Sona.kz

Рубрика: Зерттеу

  • Сакен Мамаш 6 жылға сотталды: экс-дипломаттың тұрмыстық зорлығы сотта дәлелденді

    Сакен Мамаш 6 жылға сотталды: экс-дипломаттың тұрмыстық зорлығы сотта дәлелденді

    Астанада бұрынғы дипломат Сакен Мамаштың үстінен қозғалған қылмыстық іс бойынша сот үкімі шықты. Ол өзінің бұрынғы жұбайы Карина Госманға жүйелі түрде зорлық-зомбылық көрсеткені үшін кінәлі деп танылып, 6 жылға бас бостандығынан айырылды.

    Сот отырысы жабық режимде өтті. БАҚ өкілдеріне тек алғашқы және соңғы отырысқа қатысуға рұқсат берілген. Үкім бойынша, Мамаш Қылмыстық кодекстің 110-бабының 2-бөлігіне сәйкес – материалдық тәуелді адамға жүйелі түрде қатыгездік көрсету бойынша айыпталды.

    Тергеу материалдарына сәйкес, 2019 жылдан 2024 жылға дейін, алдымен Астанада, кейін Абу-Дабиде ол әйелі Каринаға бірнеше рет күш қолданып, оны психологиялық қысымда ұстаған. Әйелдің еркін қозғалуына, жақындарымен қарым-қатынасына шектеу қойған, қоңыраулары мен жазысқан хаттарын үнемі бақылауда ұстаған. Сонымен қатар, жәбірленуші күйеуіне толықтай материалдық тұрғыдан тәуелді болған: өзі жұмыс істемеген, тек дипломат жұбайы ретінде жәрдемақы алып тұрған. Алайда сол қаражатты да Мамаш өз бетінше басқарған.

    Сотта жәбірленуші мен куәлардың айғақтары, медициналық сараптама қорытындылары, скриншоттар мен бейнематериалдар айыптау тарапына дәлел ретінде ұсынылды. Мамаш өз кінәсін мойындаған жоқ. Алайда сот оны кінәлі деп танып, 6 жылға бас бостандығынан айырып, дипломатиялық дәрежесінен де айырды.

    Сот үкімі әзірге заңды күшіне енген жоқ.

  • Әйелді баспалдақтан итеріп жіберген: Амантай қажының үстінен қылмыстық іс қозғалды

    Әйелді баспалдақтан итеріп жіберген: Амантай қажының үстінен қылмыстық іс қозғалды

    Желіде Амантай қажы Асылбековтің әйелді баспалдақтан итеріп жіберген сәті бейнеленген видео тарады. Қоғамда қызу талқы тудырған оқиғаны Алматы полициясы да растады.

    Оқиғаға қатысты Алмалы аудандық полиция басқармасы ҚР ҚК аясында қылмыстық іс қозғады.

    «Қазір оқиғаның барлық мән-жайын анықтауға бағытталған жедел-іздестіру және процессуалдық шаралар кешені жүріп жатыр. Қажетті сот-медициналық сараптамалар тағайындалды. Тергеу барысы Алматы қалалық полиция департаменті басшылығының бақылауында», — делінген ведомство таратқан ресми хабарламада.

  • Перизат Қайрат ісі: спонсорлар жалған уәде мен фейк құжаттарға сеніп, 200 миллион теңгесін аударған

    Перизат Қайрат ісі: спонсорлар жалған уәде мен фейк құжаттарға сеніп, 200 миллион теңгесін аударған

    Астанада өтіп жатқан Перизат Қайратқа қатысты алаяқтық іс бойынша сотта ASAR-UME қайырымдылық қорының президенті Асхат Нурмашев жауап берді. Бұл туралы Sona.kz Orda.kz-ке сілтеме жасап хабарлайды.

    Қор басшысы Перизат Қайраттың БҰҰ аясында жұмыс істейтін гуманитарлық хабқа қол жеткізе алатынына сеніп, 200 миллион теңге аударғанын айтты. Оның сөзінше, Перизат Абу-Дабиде орналасқан арнайы қоймамен байланысы барын және тіпті араб корольдік отбасының өкілдерімен дос екенін алға тартқан.

    «Біз көмекті қай арнамен жөнелтуге болатынын іздедік. Сол кезде әлеуметтік желіде Перизат Қайраттың Палестина елшілігімен бірігіп жұмыс істеп жатқаны айтылды. Біз кездескенде ол хабты өз көзімен көруді ұсынды, сол үшін Дубайға бірге ұштық», – деді Асхат Нурмашев.

    Нурмашев хабты көріп, Перизаттың байланыстарына сенімді болғанын айтады. Сол негізде 10 қарашада қор 200 миллион теңге көлеміндегі алғашқы траншты аударған.

    Кейінірек Перизат уәде еткен есептерді бермеген. Құжаттар бірнеше рет кейінге қалдырылып, тек ақпан айында ғана Абу-Дабидегі қордың атына жасалған банктік төлем қағаздары келіп түскен. Алайда тергеу бұл құжаттардың жалған екенін анықтады.

