Sona.kz

Рубрика: Қазақстан жаңалықтары

  • Елімізде жаңадан 12 футбол стадионы салынбақ

    Елімізде жаңадан 12 футбол стадионы салынбақ

    Бұл жайында Сенат депутаттарының сауалына Премьер-Министр Олжас Бектеновтің жауабында айтылған.  «Министрлік республика бойынша барлық спорт нысандарына түгендеу жұмыстарын жүргізді. Атап айтқанда, елімізде спорттың ойын түрлеріне арналған (футбол, волейбол, стритбол, воркаут) 6 100 жазықтық алаң бар, оның ішінде 1 200-ден астамы ауылдық жерлерде орналасқан.

    Ауылдық балалар мен жасөспірімдердің жыл бойы футболмен, мини футболмен және спорттық ойындармен шұғылдануы үшін 358 спорттық кешен қолданылады.  Елімізде 1 500-ден 30 000 орындық тиісті санаттағы 28 негізгі стадион бар, сондай-ақ Қызылорда қаласында 10 мың орындық трибуналары бар бір стадион салынып жатыр. Одан басқа елімізде 12 стадион құрылысы жоспарлануда. Осылайша, барлық стадиондарды УЕФА-ның халықаралық талаптарына сәйкестендіру бойынша жұмыстар кезең-кезеңмен жүргізілетін болады», – деді Үкімет басшысы жауабында.

    Сонымен қатар Премьер-министр Қазақстан футбол федерациясы УЕФА мамандарымен бірге 2034 жылға дейінгі қазақстандық футболды дамыту стратегиясын бекіткенін атап өтеді.

    – Стратегияда жалпы Қазақстанда кәсіпқой және әуесқой футболды кешенді дамытудың, футболшыларды даярлау жүйесін құрудың ерекшеліктері, футбол бизнесі индустриясын құру, халықаралық аренадағы спорттық нәтижелерді жақсарту бағытында кәсіпқой футболды трансформациялау қарастырылған, – деді Олжас Бектенов.

  • Полиция Қаржаубай Нұрымовты ұстап әкетті

    Полиция Қаржаубай Нұрымовты ұстап әкетті

    Марқұм Шерзат Болаттың әкесі Қаржаубай Нұрымовты БАҚ өкілдерімен кездесуді талап еткен соң полиция ұстады.

     «Бүгін сағат 15.30-да Азат ауылында жерлеу рәсімі кезінде қоғамдық тәртіпке және басқалардың, соның ішінде кәмелетке толмаған балалардың қауіпсіздігіне қауіп төндіретін оқиға орын алды. Азамат Н., прокурордың заңды сақтау туралы түсіндірмелерін елемей, өзін шектен тыс агрессивтілік танытып, басқаларға қорқытып, өз-өзіне қол жұмсаймын деп қорқытқан, сондай-ақ полиция қызметкеріне пышақпен шабуыл жасаған. Оның мінез-құлқы орынсыз болып, өзіне де, басқаларға да қауіп төндірді. Жағдайына алаңдаған азамат Н.-ның туыстары мен адвокаттарының өтініші бойынша оның өмірі мен айналасындағылардың өміріне зиян келтірмеу мақсатында полиция қызметкерлері оны ұстау шараларын қабылдады», – деп хабарлады Алматы облысы полиция департаментінің баспасөз қызметі.

    Қазір ол полиция бөліміне жеткізілді, онымен психологтар жұмыс істеп жатыр.

    «Полицейлер жағдайды тұрақтандыру жұмыстарын жалғастырып, азаматтарды сабырға шақыруда. Азаматтардан тек ресми дереккөздерге сеніп, жалған ақпарат тарату жауапкершілікке, соның ішінде қылмыстық жауапкершілікке әкеп соқтыратынын еске саламыз», – делінген хабарламада.

  • Шерзаттың әкесі «әділдік жоқ» деп өзіне қол салмақ болды

    Шерзаттың әкесі «әділдік жоқ» деп өзіне қол салмақ болды

    Алматы облысы, Еңбекшіқазақ ауданы, Азат ауылында марқұм Шерзат Болаттың әкесі Қаржаубай Нұрымов қолына пышақ ұстап, БАҚ өкілдерімен кездесуді талап етті.

     Сондай-ақ ол құқық қорғау органдарынан ұлы мен інісінің өлімінің мән-жайын шынайы түрде анықтауды сұрады.

    Әлеуметтік белсенділердің айтуынша, Нұрымов қазір жүк көлігінің төбесіне шығып, журналистермен кездесуді күтіп отыр. Оқиға орнында күш құрылымдары, бейбіт тұрғындар мен марқұмның туыстары бар.

