Sona.kz

Рубрика: Жаңалықтар

  • Amazon Web Services жүйесіндегі ақау әлем бойынша онлайн-сервистердің жұмысын тоқтатты

    Amazon Web Services жүйесіндегі ақау әлем бойынша онлайн-сервистердің жұмысын тоқтатты

    Amazon Web Services (AWS) қызметіндегі ірі ақау Zoom, Roblox, Canva, Amazon Prime Video секілді танымал платформалардың істен шығуына себеп болды, деп хабарлайды Sona.kz Tengrinews.kz және The Verge-ке сілтеме жасап.

    Ақау Астана уақытымен 13:11-де басталып, АҚШ-тағы Вирджиния штатында орналасқан US-EAST-1 деректер орталығын қамтыды. Бірақ оның салдары әлемнің өзге өңірлерінде де байқалып отыр.

    Компания мамандары қателер мен кідірістердің көбею себебін зерттеп, ақауды жоюға кіріскен.

    Downdetector мәліметінше, қиындықтар ондаған онлайн-қызметке әсер еткен:
    Canva, Zoom, Roblox, Fortnite, Snapchat, Slack, Duolingo, Epic Games Store, PlayStation Network, Signal, Tidal, Wordle, Perplexity AI және IMDB.

    Сондай-ақ ақау Ұлыбританиядағы банктер мен мемлекеттік мекемелердің жұмысына әсер етті — Bank of Scotland, Halifax, Lloyds Bank және HMRC.
    Мәселелер BT, Vodafone, Sky Mobile, Atlassian, Asana, Smartsheet және Square компанияларында да байқалуда.

    Пайдаланушылар Coinbase, Peloton, Eventbrite, Ring, Rocket League, Clash of Clans, Dead by Daylight сияқты қосымшаларға кіруде қиындықтар туралы хабарлап жатыр.

    Бұған ұқсас жағдайлар 2023, 2021 және 2020 жылдары да тіркелген — ол кезде дәл осы US-EAST-1 аймағындағы ақаулар бірнеше сағат бойы жаһандық сервистердің істен шығуына әкелген.

  • “Біз одан да қорқынышты нәрселер жасадық”

    “Біз одан да қорқынышты нәрселер жасадық”

    Атыраулық 23 жастағы Яна Легкодимованың өліміне қатысты сот процесі қоғам назарында тұр. Сот отырысында айыпталушылардың алдын ала қылмыс жоспарын талқылаған хат алмасулары жарияланып жатыр, деп хабарлайды Sona.kz Tengrinews.kz-ке сілтеме жасап.

    Іс басталар алдында күдіктілер алқабилер сотынан бас тартқан. Адвокаттың айтуынша, олар қоғам тарапынан болатын қысым мен айыптаудан қауіптеніп, істі тек судьяның қарауын жөн көрген.

    Сотта жарияланған хаттамадағы ең көп талқыланған сөйлемнің бірі:

    “Біз одан да қорқынышты нәрселер жасадық”.

    Жәбірленуші тараптың өкілі Ажар Абдилдің айтуынша, бұл сөздер айыпталушылардың өзге де қылмыстарға қатысы бар-жоғын анықтау үшін қосымша тергеу жүргізуге себеп болуы мүмкін.

    “Біз соттан қосымша тергеу жүргізу туралы жеке қаулы шығаруды сұраймыз”, — деді ол.

    Жәбірленуші тарап айыпталушыларға өмір бойы бас бостандығынан айыру жазасын тағайындауды талап етуде.

    Ажар Абдил тергеу тобының кәсіби жұмысын ерекше атап өтті:

    “Тергеуші дәлелдерді мінсіз жинады, тіпті өшірілген хат алмасуларды да қалпына келтірді. Бұл — тергеу мен соттың үйлесімді жұмысының нәтижесі”, — деді ол.

    Тергеу мәліметінше, Яна 2024 жылдың 18 қазанында танысының қоңырауынан кейін үйінен шығып кеткен. Курткасын алмаған — тез ораламын деп ойлаған. Алайда сол күні ол із-түзсіз жоғалып кеткен.

