Sona.kz

Рубрика: Жаңалықтар

  • Қазақстанның бірнеше өңірінде діни радикалдар ұсталды

    Қазақстанның бірнеше өңірінде діни радикалдар ұсталды

    2025 жылғы қаңтарда ҰҚК полициямен бірлесе және прокуратура органдарының үйлестіруімен Алматы қаласында, Ақтөбе және Жамбыл облыстарында діни радикалдар әрекетінің жолын кесті.

    Терроризмді, оның ішінде телекоммуникация желілерін пайдалану арқылы насихаттады деген күдікпен 3 адам қамауға алынды.

    Екі фигурант бұрын денсаулыққа қасақана ауыр зиян келтіргені, қарақшылық жасағаны, есірткі заттарын заңсыз алғаны және сақтағаны үшін сотталған. Тағы біреуі бұрын шетелдік содырлар лагерлерінде дайындықтан өтіп, Қазақстанға тапсырмамен оралған, сонда ұсталып, сотталған. Ұзақ мерзімді жазасын өтеп бостандыққа шыққаннан кейін де радикалды идеологиядан бас тартпаған.

    Тергеу әрекеттері барысында олардың тұрғылықты мекенжайлары бойынша діни әдебиет және басқа да заттай дәлелдемелер тәркіленді.

    Қылмыстық кодекстің 256-бабы бойынша сотқа дейінгі тергеп-тексеру жүргізілуде. Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды.

  • Қырғызстанда виза беру тәртібі өзгеріске ұшырады

    Қырғызстанда виза беру тәртібі өзгеріске ұшырады

    Қырғызстан еліне іскерлік, туристік немесе басқа да жеке мақсаттармен баруды жоспарлап отырған шетел азаматтарына 22 қаңтардан бастап бір реттік немесе көп мәртелікпен 90 күнге дейінгі мерзімге «Сапар визасы» («J» түрі) енгізіледі. Осы орайда, бұған дейін қолданыста болған «іскерлік», «туристік», «тау туризмі» секілді визалық санаттар жойылады.

    Жаңалықтар 2025 жылдың 22 қаңтарынан бастап «Электрондық виза» порталында қолжетімді болады. 2024 жылдың 5 қыркүйегінен бастап Қырғызстанда шетелдіктерді визасыз тіркеудің жаңа тәртібі күшіне енгені хабарлаған-ды. Яғни, бұл – енді елдегі шетелдік студенттерге деген университеттің жеке жауапкершілігі арта түсті деген сөз.

  • Астанада электронды темекі сатқан адам сотталып кетті

    Астанада электронды темекі сатқан адам сотталып кетті

    Сот үкімімен қала тұрғыны Қылмыстық кодекстің 214-бабының 1-бөлігімен заңсыз кәсіпкерлік үшін 100 сағатқа мәжбүрлі еңбекке тарту арқылы, 1 жылға бас бостандығын шектеу жазасына сотталды.

    «Кінәлі тұлға құрамында никотині бар сұйықтықты өндіру бойынша цех ұйымдастырып, заңсыз өндірілген өнімдерді вейп сатумен айналысатын әртүрлі дүкендерге жалпы сомасы 64,4 млн теңгеге өткізген. Елорда прокуратурасы кінәлі тұлғадан мемлекет кірісіне заңсыз жолмен алынған кірістің барлық сомасын өндіру туралы азаматтық арыз келтіруге бастамашылық етті.

     

    Сот шешімімен қала прокурорының талап арызы қанағаттандырылып, сотталушыдан заңсыз жолмен алынған табыс сомасы толығымен өндірілді», – делінген прокуратура хабарламасында.

  • Тоқаев қайтыс болған полиция қызметкерін марапаттады

    Тоқаев қайтыс болған полиция қызметкерін марапаттады

    Алматы облыстық патрульдік полиция батальоны қызметінің инспекторы, аға лейтенант Шалқар Байжомартовты президент ІІІ дәрежелі «Айбын» орденімен марапаттады.