    Шерзаттың әкесі әділдік жоқ деп өзіне қол салмақ болды.

  • Бокстан Азия чемпионатында Аида Әбікеева алтын алды

    Бокстан Азия чемпионатында Аида Әбікеева алтын алды

    Аида Әбікеева 63 келіге дейінгі салмақта вьетнамдық Линх Ха Тхимен шеберлік байқасты. Бірінші кезеңде Аида ширақ қимылдап, алға ұмтылған қарсыласын соққымен күтіп алып отырды – 5:0.

    Екінші раундта да жекпе-жек барысы өзгере қойған жоқ – 4:1. Үшінші кезеңде вьетнамдық боксшы басым болғанымен, қорытынды нәтиже 5:0 болды. Осылайша, Аида Әбікеева Қазақстан қоржынына екінші алтынды түсірді.

  • Алматыда «Абай» метро станциясында ер адам рельске құлап кетті

    Алматыда «Абай» метро станциясында ер адам рельске құлап кетті

    Алматы метросында адам өліміне әкелген қайғылы оқиға орын алды. 26 жастағы жігіт метро пойызының релсіне құлап кетіп, қайтыс болды. Аталмыш оқиғаның видеосы әлеуметтік желіде тарады.

    Алматы қаласының Полиция департаменті осы факт бойынша тергеу жұмыстарын бастады. Аталған дерек бойынша тергеу амалдары жүргізіліп жатыр. Оқиға салдарынан 26 жастағы зағип жігіт көз жұмды. Оқиғаның басқа да мән-жайлары анықталады, – деп хабарлады қалалық ПД баспасөз қызметі.

    Аталған факті бойынша тергеу амалдары жүргізілуде. Марқұмның көзі нашар көретіні белгілі болды. Басқа мән-жайлар анықталуда.

  • Әлеуметтік желіде марқұм Шерзат Болаттың ағасының көлігінен түсірілген кадрлар пайда болды

    Әлеуметтік желіде марқұм Шерзат Болаттың ағасының көлігінен түсірілген кадрлар пайда болды

    Әлеуметтік желіде марқұм Шерзат Болат ағасының көлігінен түсірілген кадрлар пайда болды. Видео авторы қайтыс болған Нұрқанат Ғайыпбаевтың осы жерде көз жұмғанын айтады. Алайда, жедел топ көлікті заңсыз жылжытып, оларға ештеңе көрсетпеді.

    «Көлікті марқұмның  туыстары оның денесі табылған жерге жақын тауып алған. Полиция қызметкерлері хабарлама түскен соң бірден оқиға орнына жеткен. Құқық қорғау органдарының қызметкерлері заңнамада белгіленген тәртіппен қажетті жедел-іздестіру іс-шараларын жүргізді, оның ішінде көлік құралын жан-жақты тексерді. Тексеруден кейін көлік жақын туыстарына берілді», — деп хабарлады полицейлер.

    Полиция тек ресми ақпарат көздеріне сенуді сұрады. Жалған ақпаратты тарату жауапкершілікке, соның ішінде қылмыстық жауапкершілікке әкелуі мүмкін.

  • Оқушылар қысқы каникулда неше күн демалады?

    Оқушылар қысқы каникулда неше күн демалады?

    Оқу-ағарту министрлігі ақпаратына сәйкес, қысқы каникул кезеңі 2024 жылдың 30-желтоқсаны мен 2025 жылдың 8-қаңтарын қоса алғанда он күнге созылады.

    Мектеп оқушыларының қысқы демалыстағы бос уақытын тиімді өткізу және жеке тұлғалық қасиеттерін дамыту мақсатында «Біртұтас тәрбие» бағдарламасы аясында іс-шаралар жоспары жасалды. Ол бойынша мектептерде бірқатар білім беру, спорттық, мәдени және шығармашылық іс-шаралар өткізу жоспарланған:

    • «Оқуға құштар мектеп» жобасын іске асыру аясында «Қыста кітап оқимыз, жадымызға тоқимыз» мектепішілік іс-шарасы;
    • театр фестивальдері мен қойылымдары;
    • жаңа жылдық әшекейлер жасау бойынша шеберлік сабақтары;
    • қауіпсіздік сабақтары;
    • мұражайларға, ғылыми орталықтарға және тарихи ескерткіштерге танымдық экскурсиялар;
    • спорттық ойындар, коньки, шаңғы тебу;
    • қайырымдылық акциялары және басқа да шаралар.