  • Бірнеше миллиардер қазақстандық футбол клубтарын сатып алмақ

    Бірнеше миллиардер қазақстандық футбол клубтарын сатып алмақ

    Қазақстанда бірқатар танымал кәсіпкерлер елдегі футбол клубтарын сатып алуды жоспарлап отыр. Бұл туралы Мәжіліс депутатының сауалына жауап берген премьер-министр Олжас Бектеновтің хатында айтылған, деп хабарлайды Sona.kz Azattyq Rýhy-на сілтеме жасап.

    Туризм және спорт министрлігі, Қазақстан футбол федерациясы және өңір әкімдіктері бірлесіп футбол клубтарын коммерцияландыру, яғни жекешелендіру бойынша әлеуетті инвесторлармен жұмыс жүргізіп жатыр.

     «Орталық Азия отын-энергетикалық компаниясы» АҚ (Сергей Кан) — «Қызыл-Жар» ФК сатып алу мүмкіндігін қарастыруда;
    Freedom Finance (Тимур Турлов) — «Шахтер» ФК үшін жаңа стадион мен футбол академиясын салуға қызығушылық танытқан;
    Kaspi Group (Михаил Ломтадзе) — «Жеңіс» ФК сатып алып, Астанада футбол инфрақұрылымын дамытуға ниетті;
    TAU GROUP LTD (Ислам Козбаков) — «Қайсар» ФК сатып алуды жоспарлап отыр.

    Сонымен қатар «Тараз», «Елімай» және «Иртыш» клубтарына да әлеуетті инвесторлар қызығушылық білдірген.

    Үкімет басшысы атап өткендей, жекешелендірудің 2021–2025 жылдарға арналған кешенді жоспары жаңартылып, тиісті қаулы жобасы мемлекеттік органдарға келісуге жолданған.

    Жаттықтырушылардың жалақысы өседі
    Бектеновтың айтуынша, спорт саласындағы жаттықтырушылардың еңбекақысы да кезең-кезеңімен көтеріледі.

    2022 жылдан бері азаматтық қызметшілердің жалақысы жыл сайын 20%-ға өсіп келеді, ал 2026 жылдан бастап балалар мен жасөспірімдер спорт мектептерінің жаттықтырушыларына қосымша 30% үстеме ақы төленбек. Бұл мақсатқа республикалық бюджеттен 1,8 млрд теңге бөлінеді.

    Сонымен қатар өңір әкімдіктері ауылдық жерлерде еңбек ететін спорт мамандарына жалақының 25%-ына дейін үстемақы тағайындай алады.

  • В Костанае изъяли 1 кг гашиша у 47-летнего мужчины — возбуждено уголовное дело

    В Костанае изъяли 1 кг гашиша у 47-летнего мужчины — возбуждено уголовное дело

    В Костанае сотрудники управления по противодействию наркопрестности ДП Костанайской области изъяли около 1 килограмма гашиша у местного жителя, передаёт Sona.kz со ссылкой на Polisia.kz.

    Операция проведена в рамках республиканского мероприятия «Қарасора – 2025», направленного на борьбу с незаконным оборотом наркотиков. Полицейские задержали 47-летнего мужчину в одном из гаражных массивов города. При осмотре у него обнаружили свёртки с веществом растительного происхождения зелёного цвета со специфическим запахом.

    Позже аналогичные свёртки были найдены и в гараже, где находился подозреваемый. Согласно результатам судебно-химической экспертизы, изъятое вещество оказалось гашишем, общей массой около 1 килограмма.

    Медицинское обследование также выявило в организме мужчины следы употребления наркотических веществ.

    По данному факту возбуждено уголовное дело по статье 296 УК РК — «Незаконное хранение наркотических средств в особо крупном размере». В настоящее время проводятся следственно-оперативные мероприятия, направленные на установление каналов поступления и возможных соучастников преступления.

    Полицейские напоминают, что за хранение и сбыт наркотических веществ в Казахстане предусмотрено наказание до 15 лет лишения свободы.

