Sona.kz

Рубрика: Қоғам

  • Рамазаннан екі күн бұрын арақ ішкен адамның оразасы қабыл бола ма? – Мүфтият пәтуа шығарды

    Рамазаннан екі күн бұрын арақ ішкен адамның оразасы қабыл бола ма? – Мүфтият пәтуа шығарды

    Қазақстан Мұсылмандары діни басқармасы Рамазан айына дейін арақ ішкен адамның оразасы қабыл бола ма деген сұраққа қатысты пәтуа жариялады. ҚМДБ өкілдеріне сенсек, шын тәубе етсе, Рамазан айынан бұрын арақ ішкен адамның оразасы арақ ішпей ораза тұтқан адамның оразасындай қабыл болады.

    «Арақ-шарап ішу – дінімізде харам, үлкен күнә саналады», – деп жазған мүфтият бұған қатысты Құран аяттарын мысалға келтірген.

    «Пайғамбарымыз (оған Алланың салауаты мен сәлемі болсын): «Кімде-кім арақ ішетін болса, оның қырық күндік намазы қабыл болмайды» деген. Тағы бір хадисте: «Кім арақ ішсе, оның қырық күндік намазы қабыл болмайды. Егер тәубе етсе, Алла оның тәубесін қабыл етеді. Одан кейін тағы да арақ ішсе, Алла оның қырық күн намазын қабыл етпейді. Егер тәубе етсе, Алла тәубесін қабыл етеді. Бұдан кейін тағы арақ ішсе, Алла оның тағы да қырық күндік намазын қабылдамайды. Бұл ісіне тәубе етсе, тәубесі қабыл етіледі. Ал төртінші рет тағы да арақ ішсе, Алла оның қырық күндік намазын қабыл етпейді. Егер тәубе етсе, Алла оның тәубесін қабыл етпейді де оны «хабәл» (тозақтықтардың іріңінен жиналған) өзенінен сусындандырады» делінген», – деп жазған мүфтият.

    Ал, Рамазан айының қарсаңында ішімдік ішудің үкімі туралы жазған мүфтият «ораза ұстаушы Рамазан айынан екі күн бұрын арақ ішіп, соңынан шынайы тәубе етсе, Алла оның тәубесін қабыл етеді. Оның оразасы арақ ішпей ораза тұтқан адамның оразасындай болады. Ал ораза ұстап арақ ішуін доғармаса, оразасы дұрыс болады, бірақ сауабы болмайды. Арақ ішкені үшін күнә арқалайды» деген пәтуа шығарып отыр.

  • Тәрбиеші баланы тұншықтарған: Алматыда балабақша тәрбиешісі мен меңгерушісі жұмыстан қуылды

    Тәрбиеші баланы тұншықтарған: Алматыда балабақша тәрбиешісі мен меңгерушісі жұмыстан қуылды

    Алматыда «Ахляк» балабақшалар желісінің негізін қалаған Амина Юсупбаева қаладағы бөлімшелердің бірінде болған оқиғаға қатысты пікір білдіріп, зардап шеккен баланың ата-анасынан кешірім сұрады.

    Оның сөзінше, балабақша тәрбиешісі мен меңгерушісі жұмыстан босатылды, ал директорларға айыппұл салынған. Сондай-ақ оқиға болған филиалдың қызметі тоқтатылды.

    «Жұбайым екеуміз алғашқы балабақшамызды ашқанымызға 10 жылдан асты. Көпбалалы ата-ана ретінде біз де басқалар сияқты мектепке дейінгі білім берудің барлық құндылығы мен жауапкершілігін түсінеміз. Жұбайым екеуміз ұйымның атынан балаға келтірілген зиянды өтеу үшін қолдан келгеннің бәрін жасауға дайынбыз», – деді Амина Юсупбаева.

    Мекеме басшысы мұндай жағдай бірінші рет болды деп отыр. Ол зардап шеккен кішкентай баланың ата-анасынан кешірім сұрап, тәрбиешінің іс-әрекетін айыптайтынын және қолдамайтынын жеткізді.

    Кәсіпкер балабақша қызметкерлері мекемеде бейнебақылау камералары бар екенінен хабардар болғанын айтты. Енді мекеме басшылығы балалармен тікелей жұмыс істейтін тәрбиешілерді іріктеу және жұмысқа қабылдау процесін толығымен қайта қарамақ.

