Sona.kz

Рубрика: Қазақстан жаңалықтары

  • Бүгін елімізде ауа райы қандай болады?

    Бүгін елімізде ауа райы қандай болады?

    Еліміздің көптеген аймақтарында құбылмалы ауа райы сақталады. Кей жерлерде қар жауып, тұман түседі. Ал оңтүстік пен батыста ауа температурасы сәл жоғарылап, күн ашық болады деп күтілуде.

    Жетісу облысы

    Жетісу облысының солтүстігінде, шығысында, таулы аудандарында тұман, көктайғақ күтіледі.

    Батыс Қазақстан облысы

    Түнде және таңертең Батыс Қазақстан облысының батысында, солтүстігінде тұман күтіледі. Орал қ.: 03 желтоқсан түнде және таңертең тұман күтіледі.

    Астана

    Астана қ.: 03 желтоқсанда тұман күтіледі.

    Қызылорда облысы

    Қызылорда облысының солтүстігінде, орталығында тұман күтіледі. Қызылорда қ.: 03 желтоқсанда кей уақытта тұман күтіледі.

    Түркістан облысы

    Түркістан облысының оңтүстігінде, солтүстігінде, батысында, таулы және тау бөктерлі аудандарында тұман күтіледі. Шымкент қ.: 03 желтоқсанда түнде және таңертең тұман күтіледі. Түркістан қ.: 03 желтоқсанда түнде және таңертең тұман күтіледі.

    Абай облысы

    Абай облысының батысында, шығысында, оңтүстігінде тұман, көктайғақ күтіледі.

    Ұлытау облысы

    Түнде және таңертең Ұлытау облысының солтүстігінде, орталығында тұман күтіледі. Жезқазған қ.: 03 желтоқсанда түнде және таңертең тұман күтіледі.

    Қарағанды облысы

    Түнде және таңертең Қарағанды облысының солтүстігінде, шығысында, оңтүстігінде тұман күтіледі. Қарағанды қ.: 03 желтоқсанда түнде және таңертең тұман күтіледі.

    Атырау облысы

    Түнде және таңертең Атырау облысының шығысында тұман күтіледі.

    Маңғыстау облысы

    Түнде және таңертең Маңғыстау облысының солтүстігінде тұман күтіледі.
    Қостанай облысы

    Қостанай облысы

    Қостанай облысының оңтүстігінде, шығысында тұман күтіледі.

    Шығыс Қазақстан облысы

    Шығыс Қазақстан облысының батысында, солтүстігінде, шығысында тұман, көктайғақ күтіледі.

    Ақмола облысы

    Ақмола облысының батысында, оңтүстігінде, шығысында тұман күтіледі.

    Солтүстік Қазақстан облысы

    Түнде және таңертең Солтүстік Қазақстан облысының батысында, оңтүстігінде тұман күтіледі. Оңтүстік-батыстан жел соғады, күндіз облыстың батысында, оңтүстігінде екпіні 15-20 м/с.

    Алматы облысы

    Алматы облысының солтүстігінде, оңтүстігінде, таулы аудандарында кей уақыттарда тұман күтіледі. Алматы қ.: 03 желтоқсанда түнде және таңертең кей уақыттарда тұман күтіледі. Конаев қ.: 03 желтоқсанда түнде және таңертең кей уақыттарда тұман күтіледі.

  • Қонаевта алғаш рет тұрғындар арасында спартакиада өтті

    Қонаевта алғаш рет тұрғындар арасында спартакиада өтті

    Бұл шара халық арасында бұқаралық спорт түрлерін насихаттау мақсатында және «Нашақорлыққа жол жоқ!» ұранымен өтті.

    Спартакиаданың ашылу салтанатына қала әкімі Асхат Бердіханов пен облыстық ПД Есірткі қылмысына қарсы іс-қимыл басқармасы бастығының орынбасары Дастан Жексенбеков қатысып, спортшыларға сәттілік тіледі.

    «Дені сау ұрпақ – ұлт болашағы. Сол себепті де Қонаевта турнирлар, біріншіліктер, спартакиадалар көптеп өтіп жатыр. Біздің мақсат – бұқаралық спорт түрімен айналысушылардың санын көбейту. Ол үшін ауқымды жұмыстар атқарылады деп жоспарлап отырмыз. Қатысушыларға сәттілік серік болсын дегім келеді», – деді Асхат Бердіханов өз сөзінде.