  • Шығыс Қазақстанда әлеуметтік нысандардың құрылысына бөлінген қаржы жымқырылған

    Шығыс Қазақстанда әлеуметтік нысандардың құрылысына бөлінген қаржы жымқырылған

    Шығыс Қазақстан облысы бойынша Қаржы мониторингі агенттігі «QazConstructions» ЖШС басшылығына қатысты 7 аудан мен елді мекендерде 11 әлеуметтік нысан салуға бөлінген қаражатты жымқыру дерегі бойынша сотқа дейінгі тергеу жүргізіп жатыр, деп хабарлайды Sona.kz ҚР ҚМА-ға сілтеме жасап.

    Күдіктілердің арасында компанияның бұрынғы директордың орынбасары бар, ол қазіргі таңда Құрчұм аудандық мәслихатының депутаты болып табылады.

    Тергеу мәліметінше, күдіктілердің заңсыз әрекеттері салдарынан төрт спорт-сауықтыру кешені мен жеті ауылды ауыз сумен қамтамасыз етуге арналған су құбыры желілері пайдалануға берілмеген.

    Жымқырылған қаражаттың жалпы сомасы 2 млрд теңгеден асады. Бұл ақша аффилиирленген кәсіпорындар арқылы қолма-қол алынып, Астанадағы элиталық тұрғын үйлер, Lamborghini Urus, Cadillac Escalade, Mercedes көліктері мен асыл тұқымды жылқыларды сатып алуға жұмсалған. Барлық мүлікке сот санкциясымен тыйым салынды.

    Күдіктілердің екеуі екі ай мерзімге қамауға алынды. Тергеу жалғасуда.

  • Лицензиясыз ота: Астанада әйел мұрын операциясынан кейін көз жұмды

    Лицензиясыз ота: Астанада әйел мұрын операциясынан кейін көз жұмды

    Ақтаудан келген 59 жастағы әйел Астанадағы жеке клиникада мұрын қалқасын түзету отасынан кейін қайтыс болды, Sona.kz Tengrinews.kz-ке сілтеме жасап хабарлайды.

    Әйел тыныс алу қиындығына байланысты септоринопластика жасатқан. Алайда отадан кейін жағдайы күрт нашарлап, оны аман алып қалу мүмкін болмады.

    Белгілі болғандай, «Medina Plastic Surgery» клиникасы операция кезінде лицензиясыз жұмыс істеген. Рұқсаттама тек екі аптадан кейін, әйел көз жұмған соң берілген.

    Ота жасаған дәрігер — биыл сәуірде 22 жастағы қызды комаға түсірген сол маман. Марқұмның туыстары дәрігерді жауапқа тартуды талап етуде.

    Денсаулық сақтау министрлігінің тексерісінен кейін клиниканың лицензиясы жойылып, іс полицияға берілді.

    Бұған дейін дәл осы клиникада риносептопластикадан кейін қыздың алты ай бойы комада жатқаны хабарланған болатын.

  • «Қызғылт қазан» марафонына 150-ге жуық әйел қатысты

    «Қызғылт қазан» марафонына 150-ге жуық әйел қатысты

    Қонаевта сүт безі қатерлі ісігіне қарсы айлық аясында «Қызғылт қазан» марафоны өтті.

    Оған 150-ге жуық әйел қатысты. Марафоншылар түрлі жас категориялары бойынша сынға түсті. Сондай-ақ қаланың белсенді жасы 50-ден асқан тұрғындары скандинавиялық жүріс бойынша жарысты.

    Марафоншылар Жамбыл көшесіндегі аллея арқылы жағажайға дейінгі және қайтар бағыттағы жолды еңсерді.

    «Қоғамда әйелдердің орны бөлек. Нәзік жандыларсыз біздің өмірді елестету мүмкін емес. «Қызғылт қазан» айы сіздердің денсаулықтарыңызға, қатерлі ісіктің алдын алуға бағытталған ай. Тәні саудың – жаны сау. Сол себепті үнемі дәрігерлерге тексеріліп жүруге кеңес береміз. Марафонда баршаңызға сәттілік тілеймін!» – деді қала әкімінің орынбасары Төлеген Кенжебеков ашылу салтанатында.