  • Бұрынғы тергеуші Алматыда есірткімен ұсталды

    Бұрынғы тергеуші Алматыда есірткімен ұсталды

    Алматыда есірткі қылмысына қарсы күрес басқармасының қызметкерлері екі әйелді гашиш пен мефедронмен ұстады. Олардың бірі жуырда ғана ішкі істер органдарында жұмыс істеген болып шықты.

    Orda.kz дереккөзінің мәліметінше, күштік құрылымдар тінту кезінде олардан 3,5 келіге жуық есірткі тапты. Сонымен қатар, ұсталғандардың бірінен қызметтік куәлік табылған.

    «Жалдамалы пәтерге тінту жүргізіліп, есірткі заттары тәркіленді. Олардың нақты шығу тегі мен кімге тиесілі екенін сот-химиялық сараптама анықтайды. Күдіктілер уақытша ұстау изоляторына қамалды. Өзге мән-жайлар анықталуда», – деп мәлімдеді Алматы полиция департаменті.

    Бізге тінту сәтінен түсірілген кадрлар да түсті. Фототағы қызметтік куәлікке қарағанда, ұсталғандардың бірі Қарағанды полициясында тергеуші болып жұмыс істеген. Алайда, Қарағанды облысының полиция департаменті «ұсталған Елена В. 2024 жылдың 29 тамызында өз еркімен жұмыстан шыққанын» мәлімдеді.

    Бұл – полицейлердің есірткі саудасымен айналысқаны туралы алғашқы оқиға емес. 2022 жылдың мамыр айының соңында Ақтөбеде қалалық полиция бөлімінің қызметкері ұсталған болатын. Погондағы дилер қылмыстық істер бойынша айғақ ретінде алынған есірткі заттарын ұрлап, сатумен айналысқан. Ол бірден екі бап бойынша сотталды, есірткі сату және қызметтік жалғандық жасау.

  • Астанада жүк пойызында жарылыс болды

    Астанада жүк пойызында жарылыс болды

    14 ақпанға қараған түні Астанадағы теміржол вокзалына пойыз арқылы жеткізілген контейнер жарылып кетті. Осыған байланысты полиция қылмыстық іс қозғады.

    Төтенше жағдай түнгі сағат 00:25-те Астана стансасындағы іріктеу алаңының 12-жолағында болды. Елордаға пойыз арқылы жеткізілген жүк контейнері жарылған. Бір адам қолынан жеңіл жарақат алды, алайда ауруханаға жатқызуды қажет етпеді.

    Полицейлер жолаушылар мен жақын маңдағы тұрғындарға қауіп төнбегенін хабарлады.

    «Көліктегі полиция департаменті бұл оқиға бойынша «Темір жол көлігін пайдалану немесе қозғалыс қауіпсіздігі ережелерін бұзу» бабы бойынша қылмыстық іс қозғады. Оқиға орнына дереу департамент басшылығы жеткен. Арнайы жедел топ құрылды, олар оқиғаның барлық мән-жайын анықтауға кірісіп кетті», – деп хабарлады Көліктегі ПД.

    ҚТЖ жарылған контейнердің жеке компанияға тиесілі екенін хабарлады. Алдын ала мәлімет бойынша ішінде электр жабдықтары – трансформаторлар мен генераторлар болған.

  • Қарт кісі баспанасын сатып, түскен ақшаны алаяқтарға аударып жіберген

    Қарт кісі баспанасын сатып, түскен ақшаны алаяқтарға аударып жіберген

    Көкшетауда 74 жастағы зейнеткер пәтерін сатып, түскен ақшаны алаяқтарға беріп жіберген.

    Облыстық ПД мәліметінше, қылмыскерлер әйелді арнайы операцияны өткізуде құқық қорғау органдарына көмектесетініне сендірді.

    Көкшетауда полицейлер 74 жастағы зейнеткер құрбан болған ірі алаяқтық фактісі бойынша қылмыстық істі тергеп жатыр. Сенімге кіргеннен кейін қылмыскерлер әйелді өз пәтерін сатуға және барлық ақшаны белгісіз бір шоттарға аударуға көндірген.