    Жарысқа қаладағы 8 шағынаудан мен Шеңгелді ауылының командалары қатысты. 100-ден астам спортшы 6 ойын түрі бойынша бақ сынасты. Оның қатарында гір тасын көтеру, арқан тарту, қол күресі секілді қазақтың ұлттық ойындары да болды.

    Қорытынды бойынша бірінші орынды 3-шағын ауданының «Тұлпар» командасы иеленсе, екінші орынға 4-шағын ауданының «Барыс» командасы табан тіреді. Ал жүлделі үшінші орынға Сарыбұлақ ауылының «Алаш» командасы ие болды. Жеңімпаздар арнайы сыйлықтармен марапатталды.

  • Ауа райына байланысты көлік жүргізушілеріне ескерту жасалды

    Ауа райына байланысты көлік жүргізушілеріне ескерту жасалды

    2024 жылғы 2 желтоқсанда Абай, Алматы, Ақтөбе, Батыс Қазақстан, Жамбыл, Жетісу, Солтүстік Қазақстан, Қарағанды және Шығыс Қазақстан облыстарының кей жерлерінде қар күтілуде.

    «Сол себепті жүргізушілерге қауіпсіздік ережелерін қатаң сақтап, жолдардағы ауа райының қолайсыздығын ескерулеріңізді сұраймыз», — делінген «ҚазАвтоЖол» хабарламасында.

  • Қазақстан шекарасында 40-тан аса шетелдік ұсталды

    Қазақстан шекарасында 40-тан аса шетелдік ұсталды

    ҰҚК Шекара қызметі қарашада мемлекеттік шекара арқылы заңсыз өткізу әрекетінің 1313 дерегін тіркеді, – деп хабарлайды ҰҚК баспасөз қызметі.

    ҰҚК Шекара қызметі Мемлекеттік шекараны күзету мен қорғауды қамтамасыз ету аясында 2024 жылғы қарашада құзырлы органдармен өзара әрекеттесе отырып: шекара кеңістігінде 5 785 Қазақстан Республикасының заңнамаларын бұзушы ұсталды, соның ішінде:

    • 17 шетел азаматы шекараны бұзғаны үшін ұсталды;
    • 19 шетел азаматымен шекараны бұзу әрекеттерінің жолы кесілді.

    Мемлекеттік шекара арқылы 1 313 заңсыз алып өту деректерінің алды алынды, соның ішінде:

    • 26 – есірткі заттары;
    • 62 – қарулар мен оқ-дәрілер (30 дана атуға жарамсыз, 1 дана ату, 1 дана пневматикалық, 43 дана суық қарулары, 136 дана оқ-дәрілер, 18 дана электрошокерлер);
    • 35 – діни әдебиет (1 215 дана);
    • 414 – жалпы сомасы 50 миллион теңгеден асатын жанар-жағармай материалдары (55 литрден астам);
    • 644 – жалпы сомасы 3,5 миллиард теңгеден астам халық тұтыну тауарлары;
    • 132 – жалпы сомасы 3 миллиард теңгеден астам шетел валютасы.

    Каспий акваториясында 7 браконьерлік деректерінің алды алынды, сондай-ақ:

    • 1 дана жүзу құралдары;
    • жалпы ұзындығы 44,3 шақырым торды құрайтын браконьерлік аулау құралдары;
    • 206 дана (1 633 келі) бекіре тұқымдас балықтар;
    • 46 дана (30 келі) таза тұқымдас балықтар;
    • 28 дана итбалығы;
    • алды алынған залал сомасы 620 миллион теңге болады.

    «Бұл фактілер бойынша материалдар бұзушыларды жауапкершілікке тарту үшін құқық қорғау және сот органдарына жіберілді. Мемлекеттік шекарада қандай да бір шектеу шаралары енгізілген жоқ, барлық өткізу пункттері штаттық режимде жұмыс істеп жатыр», – делінген ҰҚК баспасөз қызметі хабарламасында.

  • Омбудсмен 12 жасқа дейінгі балаларды үйде жалғыз қалдыруға тыйым салуды ұсынды

    Омбудсмен 12 жасқа дейінгі балаларды үйде жалғыз қалдыруға тыйым салуды ұсынды

    Динара Зәкиева 12 жасқа толмаған балаларды ересектердің қарауынсыз үйде жалғыз қалдыруға заң жүзінде тыйым салуды ұсынды. Балалар омбудсмені Ақмола облысында өрттің салдарынан қаза тапқан балалардың жақындарына көңіл айтты.

