықпен бірге!» сайлауалды бағдарламасын жүзеге асыру жұмысы аясында 2028 жылға дейін әрбір елді мекенде инклюзияны қолдаудың кемінде бір кабинетін ашу көзделген.

  • Қонаев қалалық кітапханасында TikTok аймақ ашылды

    Қонаев қалалық кітапханасында TikTok аймақ ашылды

    Мұнда жас оқырмандарға арналған жаңа балалар бөлімі ашылды. Заманауи талаптарға сай безендірілген бұл кеңістік балалардың кітап оқуға деген қызығушылығын арттырып, оқу мәдениетін дамытуды мақсат етеді.

    Жаңа бөлімнің ерекшелігі – жастар арасында кең тараған TikTok платформасына арналған арнайы бұрыштың болуы. Бұл аймақ жас оқырмандарға өз шығармашылығын дамытуға, қызықты бейнероликтер түсіріп, кітап әлемін жаңа форматта насихаттауға мүмкіндік береді.

    Бүгінде кітапхана қорында 10 мыңға жуық кітап бар. Мұндағы көркем әдебиет, энциклопедиялар мен заманауи балалар әдебиеті үлгілері өскелең ұрпақтың рухани дамуына серпін бермек.

    Кітапхананың басшысы Айгүл Ақтанованың айтуынша, жаңа бөлімнің ашылуы – уақыт талабынан туған шешім.

    «Жыл сайынғы 10 мың оқырманның шамамен 35 пайызын балалар құрайды. Соңғы жылдары балалар бөлімін ашу қажеттілігі айқын байқалды. Модернизациядан кейін бізге қосымша 8 штат берілді, соның үшеуін балалар бөліміне бөлдік. Басты мақсат – жас оқырмандардың сұранысын қанағаттандырып, олардың еркін әрі қызықты ортада дамуына жағдай жасау», – деді ол.

    Ашылу салтанатына «Балдырған» журналының бас редакторы, мәслихат депутаттары және Қазақстан Жазушылар одағы Алматы облыстық филиалының төрағасы қатысып, жаңа бастаманың маңыздылығын атап өтті.

    Жаңа балалар бөлімі – Қонаев қаласының мәдени өміріндегі маңызды жаңалық. Ол жас ұрпақтың кітапқа деген қызығушылығын арттырып, шығармашылық әлеуетін ашуға жол ашпақ.

  • «Қызғылт қазан» марафонына 150-ге жуық әйел қатысты

    «Қызғылт қазан» марафонына 150-ге жуық әйел қатысты

    Қонаевта сүт безі қатерлі ісігіне қарсы айлық аясында «Қызғылт қазан» марафоны өтті.

    Оған 150-ге жуық әйел қатысты. Марафоншылар түрлі жас категориялары бойынша сынға түсті. Сондай-ақ қаланың белсенді жасы 50-ден асқан тұрғындары скандинавиялық жүріс бойынша жарысты.

    Марафоншылар Жамбыл көшесіндегі аллея арқылы жағажайға дейінгі және қайтар бағыттағы жолды еңсерді.

    «Қоғамда әйелдердің орны бөлек. Нәзік жандыларсыз біздің өмірді елестету мүмкін емес. «Қызғылт қазан» айы сіздердің денсаулықтарыңызға, қатерлі ісіктің алдын алуға бағытталған ай. Тәні саудың – жаны сау. Сол себепті үнемі дәрігерлерге тексеріліп жүруге кеңес береміз. Марафонда баршаңызға сәттілік тілеймін!» – деді қала әкімінің орынбасары Төлеген Кенжебеков ашылу салтанатында.

    Ал қалалық көпсалалы аурухана директорының орынбасары Айсұлу Оңғарова сүт безі қатерлі ісігі жайлы деректерге тоқталып өтті.

    «Қызғылт қазан» – тек акция емес, бұл ауру туралы ақпараттандыру, қолдау мен әйелдер өмірін өзгертуге көмек көрсету айы. Егер обырды дер кезінде анықтаса, 90% жағдайда емделіп кетуге мүмкіндік бар. Маммологқа тексеріліп, УДЗ-дан жыл сайын өтіп тұрыңыздар. Бүгінгі марафон денсаулыққа ұмтылу мен тек алға бағыт алудың нышаны болсын! Бақыт, шаттық, табыс!» – деді ол.

