Sona.kz

Рубрика: Қазақстан жаңалықтары

  • Оңтүстік Корея әскери төтенше жағдай жариялады

    Оңтүстік Корея әскери төтенше жағдай жариялады

    Оңтүстік Кореяда әскери жағдай жарияланды. Бұл туралы ел президенті Юн Сок Ёль халқына жолдауында мәлімдеді, деп хабарлайды Yonhap агенттігі.

    Бұған дейін Оңтүстік Корея президенті шұғыл кеңес өткізіп, өзіне импичмент жариялау әрекеті жасалғанын мәлімдеген болатын. Ол оппозицияны елдің негізгі қызметтерін орындау үшін қажетті «барлық маңызды бюджет қаражаттарын қысқартты» деп айыптады.

    «Солтүстік Кореяны жақтайтын күштерді жою және еркін конституциялық тәртіпті қорғау үшін әскери жағдай жариялаймын», – деді ол.

    Юн Сок Ёль бұл шешімді «адамдардың еркіндігі мен қауіпсіздігін қамтамасыз ету, сондай-ақ анти-мемлекеттік күштердің әрекеттерінен ел тұрақтылығын сақтау үшін қабылданған шара» деп атады.

    Өз сөзінде президент әскери жағдайдың азаматтарға белгілі бір қолайсыздықтар тудыруы мүмкін екенін атап өтті. Дегенмен, билік бұл қолайсыздықтарды барынша азайтуға тырысатынын айтты.

    Сыртқы саясатқа келсек, оның айтуынша, бұл онда өзгерістер болмайды. Оңтүстік Корея өз міндетін орындауды жалғастыра береді.

  • Елімізде 83,7 мыңнан астам қыз бала АПВ-ға қарсы екпе алды

    Елімізде 83,7 мыңнан астам қыз бала АПВ-ға қарсы екпе алды

    Қазақстанда адам папилломасы вирусына (АПВ) қарсы вакцинаны 11-13 жас аралығындағы 83,7 мыңнан астам қыз алды. Қазан айынан бастап инфекциялық және онкологиялық аурулардың алдын алу бойынша ұлттық бағдарлама аясында АПВ-ға қарсы ауқымды вакциналау науқаны басталды. Бұл вирус жатыр мойны обыры сияқты бірқатар онкологиялық аурулардың дамуына ықпал ететін ең кең таралған вирустардың бірі саналады, деп хабарлайды Денсаулық сақтау министрлігі.

    Жатыр мойны обыры Қазақстанда әйелдер арасындағы онкологиялық аурулардың ішінде сүт безі обырынан кейінгі екінші орында тұр. Әсіресе, 25-44 жас аралығындағы фертильді жастағы әйелдер арасындағы өлім-жітімнің басты себептерінің бірі болып табылады. Ұлттық канцер тіркелімінің мәліметінше, жыл сайын елде ЖМО-ның шамамен 2000 жағдайы анықталып, 600-ден астам әйел қайтыс болады. ҚазОРҒЗИ жүргізген зерттеулерде жатыр мойны обырының 74,2%-ында биопсия материалынан АПВ-ның 16 және 18 онкогендік түрлері табылған.

    «Екпе ата-аналардың немесе заңды өкілдерінің келісімімен мектептердің медициналық кабинеттерінде жасалады. Сондай-ақ, ата-аналардың өтініші бойынша вакцинация тіркелген емханаларда да жүргізілуі мүмкін. Қазіргі уақытта вакцинациядан кейін ешқандай жағымсыз әсер тіркелмеген. Вакцинаның жатыр мойны обырының алдын алудағы жоғары тиімділігі АҚШ, Аустралия, Канада, Дания, Швеция, Финляндия, Шотландия сияқты елдерде дәлелденген», — делінген хабарламада.