    Сондай-ақ, оның айтуынша биыл Қазақстанда тіркелген 15 өрттің салдарынан балалар қаза тауып, осы жағдайлардың көпшілігінде олар үйде жалғыз болған.

    Осы фактілерді талдай отырып, 12 жасқа дейінгі балаларды кәмелетке толған адамдардың қарауынсыз қалдыруға тыйым салу бойынша заңнамалық шараларды пысықтау қажет деп санаймын. Бұл ретте көмекке мұқтаж отбасылар мемлекет тарапынан берілетін қолдау шараларымен қамтамасыз етілуі қажет, – деп жазды Динара Зәкиева Instagram парақшасына.

  • Талғар аудандық Полиция басқармасына жаңа басшы тағайындалды

    Талғар аудандық Полиция басқармасына жаңа басшы тағайындалды

     «ҚР Ішкі істер министрінің бұйрығымен Талғар ауданы Полиция басқармасының бастығы лауазымының міндетін атқарушы болып полиция подполковнигі Айдар Әбдікерімұлы Омаров тағайындалды», — делінген хабарламада.

    Естеріңізге сала кетейік, осы жылдың қазан айында Талғар ауданында 16 жастағы Шерзат Болат бір топ бұзақының қолынан қаза тапты. Жасөспірімнің өлімінен кейін Алматы облысында бірқатар жоғары лауазымды полицейлер қызметінен босатылды.

    Олардың орнына полиция қызметі басқармасының бастығы лауазымына Абдунур Тасыбаев және Ұйымдасқан қылмысқа қарсы күрес басқармасының бастығына Байжан Сатылғанов тағайындалды. Мейрам Әбікеев Алматы облысы Полиция департаментінің бастығы болды.

    Сондай-ақ, Алматы облысы мен Талғар ауданы әкімдігінің бірқатар қызметкері мен прокурорлары қызметінен кеткен болатын.

  • Келесі жылы елімізде 41 706 азамат әскер қатарына шақырылады

    Келесі жылы елімізде 41 706 азамат әскер қатарына шақырылады

    Тиісті құжат жобасы жарияланып, талқылауға ұсынылды.  Келесі жылы 41 706 азамат әскер қатарына шақырылады.

    «Әскерге шақыру комиссияларының жұмысын және әскерге шақыруды кейінге қалдыруға немесе одан босатылуға құқығы жоқ он сегіз жастан жиырма жеті жасқа дейінгі саны 41 706 ер азаматты 2025 жылдың наурыз-маусымында және қыркүйек-желтоқсанында әскерге шақыруды жүргізуді қамтамасыз етуді, Қазақстан Республикасының заңнамасына сәйкес әскерге шақыру пункттерін медициналық қамтамасыз етуді ұйымдастырсын», – делінген бұйрық жобасында.

    Ішкі істер министрлігі әскерге шақырылушыларды жинау және әскерлерге жөнелту орындарында ішкі істер органдары қызметкерлерінің күшейтілген кезекшілігін ұйымдастыратыны көрсетілген.

    Құжат «Ашық НҚА» порталында 13 желтоқсанға дейін жария талқылауда болады.

  • Джо Байден өз ұлына рақымшылық жасады

    Джо Байден өз ұлына рақымшылық жасады

    АҚШ президенті Джо Байден екі қылмыстық іс бойынша кінәлі деп танылып, үкімін күтіп отырған ұлы Хантерге рақымшылық жасады, делінген  Ақүй мәлімдемесінде.

    – Осы қызметтегі алғашқы күннен бастап мен Әділет министрлігінің шешімдеріне араласпайтынымды айттым және ұлымның әділетсіз қудаланғанын бақылап отырсам да, өз сөзімде тұрдым, – деді Байден.

    Қыркүйек айында Байденнің өзі де, оның баспасөз хатшысы да ұлына рақымшылық жасау туралы жарлық шығарылмайтынына сендірді.