    Ал қалалық көпсалалы аурухана директорының орынбасары Айсұлу Оңғарова сүт безі қатерлі ісігі жайлы деректерге тоқталып өтті.

    «Қызғылт қазан» – тек акция емес, бұл ауру туралы ақпараттандыру, қолдау мен әйелдер өмірін өзгертуге көмек көрсету айы. Егер обырды дер кезінде анықтаса, 90% жағдайда емделіп кетуге мүмкіндік бар. Маммологқа тексеріліп, УДЗ-дан жыл сайын өтіп тұрыңыздар. Бүгінгі марафон денсаулыққа ұмтылу мен тек алға бағыт алудың нышаны болсын! Бақыт, шаттық, табыс!» – деді ол.

    Жарыс нәтижесінде жеңімпаз атанғандарға бағалы сыйлықтар, медальдар мен ақшалай сыйлықтар табыс етілді.

    «30 жасқа дейінгілердің арасында 1-орынды иелендім. Жарыс өтетіні туралы естіген сәттен-ақ қатысуға бел будым. Ұйымдастырушыларға рақмет! Қаламыздың әйелдері аман болсын! Марафон жоғары деңгейде өтті», – деді Аделина есімді қатысушы пікірін білдіріп.

    Сонымен қатар жылжымалы медициналық кешенде 65 әйел маммография мен УДЗ-дан тегін өтті.

    Қонаев қаласының әкімдігі марафонның өтуіне демеушілік көрсетіп, серіктес болған кәсіпкерлерге алғысын білдіреді.

  • Балалардың дамуына еңбек етемін – логопед

    Балалардың дамуына еңбек етемін – логопед

    Елімізде жыл сайын мыңдаған баланың ата-анасы логопедтің көмегіне жүгінеді. Тіпті, ауылда да мамандарға сұраныс жоғары.

    Бұл туралы логопед Гүлнұр Оразбекова айтты. Ол Кербұлақ ауданының тұрғыны. Биыл «Бастау бизнес» жобасына қатысып, 400 АЕК көлемінде мемлекеттік грант ұтып алған.

    «Балабақшада жұмыс істеп жүргенде логопед кабинетін ашуға ұсыныстар түсті. Негізгі мамандығым – педагог-психолог. Алайда, ойлана келе, логопед мамандығының қыр-сырын біліп, оқып алуды жөн көрдім. Осылайша, биыл Кербұлақтан оқу орталығын аштым», – деді маман.

    Айтуынша, қазір мұнда 3-6 жас аралығындағы 6 бала логопедтік қызмет алуда. Сондай-ақ бастауыш сынып оқушыларының білімін арттыру үшін қосымша сабақтар беріледі.

    «Балалардың тілі анық, ойы жүйелі болсын, білімге қызығушылығы артсын деген ниетпен еңбек етіп жүрміз. Біздің жұмыс арқылы қоғамға титтей пайдамыз тиіп жатса, қуаныштымыз», – деді логопед.

    Гүлнұр қазірде 4 баланың анасы. Жұбайы – қарапайым бригадир. Балалары ән мен биден үйірмеге қатысады.

    «Ауылда балалардың бос уақытын тиімді пайдалануы үшін үйірмелер көптеп ашылса деген тілегіміз бар. Басқа ауылдардан логопедтің көмегіне жүгінер ата-аналар болса, есігіміз әрдайым ашық. 20-25 баламен жұмыс істей аламыз», – деді ол.

    Гүлнұр Оразбекова сияқты еңбек адамдарының табандылығы мен ізденісі – қоғам дамуының басты тірегі. Осындай мамандардың арқасында ауылдағы балалар жаңа мүмкіндікке ие болып, өз әлеуетін ашуға жол табуда.

  • Жамбыл облысында түнгі аңшылық кезінде жасөспірім оқтан көз жұмды — полиция тергеу бастады

    Жамбыл облысында түнгі аңшылық кезінде жасөспірім оқтан көз жұмды — полиция тергеу бастады

    Жамбыл облысының Мойынқұм ауданына қарасты Құшаман ауылында қайғылы оқиға болды. Алдын ала мәліметке сүйенсек, 2012 жылы туған екі оқушы (сыныптасы) түнгі аңшылыққа шыққан, деп хабарлайды Sona.kz Halyqstan-ға сілтеме жасап.