  • Биыл Қазақстанда 16,7 млн мұнай өңделді

    Биыл Қазақстанда 16,7 млн мұнай өңделді

    2024 жылдың 11 айының қорытындысы бойынша Қазақстанның мұнай өңдеу зауыттарында мұнай өңдеу көлемі 16,7 млн тоннаға жетті. Бұл 2023 жылдың сәйкес кезеңімен салыстырғанда 3,6%-ға артық.

    Биылғы есепті кезеңде мұнай өнімдерін өндіру көлемі:

    • автобензин – 4,88 млн тонна немесе 2023 жылға 101,1%;
    • дизель отыны – 4,91 млн тонна немесе 2023 жылға 103%;
    • авиакеросин – 0,68 млн тонна немесе 2023 жылға 118,6%.

    Бүгінде қазақстандық мұнай өңдеу зауыттары тұрақты жұмыс істейді, жанар-жағармай материалдарының (ЖЖМ) қорларын тиеу және толықтыру үздіксіз іске асырылады.

  • Президент Сауд Арабиясына жұмыс сапарымен барды

    Президент Сауд Арабиясына жұмыс сапарымен барды

    Мемлекет басшысы Қасым-Жомарт Тоқаев One Water саммитіне қатысу үшін Сауд Арабиясына жұмыс сапарымен барды.

    Халықаралық форум Қазақстан мен Францияның төрағалығымен, Сауд Арабиясы және Дүниежүзілік банк тобының қолдауымен өтеді.

    Сонымен қатар Президент Эр-Риядта бірқатар кездесу өткізуді жоспарлап отыр.

  • Оқулықтағы қателіктерге кім жауапты? – Министр жауабы

    Оқулықтағы қателіктерге кім жауапты? – Министр жауабы

    Журналистер министрден «Қазан айының басында Мәжілістің комитетінде оқу бағдарламасының мазмұнын жаңарту мәселесі қаралды. Оқу бағдарламасы қашан жаңартылады, кітаптар біркелкі әрі салмағы жеңіл болатындай бір ізге түсе ме?», – деп сұрады.

    «Оқулықтарға қойылатын талаптарға қатысты заңнамалық актілер толық қабылданған. Енді көбінесе бұл мәселені шешуде мектептердегі оқулықтарды шығаратын баспалардың осы тәртіпті сақтауына да байланысты. Екіншіден, жалпы мына мектептегі сабақ кестесіне қойылатын сабақтардың да санына өте байланысты екенін айта кеткен жөн. Бұрыннан келе жатқан дәстүрлі ережелер бар, соны қатаң сақтайтын болса, онда бұл мәселе қатты ушықпауы да мүмкін. Жалпы оқу бағдарламасына келсек, оқулық жаңаруы үшін бірінші кезекте стандарт жаңаруы керек. Қазір стандарт талқылану үстінде. Ол бекітілгеннен кейін оқу бағдарламалары қабылданып, соның негізінде оқулықтар жазылатын болады», – деді Ғани Бейсембаев Үкімет отырысынан кейінгі брифингте.

    Министр оқулықтарда кетіп жатқан қателіктерге жеке тоқталды. Сөзінше, бұл бағытта үлкен сараптамалық жұмыстар жүргізілген.

    «26 оқулықтағы қателіктер бары туралы резонанстық мәселе тудырған ақпараттар келіп түсті. Тек 11-інде ғана осындай қателіктердің бар екенін анықтадық. Қалғанында жалған ақпарат болып шықты. Сол 11 оқулықтағы қателіктерге қатысты 8-ін былтыр ауыстырдық, қалған оқулықтарды осы жылы баспалар ауыстырып жатыр. Оқулықтарда қателіктерді болдырмау бағытында баспалардың да жауапкершілігі қазір заңды тұрғыда күшейтіліп отыр. Бұдан былай баспа оқулықта қате жіберетін болса, онда өзінің қаржысы есебінен осы қателіктерді жөндеуге міндеттеледі. Мұндай шара ағылшын тілінің оқулығына байланысты қолданылды. 2022 жылы кеткен қателікке байланысты баспа түгелдей оқулықты өз есебінен ауыстырған болатын», – деді Оқу-ағарту министрі.