    Балалардың қауіпсіздігін қамтамасыз ету мақсатында ата-аналармен бірге жол-көлік жарақаттарының алдын алуға, мектептің ішкі тәртібін сақтауға, балалардың көшедегі қауіпсіздігіне, үйдегі өрт қауіпсіздігі және киберқауіпсіздікке ерекше назар аударылады.

  • Жол қауіпсіздігі: 620 дана белгі орнатылды

    Жол қауіпсіздігі: 620 дана белгі орнатылды

    Бұл туралы жолаушылар тасымалы және автомобиль жолдары бөлімінің басшысы Бағдат Алиев мәлімдеді.
    Оның сөзінше, қалаішілік жолдардың ұзындығы 213,81 шақырым, оның ішінде жақсы және қанағаттанарлық жағдайдағы жол 181,7 шақырымды немесе 85%-ды құрайды.

    «Биыл 9 көшенің жолына ағымдағы жөндеу, ал 22 көшеде шұңқырларды жамау жұмыстары жасалған. Бұдан бөлек, 8-10 шағынауданның жолы күрделі жөндеуден өтуде. Көшенің ұзындығы 14,3 шақырымды құрайды. Қазіргі таңда 35 пайыз құрылысы аяқталған. Жоба 2025 жылға өтпелі», – деді бөлім басшысы.

    Бағдат Алиевтің мәліметіне сүйенсек, Қапшағай су қоймасының жағалауы туристік картаға енгізілуіне байланысты биыл «Morelux» демалыс аймағына баратын жол ағымдағы жөндеуден өткен.

    «Жол қауіпсіздігін қамтамасыз ету мақсатында 620 дана белгі орнатылды, мүгедектігі бар адамдарға арналған 30 тұрақ белгісі қойылды, 3042 шаршы метр жолақ сызылды. Гүлдер, Арна, Восточный шағынаудандарына 23 аялдама қойылуда», – деді ол.

    Ал жолаушылар тасымалы мәселесіне келсек, қазір қалада 9 бағытта автобустар қатынап жүр. Қоғамдық көліктердің жалпы саны – 28. Ендігі жылы 4 автобус сатып алу жоспарланған.

    Сонымен қатар бөлім басшысы Кешенді даму жоспарына сәйкес, 16 жобаның сметалық құжаттары әзірленіп жатқанын атап өтті.

  • 50 мыңнан аса қазақстандық жалға берілген үйді жекешелендіре алады

    50 мыңнан аса қазақстандық жалға берілген үйді жекешелендіре алады

    Елімізде 50 мыңнан аса қазақстандыққа жалға берілген үйді жекешелендіруге мүмкіндік беріледі. Бұл туралы Өнеркәсіп және құрылыс министрі Қанат Шарлапаев айтты.

    Оның айтуынша, тұрғын үй саясатын реформалау шеңберінде, жергілікті атқарушы органдардың есепке қою және үйлерді бөлу функцияларын Ұлттық даму институты – Отбасы банкіне беруді көздейтін заң қабылданған. Бұл саясат үй алуды қолжетімді еткен.

    Тұрғын үйді бөлу, тіркеу күніне, және табыс деңгейіне байланысты іске асырылады. Бұл, алдымен ұзақ уақыт бойы кезекте тұратын азаматтарды үймен қамтамасыз етуге мүмкіндік береді.  Сондай-ақ әлеуметтік осал топтарға жалға берілген үйлерді жекешелендіруге мүмкіндік берілді. Бұл норма биыл 4 желтоқсанда күшіне енді. Нәтижесінде 50 мыңнан астам азамат баспаналы болады. Жалпы реформалау бойынша қарастырылған жаңа өзгерістер 2025 жылдың мамыр айында күшіне енгелі отыр, – деді Қанат Шарлапаев Үкімет отырысында.

  • Жәния Бекмұхамбетова Қазақстанның абсолютті чемпионы атанды

    Жәния Бекмұхамбетова Қазақстанның абсолютті чемпионы атанды

    Астанада үстел теннисінен жасөспірімдер арасындағы Қазақстан чемпионаты аяқталды. Турнирдің жеңімпазы – 11 жастағы Жәния Бекмұхамбетова. Спортшы үлкен жастағы қарсыластарымен жарысып, нәтижесінде Қазақстанның абсолютті чемпионы атанды. Ол жекелей, жұптық және аралас санаттарда алтын медаль жеңіп алды.

    Айта кету керек, қазіргі уақытта Жәния әлемдік рейтингте (U11) екінші орында тұр.

    Сонымен қатар Марлен Жұмағұл Қазақстан чемпионатында үш рет ең жоғары сатыға көтерілді. Екі алтын медальді Қарағандыдан келген Мария Лукьянова мен Абай Жұмағұл жеңіп алды.