    Қаза тапқан қызметкердің марапатын ішкі істер министрінің орынбасары Айдын Сейтбеков әкесіне табыстады. Ол оған көңіл айтып, аға лейтенант Байжомартовтың батырлығын және азаматтардың қауіпсіздігін қамтамасыз етуге қосқан үлесін тілге тиек етті.

    «Ішкі істер органдарының қызметкерлері қылмысқа қарсы күрес пен тәртіпті қамтамасыз етуде әрқашан да алда жүреді. Шалқар өз өмірі үшін өз қызметіне адал екенін дәлелдеді», – деді Айдын Сейтбеков. 

  • Талғар ауданында теннис клубы отқа оранды

    Талғар ауданында теннис клубы отқа оранды

    Талғар ауданының Бесағаш ауылында әкімшілік ғимарат пен жеке теннис клубының құрылыстары отқа оранды.

    Алматы облысының Бесағаш ауылында әкімшілік ғимарат пен жеке теннис клубының құрылыстары отқа оранды. Өрт 1000 шаршы метрден астам аумақты қамтып, көрші үйге қауіп төндірді.

    «Талғар ауданының Бесағаш ауылында жеке теннис клубының аумағында әкімшілік ғимарат, тенттен жасалған каркасты құрылыс, теннис кортының жабыны мен үрлемелі күмбез жанды», – деп хабарлады Төтенше жағдайлар министрлігі

    Зардап шеккендер жоқ. Өрттің шығу себебі анықталуда.

  • Ақтөбеде оқиғаға байланысты облыс әкімі мәлімдеме жасады

    Ақтөбеде оқиғаға байланысты облыс әкімі мәлімдеме жасады

    Ақтөбе облысының әкімі Асхат Шахаров тұрғындардың кепілге алынуына қатысты мәлімдеме жасады.

    Бұл туралы әкім әлеуметтік желідегі парақшасында жазды.

    – Облыс орталығындағы қылмыскердің түндегі әрекеті қоғамда жан-жақты талқылануда. Бұл жағдайға қатысты қылмыстық іс қозғалып, тергеу амалдары жүргізіліп жатқанын айтқым келеді. Құқықтық бағасын құзырлы органдар беретін болады. Қазіргі уақытта зардап шеккен жәбірленушіге жан-жақты медициналық және психологиялық қолдау көрсетіліп жатыр.  Ал марқұм болған азаматтардың жерлеу рәсіміне қажетті көмектер ұйымдастырылады. Осы ретте күдіктіні ұстауда кірпік ілмей, кәсібилік танытқан полиция қызметкерлеріне алғысымды білдіремін. Қауіпсіздік шаралары – бақылауымда, дейді әкім.

    14 қаңтарға қараған түні Ақтбеде белгісіз біреу бір отбасының үйіне басып кіріп, үш адамды кепілді ұстаған болатын.

  • Нұрсұлтан Назарбаевтың қарындасына қарсы сотқа шағым түсірілді

    Нұрсұлтан Назарбаевтың қарындасына қарсы сотқа шағым түсірілді

    Алматы қаласы Түрксіб ауданының мемлекеттік кірістер басқармасы экс-президенттің қарындасы Әнипа Назарбаеваға қатысты сотқа талап арыз түсірді. 

    Бұл ақпарат Алматы экономикалық сотының анықтамасында көрсетілген. Мемлекеттік орган «CDM Group» компаниясының сатып алу-сату шартын заңсыз деп тануды сұрауда.

    Жауапкерлер қатарында Әнипа Назарбаевамен бірге «CDM Group» компаниясы, «Азаматтарға арналған үкімет» мемлекеттік корпорациясы және қазақстандық азамат Жанат Мамриева аталған.