    Жарыс нәтижесінде жеңімпаз атанғандарға бағалы сыйлықтар, медальдар мен ақшалай сыйлықтар табыс етілді.

    «30 жасқа дейінгілердің арасында 1-орынды иелендім. Жарыс өтетіні туралы естіген сәттен-ақ қатысуға бел будым. Ұйымдастырушыларға рақмет! Қаламыздың әйелдері аман болсын! Марафон жоғары деңгейде өтті», – деді Аделина есімді қатысушы пікірін білдіріп.

    Сонымен қатар жылжымалы медициналық кешенде 65 әйел маммография мен УДЗ-дан тегін өтті.

    Қонаев қаласының әкімдігі марафонның өтуіне демеушілік көрсетіп, серіктес болған кәсіпкерлерге алғысын білдіреді.

  • Қонаевта Мүгедектігі бар адамдар күні аталып өтті

    Қонаевта Мүгедектігі бар адамдар күні аталып өтті

    Шараға ерекше балалар мен олардың ата-аналары, әлеуметтік сала мамандары және қоғамдық ұйым өкілдері қатысты.

    Іс-шараны қала әкімі Асхат Бердіханов ашып, қатысушыларды мерекемен құттықтады. Ол мемлекет тарапынан мүгедектігі бар азаматтардың өмір сапасын жақсартуға және әлеуметтік қолдау шараларын күшейтуге айрықша көңіл бөлініп отырғанын атап өтті.

    «Бүгінде Қонаев қаласында 1416 мүгедектігі бар азамат, оның ішінде 325 ерекше бала бар. «Жеке оңалту бағдарламасы» аясында 240 адам санаторийлік жолдамамен, 46 азамат арба және тифло-сурдо құралдарымен қамтамасыз етілді», – деді ол.

    Бұдан бөлек, шаһар басшысы үйде білім алатын балалардың отбасыларына 31 456 теңге көлемінде жәрдемақы төленіп жатқанын айтты.

    «Биыл үш ерекше баласы бар отбасы өз кәсібін бастауға грант алды. Бұл – мемлекетіміздің әлеуметтік әділдік пен тең мүмкіндіктер қағидатына деген берік ұстанымының айғағы», – деді қала әкімі.

    Асхат Бердіханов ерекше жандарды қоғам өміріне бейімдеуге үлес қосып жүрген азаматтарға алғысын білдірді.

    Марапат иелері қатарында «Қапшағай Самға» қоғамдық бірлестігінің жетекшісі Марат Бекенұлы, «Қамқор жүрек» бірлестігінің басшысы Ләззат Иманғалиқызы, сондай-ақ «Мейірім Қонаев-2025», «Алтын бала», «Ерекше балалар ата-аналарының одағы», «Күндізгі болу орталығы» ұйымдарының жетекшілері бар. Өнерпаз балалар да назардан тыс қалмай, оларға Алғыс хат табысталды.

    Мерекелік кеш концерттік бағдарламаға ұласып, ерекше балалар мен олардың ұстаздары ән шырқап, би биледі. Балаларға қуаныш сыйлау мақсатында аниматорлар мен түрлі ойындар ұйымдастырылды, ал «KazSMU» құрылыс компаниясы бүлдіршіндерге сыйлықтар тарту етті.

    Шара соңында қатысушылар естелік суретке түсіп, мейірім мен қуанышқа толы сәттердің куәсі болды.

  • Қонаевта «Қызғылт қазан» марафоны өтеді

    Қонаевта «Қызғылт қазан» марафоны өтеді

    ҚЫЗҒЫЛТ ҚАЗАН – сүт безі жайында ақпараттандыру, ауруға қарсы күресетін ай.

    Бұл ауру ерте анықталса, жазылып кету мүмкіндігі 90%-дан асады.

    Жыл сайын миллиондаған әйел осы дертке шалдығады. Дегенмен, уақтылы тексеру мен алдын алудың арқасында олардың көбінің бойына шипа дарып, саулығын сақтап келеді.