    Маусым айында сот 54 жастағы Хантер Байденді 2018 жылы қару сатып алу кезінде есірткіге тәуелді екенін жасырғаны үшін айыптады. Кіші Байден АҚШ тарихындағы қазіргі президенттің қылмысы үшін сотталған тұңғыш ұлы болды. Содан кейін қыркүйекте Хантер Байденнің өзі салық төлеуден жалтарғанын мойындады.

    Жексенбі күні кешке жариялаған мәлімдемесінде Джо Байден ұлының соттары «саясатпен ластанғанын», сол себепті заңсыз шешімдермен аяқталғанын мәлімдеді.

    – Мен бұл шешімді қабылдаған кезде, оны кейінге қалдырудың қажеті болмады. Америкалықтар әке мен президенттің неге мұндай шешімге келгенін түсінеді деп үміттенемін, – делінген хабарламада.

    Хантер Байденге үкім 12 және 16 желтоқсанда шығарылады деп жоспарланған болатын. Екінші жағдайда, 2016-2019 жылдары 1,4 миллион доллар көлемінде салық төлеуден жалтарғаны үшін ол 15 жылға дейін бас бостандығынан айырылуы мүмкін.

    Сайлау қарсаңында АҚШ президенттігіне үміткер Дональд Трамп сайлауда жеңіске жетсе Байденнің ұлына рақымшылық жасауы мүмкін екенін айтқан болатын.

  • Кегенде Заманбек Нұрқаділовке арналған ескерткіш-бюст ашылды

    Кегенде Заманбек Нұрқаділовке арналған ескерткіш-бюст ашылды

    Бүгін Алматы облысы Кеген ауданының орталығында мемлекет және қоғам қайраткері Заманбек Нұрқаділовке арналған ескерткіш-бюсттің ашылу салтанаты өтті. 

     Бұл шара Мемлекет басшысы Қасым-Жомарт Тоқаевтың тапсырмасы аясында жүзеге асырылды. Сонымен қатар, Кеген ауылындағы балалар өнер мектебіне Заманбек Нұрқаділовтің есімі берілді.

    Ескерткіштің ашылу рәсімі Заманбек Нұрқаділов атындағы өнер мектебінің алаңында ұйымдастырылды. Салтанатты шараға мемлекет және қоғам қайраткерлері, ақын-жазушылар, танымал тұлғалар мен қайраткердің отбасы мүшелері қатысты. Ескерткіштің ашылуын облыс әкімінің орынбасары Нұржан Құдайбергенов, қоғам қайраткерлері Тоққожа Естенов пен Болат Нұрғазиев ашып, Заманбек Нұрқаділовтің ұлы Қайрат Нұрқаділов бюстің ашылу рәсімін орындады.

    Ескерткіштің авторлары – мүсінші Айдос Бүркітбаев пен Тимур Нұрмұхаметов.

    Салтанатты рәсімнен кейін қатысушыларға Заманбек Нұрқаділовтің өмірі мен қызметі туралы «Не только о себе» атты кітаптың 300 данасы таратылды.

  • Каспий деңгейі екі метрге төмендеді

    Каспий деңгейі екі метрге төмендеді

    2006 жылдан бері судың деңгейі 2 метрге төмендеген. Бұл құбылысты Ақтау тұрғындары да байқап, әлеуметтік желіге жүктеп жатыр.

    Халық бірнеше жыл бұрын түсірілген қала жағажайы мен оның бүгінгі көрінісін салыстырып, теңіздің тартылу себебін анықтау қажет деп дабыл қағып жатыр. Әуесқой фотограф Қанатбек Кенжеғұлов үш жыл бұрын теңізде тастың үстіне қонақтаған қос шағаланы түсіріпті.

    «Сол кезде жартастың екі ұшы су бетінде көрініп тұрды. Қазір су жағалаудан шегініп кеткен соң, басқа да ірілі-ұсақ тастармен бірге құрлыққа шығып қалды. Осыған қарап, Каспийдің қаншалықты тартылғанын байқауға болады», – дейді қала тұрғыны.

    Экологтардың мәліметінше, теңіздің таяздануынан су түбіндегі қысым азайып, улы газдар бөлінуі мүмкін. Бұдан оның флорасы мен фаунасына қауіп бар.

    «Мәселенің шешудің бір жолы –  Каспий маңындағы бес мемлекет өзара келісімге келіп, айдынға жүзден астам өзеннен келіп құйылатын судың мөлшерін көбейту қажет», – дейді мамандар.