  • Үш жылда ауылдарда 180 мектеп салынады

    Үш жылда ауылдарда 180 мектеп салынады

    Ауылдық аумақтарды дамыту тұжырымдамасы шеңберінде 2027 жылға дейін 180-ге жуық мектеп салу жоспарланған.

    Үкімет басшысы қазір ауыл мектебі – тек білім ордасы ғана емес, жергілікті халық үшін мәдениет ошағына, рухани орталыққа айналғанын, Мемлекет басшысы ауыл мектептерін дамытуға ерекше көңіл бөліп отырғанын атап өтті.

    Биыл «Жайлы мектеп» ұлттық жобасын қоса алғанда, ауылдарда 42 мектеп пайдалануға берілді.

    «Соңғы үш жылда ауылдарда 2,5 мыңға жуық мектеп жаңғыртылды. Оқыту жағдайларын жақсарту және жайлы орта құру мақсатында 800-ден астам мектепті қайта жаңарту жұмысы жүргізіліп жатыр. Сондай-ақ ауыл мектептері үшін 4 мыңнан астам пәндік кабинет сатып алынды. Оқу-ағарту министрлігі жыл соңына дейін өңірлерге мектептерді қайта жаңартудың бірыңғай талаптарын ұсынуы керек. Онда білім ошақтарын күрделі жөндеу ғана емес, пәндік сыныптармен жабдықтау мәселесі де қаралуға тиіс», – деді О.Бектенов Үкімет отырысында.

    Ауылға білікті педагогтерді тарту мақсатында лауазымдық жалақыға 25% мөлшерінде қосымша ақы көзделген.

    Сондай-ақ, «Дипломмен ауылға» бағдарламасы шеңберінде педагогтерге көтерме жәрдемақы төленеді, сондай-ақ тұрғын үй сатып алуға немесе салуға тиімді несиелер беріледі.

  • Апелляциялық сот Дәулет Тұрлыхановтың ұлына қатысты үкімді қайта қарады

    Апелляциялық сот Дәулет Тұрлыхановтың ұлына қатысты үкімді қайта қарады

    Алматы қалалық сотының апелляциялық инстанциясы депутаттың ұлы Нұрасыл Болаттың ісін қарады.

    – Апелляциялық шағым қаралып, өзгеріссіз қалдырылды, – деп хабарлады Алматы қалалық сотының баспасөз қызметі.

    Айта кетейік, депутат Дәулет Тұрлыхановтың ұлы Нұрасыл Болаттың адвокаттары апелляциялық шағым түсірген болатын.

    Еске сала кетсек, Алматы қаласы Медеу ауданының No2 аудандық соты пробация қызметінің Нұрасыл Болатқа қатысты жазаны – бас бостандығын шектеуді одан айырумен ауыстыру туралы өтінішхатын негіз деп танып, оны 1 жыл 5 ай 10 күнге бас бостандығынан айырған еді.

  • Ішкі істер министрлігі ата-аналарға үндеу жасады

    Ішкі істер министрлігі ата-аналарға үндеу жасады

    Бейнежазбада ІІМ Есірткі қылмысына қарсы күрес комитеті төрағасының орынбасары Қуандық Әлжанов ата-аналарға арнап сөз сөйледі.

    «Мен сіздерге ішкі істер органдарының қызметкері ретінде емес, ең алдымен әке ретінде үн қатқым келеді. Соңғы жылдары Қазақстанда, әсіресе, жасөспірімдер мен жастар арасында есірткі қылмысының көбею үрдісі байқалуда. Олар қарапайым отбасының балалары», – деді Әлжанов.