    Қонаев қаласы да әлемдік Pink October қозғалысына қосылады. 18 қазан сағат 9.00-де орталық аллеяда марафон өтеді. Іс-шара аясында флешмоб, скандинавиялық жүріс те ұйымдастырылады. Сондай-ақ бұл күні әйелдер кешкі 16.00-ге дейін маммография мен УДЗ-ға тегін тексеріле алады.

  • Қонаевта «Ауылым – алтын бесігім» мәдениет күндері өтті

    Қонаевта «Ауылым – алтын бесігім» мәдениет күндері өтті

    Алматы облысында әр аудан, қалада «Ауылым – алтын бесігім» мәдениет күндері өтіп жатыр.

    Қонаевтағы іс-шара күрделі жөндеуден өтіп, қолданысқа берілген кітапхана жұмысымен танысудан басталды. Қазір мұнда 90 мыңға жуық кітап бар. Оқырман залында балалар шығармашылығы мен шетелдік шығармалар, тіпті, 100 жылдық бірегей кітаптар да орын тепкен. Сондай-ақ мұнда кітап алу, өткізу жүйесі автоматтандырылған, арнайы бағдарлама арқылы жүзеге асырылады.

    Алдағы уақытта кітапханада жастарға арналған TikTok аймақ ашылады деп күтілуде.

    Содан кейін комиссия мүшелері Б.Соқпақбаев атындағы Орталық саябаққа барып, амфитеатр мен балалар жазушысының ескерткішін көрді.

    Іс-шара Мемлекет және қоғам қайраткері Д.Қонаевтың ескерткішіне гүл шоқтарын қоюмен жалғасты. Ал Мәдениет үйінің ауласында киіз үй тігіліп, бесікке бөлеу дәстүрі көрсетілді. Түрлі ұлт өкілдері де қалыс қалған жоқ. Олар көрме ұйымдастырып, мәдени мұраларын паш етті. Мәдениет күндері концерттік бағдарламаға ұласты.

  • Қазақстанда Джеки Чан түскен «Доспехи бога» фильмінің төртінші бөлімі түсіріледі

    Қазақстанда Джеки Чан түскен «Доспехи бога» фильмінің төртінші бөлімі түсіріледі

    Атақты актер әрі режиссер Джеки Чан өз мансабындағы ең танымал рөлдерінің біріне қайта оралады — «Доспехи бога» культтік франшизасының төртінші бөлімі Қазақстанда түсірілмек, деп хабарлайды Sona.kz Hola.news-ке сілтеме жасап.

    Кинокомпания өкілдерінің айтуынша, жобаға қатысты алғашқы келіссөздер Бейжіңде өткен, алайда түсірілім орнын Қазақстанға ауыстыру туралы шешім қабылданған. Бұл — елімізде жүзеге асырылатын ең ірі халықаралық кино жобалардың бірі болмақ.

    «Қазақстанның түсірілім алаңы ретінде таңдалуы — үлкен мәртебе. Бұл отандық кино индустриясының дамуына және елдің халықаралық имиджіне зор үлес қосады», — деді компания өкілдері.

    Түсірілімдердің бір бөлігі Алматыда, Шарын шатқалында және Бурабайда өтеді деп жоспарлануда. Жобаға қазақстандық мамандар мен актерлер де тартылады.

    «Құдайдың сауыт-сайманы» фильмі алғаш рет 1986 жылы жарық көріп, Джеки Чанның ең әйгілі туындыларының біріне айналған еді. Онда актер ежелгі жәдігерлерді іздеп, жауыз ұйымдарға қарсы күрес жүргізетін батыр археологтың рөлін сомдайды.

    Жаңа бөлімнің тұсаукесері 2026 жылы өтеді деп күтілуде. Қазақстан фильмнің басты түсірілім және таныстыру алаңдарының бірі болмақ.

  • Ұлағатты ұстаздар марапатталды

    Ұлағатты ұстаздар марапатталды

    Бұл күні сапалы білім беруде ерен еңбек сіңірген педагогтер марапатталып, оқушылар мен жас мамандар өз өнерлерін паш етті.

    Алғашқы құттықтау сөзін алған шаһар басшысы Асхат Бердіханов мектептердің кезең-кезеңімен заманауи жабдықталып, күрделі жөндеуден өтіп, жылдан жылға білім сапасы артып келе жатқанын тілге тиек етті.