    «Қылмыстық іс материалдарынан көрініп тұрғандай, 3 ақпанда жәбірленушінің «WhatsApp мессенджері арқылы хабарлама келген. Белгілі болғандай, қазіргі уақытта құқық қорғау органдары қызметкерлері, оның ішінде зейнеткерлікке шыққан қызметкерлер де, ақпараттық ағындардың заңсыз кетуі мен террористік ұйымдардың қаржылық демеушілігіне қатысты тексерулер жүргізіп жатыр. Күні бойы зейнеткерге ҰҚКД және Ұлттық Банктің қызметкерлері ретінде жалған қоңыраулар түсіп, алаяқтар оның атынан тыйым салынған ұйымдарға қаржы аударайын деп жатқанын айтып сендірген. Алайда, бұл қылмыстық әрекеттерді тоқтату үшін әлі де мүмкіндік бар екенін айтып, алаяқтық әрекетін іске асырды.

    Банктің жалған менеджері ақмолалық әйелге өз пәтерін алаяқтарға сату қажеттігін түсіндірген. Ол пәтерді сатқан соң, қауіпсіздік қызметкерлері алаяқтарды ұстап, сатып алу-сату мәмілесі жойылады деп сендірген. Сонымен қатар, әйелге бұл арнайы операцияға қатысатыны туралы ешкімге айтуға болмайтыны ескертілген. Алаяқтар оған жергілікті пәтер сатып алушысы болып көрінетін адамның нөмірін беріп, 18,5 миллион теңгеге пәтер сатып алу туралы келісім жасалған. Осыдан кейін әйел мен риэлтор мәмілені рәсімдеп, ол түскен ақшаны толық көлемде үшінші тұлғалардың шоттарына аударған. Барлығы 30-дан астам транзакция жасап, әртүрлі жерлерде ақша аударымдарын жүргізген», — делінген ПД хабарламасында.

    11 ақпанда ақмолалық полицияға алаяқтық әрекеттер туралы арыз жазды. Қазіргі уақытта сотқа дейінгі тергеп-тексеру және жедел іс-шаралары жүргізілуде.

  • 88 адамды алдаған күдікті Грузиядан экстрадицияланды

    88 адамды алдаған күдікті Грузиядан экстрадицияланды

    Бас прокуратураның мәліметінше, 2020 жылы аталған тұлға адамдар тобының алдын ала сөз байласуымен және субсидия алуға көмек көрсету сылтауымен Ұлытау облысының 88 тұрғынының қаражатын иемденіп, жалпы сомасы 30 миллион теңгеден астам шығын келтірген.

    «Екі сыбайласы әр түрлі жазаға тартылды. Ал күдікті қылмыс жасағаннан кейін жасырынған. Сондықтан ол  халықаралық іздеуге жарияланды.

    2024 жылы ол Грузия аумағында анықталып, Қазақстан Республикасы Бас прокуратурасының сұрау салуы бойынша отанына экстрадицияланды.

    Қазір күдікті Ақтау қаласының тергеу изоляторына қамауға алынды», – делінген хабарламада.

    Айыпталған қылмысты жасағаны үшін мүлкі тәркіленіп, үш жылдан жеті жылға дейін бас бостандығынан айыру жазасы қарастырылған.

    Бас прокуратура азаматтарды алаяқтардың құрбаны болудан сақ болуға шақырады. Өзіңізді және жақындарыңызды қаржылық шығындардан қорғаңыз.

  • Есірткі қылмысына қарсы күреске арналған Telegram-бот таныстырылды

    Есірткі қылмысына қарсы күреске арналған Telegram-бот таныстырылды

    «Нашақорлыққа жол жоқ» жобасын іске асыру аясында облыс прокуратурасының үйлестіруімен Спорт федерациясы, мәслихат депутаттары және полиция департаментінің ұйымдастыруымен жастар арасында республикалық киокушинкай-кан каратэ бойынша халықаралық турнир өтті.

    Турнирге Қырғыз Республикасынан және еліміздің 9 облысынан 300-ден астам спортшы қатысты. Спорттық шарамен қатар, іс-шара аясында нашақорлыққа қарсы күрес бойынша маңызды профилактикалық жұмыс жүргізілді.