    Оның айтуынша, жасөспірімдер көбіне есірткі қылмысына интернет, әлеуметтік желі немесе таныстары арқылы тартылады. Оларға оңай әрі жылдам ақша уәде етіледі, бірақ мұндай жолдың соңы қайғылы жағдайларға ұласатынын бала біле бермейді.

    «Кінәні мектептен, интернеттен немесе айналамыздағы адамдардан іздеуге бейімбіз. Бірақ бәрі үйден басталатынын мойындауымыз керек», – деп атап өтті Әлжанов.

    Ол ата-аналарды балаларымен ашық сөйлесуге шақырды.

    «Егер бала өзіне қызықтырған сұрағына үйден жауап таба алмаса, оны көшеден іздейді. Біз бірге олардың болашағын қауіпсіз әрі бақытты ете аламыз», – деп түйіндеді ол.

  • Жетісуда 72 млн теңгенің газ құбырларын ұрлағандар ұсталды

    Жетісуда 72 млн теңгенің газ құбырларын ұрлағандар ұсталды

    Жетісу облысы Ақсу ауданында 72,5 млн теңгенің газ құбырларын ұрлағандар құрықталды.

    Polisia.kz мәліметінше, тәртіп сақшыларына «Транс Азия Констракшн» ЖШС директоры арызбен жүгінген. Оның айтуынша, белгісіз адамдар Алматы – Өскемен тас жолының Қызылағаш және Жансүгіров ауылдарының арасындағы учаскесінде орнатылып жатқан 27 бірлік газ құбырын ұрлап кеткен.

    Магистральдық газ құбырының құрылысы Талдықорған – Үшарал тас жолында жүргізіліп жатыр. Оның құны 131,7 млрд теңгеге бағаланады. Жоба 302 км газ құбырын салуды, алты автоматтандырылған газ тарату станциясын орнатуды әрі жалпы халқы 124 мыңға жуық 66 елді мекенді газбен қамтамасыз етуге бағытталған, – делінген ақпаратта.

    Жетісу облысының полиция қызметкерлерінің жедел іс-қимылдарының арқасында Алматы облысының тұрғындары болып шыққан үш күдікті анықталып, қолға түсті. Ұсталғандардың барлығы қамауға алынды. Оларға қатысты сотқа дейінгі тергеу жүргізіліп жатыр.

    Сақшылар заңның орындалуын қамтамасыз етіп қана қоймай, әлеуметтік маңызы бар жобаны жүзеге асырылуына маңызды үлес қосты. Олардың жедел жұмысы өңірдің мыңдаған тұрғынына табиғи газға қол жеткізуді қамтамасыз ететін газ құбыры құрылысының бұзылуын болдырмауға мүмкіндік берді. Құқық қорғау органдары қызметінің арқасында адамдардың үйлеріне жылу мен жайлылық келеді, ал өмір сүру сапасын жақсартуға бағытталған жоба мерзімінде іске асырылады.

  • Алматы-Шелек-Қорғас тас жолындағы жол апатынан бір адам көз жұмды

    Алматы-Шелек-Қорғас тас жолындағы жол апатынан бір адам көз жұмды

    2024 жылдың 2 желтоқсанында Алматы-Шелек-Қорғас автожолының 40-шақырымында ауыр жол-көлік оқиғасы болды.

    Алдын ала ақпарат бойынша, 32 жастағы Nissan Teana көлігінің жүргізушісі қауіпсіз қашықтықты сақтамай, Beiben жүк көлігімен соқтығысқан.

    Оқиға салдарынан жеңіл көліктің жүргізушісі алған ауыр жарақаттарынан оқиға орнында қайтыс болды.

    «Қазіргі уақытта аталған факті бойынша сотқа дейінгі тергеу амалдары басталды. Құқық қорғау органдары жүргізушілерге жол қозғалысы ережелерін сақтау, сондай-ақ қауіпсіз қашықтықты ескерудің маңыздылығын тағы да еске салады», – делінген хабарламада.