    «Ұстаз – жас ұрпақтың тағдырын қалыптастыратын, елдің ертеңін айқындайтын ұлы тұлға. Қаламызда білім беру саласы жүйелі түрде жаңғырып келеді. Мектептеріміз кезең-кезеңімен күрделі жөндеуден өтіп, заманауи талаптарға сай жабдықталуда. Мәселен, Қ.Қайсенов атындағы №4 орта мектептің жөндеу жұмыстары толық аяқталса, биыл А.Жұбанов атындағы №5 орта мектепте күрделі жөндеу жүргізілуде», – деді ол.

    Сонымен қатар әкім биік белестерді бағындырған озат оқушылар мен мұғалімдерді ерекше атап өтті.

    «Бүгінгі шәкірттер – ертеңгі елдің тірегі, мемлекетіміздің болашағы. Сіздердің әрбір еңбектеріңіз – ұлт игілігіне қосылған үлес. Баршаңызға зор денсаулық, отбасыларыңызға амандық пен бақ-береке, еңбектеріңізге мол табыс тілеймін!» – деді Асхат Бердіханов.

    Салтанатты шара кезінде кей ұстаздарға Оқу-ағарту министрінің Құрмет грамотасы берілсе, ал басқалары Алматы облысы әкімінің және қала әкімінің Алғыс хатымен марапатталды. Сондай-ақ мерекеде 30-40 жыл педагогика саласында қызмет еткен ардақты мұғалімдер сый-құрметке бөленді.

    «Педагогика – табандылық пен ізгілікті, шыдамдылық пен ізденісті талап ететін сала. Жақында қаламыздың 55 жыл мерейтойы аталып өтті. Енді міне кәсіби мерекемізді тойлап отырмыз. Келер ұрпақ ел іргесін мығым ұстайтын алғыр, парастты болып өссін. Баршаңызды айтулы күнмен құттықтаймын», – деді Кербұлақ ауылының ардагер ұстазы Асия Солтаева.

    Кеш Ұлт ұстазы – Ахмет Байтұрсынұлы туралы қойылымға ұласып, концерттік бағдарламамен жалғасты

  • Ақтауда түркі халықтарының “Қорқыт ата” халықаралық кинофестивалі ашылды

    Ақтауда түркі халықтарының “Қорқыт ата” халықаралық кинофестивалі ашылды

    Ақтауда алғаш рет түркі елдерінің “Қорқыт ата” халықаралық кинофестивалінің салтанатты ашылу рәсімі өтті, деп хабарлайды Sona.kz Маңғыстау облысы әкімдігіне сілтеме жасап.

    Іс-шараға Маңғыстау облысы әкімінің бірінші орынбасары Асхат Оралов, Халықаралық ТҮРКСОЙ ұйымының Бас хатшысы Сұлтан Раев, Ұлттық киноны қолдау мемлекеттік орталығы басқарма төрағасы Құрманбек Жұмағали және Әзербайжан, Түркия, Түрікменстан, Қырғызстан, Өзбекстан, Венгрия мен Қазақстаннан келген 250-ден астам өнер қайраткері қатысты.

    Қызыл кілеммен әлемдік өнер жұлдыздары жүріп өтті. Қонақтар фестивальдің алғашқы фильмін тамашалап, мәдени бағдарламаға қатысты.

    Асхат Оралов шара қонақтарын құттықтап, фестивальдің тек аймақ үшін ғана емес, бүкіл Қазақстан үшін маңызды екенін атап өтті. Оның айтуынша, “Қорқыт ата” кинофорумы бауырлас елдер арасындағы мәдени байланыстарды нығайтып, ортақ құндылықтарды дәріптеуге мүмкіндік береді.

    Бес күн бойы Маңғыстауда 50-ге жуық фильм тегін көрсетіліп, шығармашылық кездесулер мен тәжірибе алмасулар ұйымдастырылады. Фестивальге қазақстандық жұлдыздармен қатар, түрік актері Бурак Өзчивит те қатысады.

    Қонақтар Бозжыра, Айрақты, Торыш сынды Маңғыстаудың көрікті жерлерін аралап, өңір мәдениетімен жақынырақ танысады. Фестивальдің жабылу және марапаттау рәсімі 4 қазанда өтеді.