    Ауыл тұрғындарының айтуынша, балалар қоян атуға барған. Олардың бірі қоянды жаралап, артынан іздеп кеткен. Сол сәтте екінші бала қашқан аңды тоқтатпақ болып оқ атқан, бірақ оқ досына тиіп кеткен.

    Ауыр жарақат алған жеткіншек оқиға орнында көз жұмған.

    Жамбыл облыстық полиция департаментінің мәліметінше, қазір ҚР Қылмыстық кодексінің 104-бабы — «Абайсызда адам өліміне әкеп соғу» бойынша сотқа дейінгі тергеу басталды.

    «Күдікті анықталып, полиция бөлімшесіне жеткізілді. Қазіргі уақытта істі жан-жақты және объективті тергеуге бағытталған барлық қажетті шаралар жүргізілуде. Сонымен қатар, балалардың ата-аналарына қатысты олардың тәрбиелеу және бақылау міндеттерін тиісінше орындамауына байланысты жауапкершілік мәселесі қаралуда. Себебі кәмелетке толмағандар түнде ересектердің қарауынсыз қалып, атыс қаруына қол жеткізген», — делінген ведомствоның ресми жауабында.

    Сондай-ақ полиция өкілдері тергеу мүддесіне байланысты өзге мәліметтер жарияланбайтынын атап өтті.

    Ауыл тұрғындарының айтуынша, қайғылы оқиғадан кейін аудан орталығының алаңына көптеген адам жиналған. Халық бұл жағдайға алаңдап, балалардың қалайша қаруға қол жеткізгенін және неге ересектердің бақылауынсыз қалғанын анықтауды талап етуде.

    Сарапшылар мұндай жағдайлар ата-аналардың жауапкершілігін және қару сақтаудың қауіпсіздігі жөніндегі талаптардың маңыздылығын тағы бір рет көрсетіп отыр.

    ? Еске салайық, Қазақстан заңнамасына сәйкес, қару иелері оны балалар мен бөгде адамдардың қол жеткізуіне жол бермейтін арнайы сейфтерде сақтауы тиіс. Бұл талаптарды бұзу әкімшілік және қылмыстық жауапкершілікке әкеп соғады.

  • ️Алматыда ана дәрігерлерді баласының өліміне кінәлады

    ️Алматыда ана дәрігерлерді баласының өліміне кінәлады

    Алматыда ана баласының өліміне дәрігерлерді айыптады. Желіде тараған бейнежазбада әйел жылап тұрып, дәрігерлер уақытында көмек көрсетпегенін айтады, деп хабарлайды Sona.kz Tengrinews.kz-ке сілтеме жасап.

    Айтуынша, 1-5 қазан аралығында бала іші ауырып, зәр шығара алмай, тамақ ішпей, қатты қиналған. 6 қазанда жағдайы күрт нашарлап, жансақтау бөліміне жеткізілген. Бірақ дәрігерлер баланың өмірін сақтап қала алмады.

    Бейнежазбада дәрігер: «Көрсеткіш болған жоқ», – дейді. Анасы көз жасын тыя алмай: «Қалай жоқ?! Ол тұтас мұздай болған!» – деп жауап береді.

    Сараптама қорытындысына сәйкес, баланың өліміне ішек бұралуы (заворот кишок) себеп болған. Бұл дерт дер кезінде және дұрыс ем қолданылған жағдайда жазылатын ауру.

    Бала туыстары оқиғаны дәрігерлердің салғырттығынан болды деп санайды.

    Алматы қалалық Қоғамдық денсаулық сақтау басқармасы оқиғаға байланысты объективті тексеру жүргізу үшін Денсаулық сақтау министрлігінің Медициналық және фармацевтикалық бақылау комитетіне хат жолдағанын хабарлады.
    «Тексеру және сот-медициналық сараптама нәтижесі бойынша түпкілікті қорытынды ұсынылады», – делінген басқарма мәлімдемесінде.