    Шара барысында қатысушылар мен көрермендерге облыстық прокуратура әзірлеген Telegram-боттың жұмыс алгоритмі таныстырылды. Сондай-ақ, ботқа сілтемесі бар QR-кодтары бейнеленген ақпараттық парақшалар таратылды.

    Қазіргі уақытта Telegram-боттың мүмкіндіктері туралы халықты хабардар ету және ақпараттық парақшаларды тарату жұмыстары облыстың барлық аудандарында жалғасуда. Боттың қызметімен танысу үшін сілтеме арқылы өтіп, «Пайдалы ақпарат» бөлімін таңдауға болады.

    Кез келген азамат «Сенім телефоны» функциясын басу арқылы облыстық прокуратура мен полиция департаменті қызметкерлерінің байланыс нөмірлерін ала алады.

    Облыстық прокуратура Telegram-боттың енгізілуі нашақорлықпен күресті жеделдетіп, мемлекеттік органдар, білім беру мекемелері және қоғам арасындағы ынтымақтастықты нығайтуға ықпал ететініне сенімді.

  • «Жын қуғыш» атыраулық емші әкімшілік жазамен құтылатын болды

    «Жын қуғыш» атыраулық емші әкімшілік жазамен құтылатын болды

    Кішкентай балалардың ішінен «шайтан қуып» емдеп, көпшіліктің ашуына тиген атыраулық емші Кейқуат Оспановқа қатысты әкімшілік жаза қолданылады. Бұл туралы Бас прокурордың орынбасары Ғалымжан Қойгелдиев айтты.

    «Бұл іс бойынша тексеру жұмыстары жүріп жатыр. Баланың ата-анасынан арыз-шағым түспеген, сондықтан оны әкімшілік жазаға тарту қарастырылып жатыр», — деп жауап берді Ғалымжан Қойгелдиев.

    Еске салайық, Алматыда емші Кейқуат Оспановқа әйел адам кәмелетке толмаған қызын алып келген. Айтуынша, кішкентай қызы ересек адамның қылығын жасайтын көрінеді. Емші қыз баланың ішіне «жын кірген» деп шешіп, оны шығармақ болған. Баланың қолын байлап, тамағынан қысып, өзінің білетін емін жасаған. Кейін емшінің тағы бір 12 жастағы баланың «жынын шығарып» жатқан видеосы тарады.

    Кейін оның мешітте имам емес, күзетші болып болып жұмыс істегені анықталды.

  • Жаңа босанған әйел қан құюдан кейін АИТВ жұқтырған

    Жаңа босанған әйел қан құюдан кейін АИТВ жұқтырған

    Денсаулық сақтау министрі Ақмарал Әлназарова Қызылордада жаңа босанған әйелдің қан құюдан кейін АИТВ жұқтырғанын растады.

    «Бұл жағдай министрліктің бақылауында. Тиісті тексерістер жүргізіліп жатыр. Қазір ешкім жауапкершілікке тартылмады деп айта алмаймыз. Тергеу қорытындысы бойынша тисті шешім қабылданады», –  деді ведомство басшысы Мәжіліс кулуарында.

  • «Қалаулымнан» шыққан Бердах Бекетов 7 жылға сотталды

    «Қалаулымнан» шыққан Бердах Бекетов 7 жылға сотталды

    Алматыда қаңтар оқиғаларына қатысты айыпталушыларға үкім оқылуда, олардың арасында «Қалаулым» бағдарламасының қатысушысы болған Бердах Бекетов 7 сотталды. 

    Бердах Бекетов Қаңтар оқиғасында «жаппай тәртіпсіздік жасады» деп айыпталып, 2022 жылы 22 қаңтарда көшеден ұсталып, қамауға алынды. Оған «Жаппай тәртіпсіздікке қатысты» деген айыппен қылмыстық іс қозғалған. Сот үкімімен бірнеше бап бойынша 7 жылға сотталды.

    Бердах Бекетов тергеу изоляторында отырып үш рет хат жазған. 25 қаңтардағы хатында прокурорлар сөзін тыңдамай жатқанын, азаптау көріп жатқанын жазып, көпшіліктен араша болуды сұраған.Сондай-ақ, Қазақстан президенті Қасым-Жомарт Тоқаевқа кінәсіздігі жайлы хат жазып, араша болуын сұраған.