    Сотқа жүгінген компания бастапқыда «ТДА Транзит Алматы» деген атаумен тіркелген. Оны 2015 жылдың наурызында Әнипа Назарбаева мен Әли Қылышпаев құрған. 2017 жылдың наурызында компания Жанат Мамриеваға қайта тіркеліп, атауын «CDM Group» деп өзгерткен. Алайда, не себепті Сотта «CDM Group» компаниясын сатып алу-сату шартын жарамсыз деп тану туралы талаптың себебі құжаттарда көрсетілмеген.

    Алғашқы сот отырысы 2025 жылдың 6 қаңтарына көрсетілгенмен сот процесі бойынша жаңа мәліметтер  жоқ.

  • Талғар аудандық полиция бөліміне жаңа басшы тағайындалды

    Талғар аудандық полиция бөліміне жаңа басшы тағайындалды

    Алматы облысы Талғар ауданының полиция бөліміне жаңа басшы тағайындалды, деп хабарлады аудандық полиция бөлімінің баспасөз қызметі.

    – Сіздерге Талғар ауданы Полиция басқармасының бастығы, полиция полковнигі Асхат Барлыбаевич Бекенов тағайындалғаны туралы хабарлаймыз, – делінген аудандық полиция бөлімінің баспасөз қызметі таратқан мәліметте.

    2024 жылдың желтоқсан айының басынан бері Талғар аудандық полиция бөлімі бастығының міндетін полиция подполковнигі Айдар Омаров атқарып келді.

    16 жастағы Шерзат Болаттың өлімінен кейін Алматы облысының полициясында кадрлық өзгерістер болған еді.

  • Шымкентте ер адам анасын пышақтап өлтірді

    Шымкентте ер адам анасын пышақтап өлтірді

    Шымкентте 30 жастағы жігіт туған анасын пышақтап өлтірді, – деп хабарлайды KTK арнасы.

    Қанды қылмысқа барған ол, тіпті үйін өртемекші болған. Түтінді көріп көмекке келген көршілеріне де күш көрсетпек болды.

    Көршілерінің айтуынша, күдіктінің психикалық ауытқуы болған. 54 жастағы анасын өлтіруге отбасылық жанжал себеп болуы мүмкін деген болжам бар.

    Қазір қылмыс болған үй жабық, есігі мөрленген. Жауыздыққа барған күдікті қамауға алынды. Полиция департаменті әзірге «кісі өлтіру» бабымен қылмыстық іс қозғап, сараптама тағайындаған.

  • Fly Arystan рейсінде ер адам бортсерік пен тағы бір жолаушыға қол көтерді

    Fly Arystan рейсінде ер адам бортсерік пен тағы бір жолаушыға қол көтерді

    Fly Arystan рейсінде жолаушы жан-жал шығарып бортсерікті ішінен ұрып тастаған, тағы бір жолаушыға қол көтерген. 

    Оқиға «Астана – Өскемен» бағытындағы рейсте болды. Бұл туралы Facebook парақшасында журналист Азамат Ерғалиев мәлімдеді. Оның айтуынша, 47 жастағы ер адам бортта өзін өте дөрекі ұстап, басқа жолаушыларға қарсы жанжал шығарып, тіпті Ерғалиевтің өзіне де қол көтерген. Сонымен қатар, жолаушының бұл әрекетіне байланысты рейс 3,5 сағатқа кешіктірілді. Барлық жолаушылардың қауіпсіздігі үшін олар әуежай ғимаратына шығарылған.

    «Жолаушы мас күйде бортсеріктің ішінен ұрып, ұшақтан шығатын кезінде «бомба» деп айғайлап, жолаушылар мен экипаж арасында дүрбелең туғызған», – деп хабарлады көлік полиция департаменті өкілдері.

    Сондай-ақ, полиция бұзақылық және терроризм актісі туралы жалған хабарлама беру фактілері бойынша қылмыстық іс қозғап, ер адам изоляторға қамалды.