    «Басында біз оның шыншылдығына күмәнданған жоқпыз. Бірақ құжаттардың жалған екенін тергеу дәлелдеді. Қалған 93 миллион теңгені біз кейін Палестина елшілігінің ресми шотына өзіміз аудардық», – деді Нурмашев.

    Сот барысында Перизат Қайратқа жәбірленушілермен жалған уәделер арқылы байланыс орнатты, жалған есептер мен құжаттар дайындады деген айып тағылды. Қазіргі таңда сот тергеуі жалғасуда.

  • Перизат Қайрат сотта Бауыржан Байбекті жауапқа шақыруды талап етті

    Перизат Қайрат сотта Бауыржан Байбекті жауапқа шақыруды талап етті

    BIZ BIRGEMIZ қоры қаржысын жымқыру ісі бойынша өтіп жатқан сот процесінде айыпталушы Перизат Қайрат партияның бұрынғы төраға бірінші орынбасары Бауыржан Байбекті сотта жауапқа тартуды сұрады. Бұл туралы NUR.KZ тілшісі хабарлайды.

    «Тергеу қорытындысында бірінші абзацтан-ақ мені анаммен бірге қор құрып, қол қоюларды қолдан жасады деп айыптайды. Бірақ бұл қор партия жанынан, Байбектің басшылығымен құрылған. Барлық құрылтайшылар – мені қоспағанда – бұрынғы не қазіргі партия қызметкерлері», – деді Перизат Қайрат сотта.

    Еске салайық, Бауыржан Байбек 2019 жылға дейін Алматы әкімі қызметін атқарды. Кейін «Nur Otan» (қазіргі «Amanat») партиясы төрағасының бірінші орынбасары қызметіне тағайындалып, 2022 жылдың басына дейін осы лауазымды атқарды.

  • Перизат Қайрат 3 миллионнан астам теңгені тіс емдеуге жұмсаған – прокурор

    Перизат Қайрат 3 миллионнан астам теңгені тіс емдеуге жұмсаған – прокурор

    Перизат Қайратқа қатысты іс бойынша өткен сот отырысында прокурорлар айыпталушының қайырымдылық қаржысын жеке қажеттіліктеріне қалай жұмсағанын айтты, деп хабарлайды Tengrinews.kz тілшісі.

    Прокурор Мадина Оразалинаның айтуынша, айыпталушы Перизат Қайрат мүмкіндігі шектеулі балалардың ерекше күтім мен емге мұқтаж екенін біле тұра, анасы Ғайни Алашбаевамен бірге жиналған қаражатты жеке мақсаттарына пайдаланған.

    Атап айтқанда:
    • 5,5 млн теңге банк шотынан қолма-қол ақшаға айналдырылған;
    • 2 970 000 теңге Перизат Қайраттан Алашбаеваның шотына аударылып, кейін өз қалауынша жұмсалған.

    Сондай-ақ:
    • 1 млн теңге қоғамдық бірлестік шотынан реабилитациялық орталыққа арналмаған кілем сатып алуға жұмсалған;
    • Бірлестіктің өз ішінде 11,7 млн теңге аударылып, оның 10 727 159 теңгесі шешіп алынған;
    • 243 464 теңге авиабилеттер мен супермаркеттен азық-түлікке кеткен;
    • 577 000 теңге жеке шоттарға аударылған;
    • 3 290 000 теңге тіс емдеуге төленген;
    • Жалпы 7 128 500 теңге қолма-қол ақшаға айналдырылған.

    Сот процесі жалғасып жатыр.

  • Олеся Кексель азаптау ісі бойынша күдікті деп танылды

    Олеся Кексель азаптау ісі бойынша күдікті деп танылды

    Олеся Кексель азаптау фактісі бойынша күдікті деп танылды. Бұл туралы Tengrinews.kz Генеральды прокуратураның жауабына сілтеме жасап хабарлады.

    Ведомствоның мәліметінше, 2025 жылғы 4 шілдеде Сыбайлас жемқорлыққа қарсы іс-қимыл ұлттық бюросы Тергеу департаменті басшысының бұрынғы орынбасарына Қылмыстық кодекстің 146-бабы 2-бөлігі 1 және 2-тармақтары («Азаптау») бойынша күдік келтірілген.

    Қазірге кезде алдын ала тергеу жалғасып жатыр. Тергеушілер қосымша дәлелдер жинауда. Тергеу мүддесіне байланысты өзге мәліметтер жария етілмейді.

  • Перизат Қайрат ісі: тергеу нұсқасы бойынша 3,5 миллиард теңге қайда жұмсалды

    Перизат Қайрат ісі: тергеу нұсқасы бойынша 3,5 миллиард теңге қайда жұмсалды

    Қайдан келген қаражат:
    • 2,86 млрд теңге — тасқыннан зардап шеккендерге көмек көрсету сылтауымен;
    • 566 млн теңге — Газа секторына қолдау ретінде жиналған;
    • 105 млн теңге — шын мәнінде өтпеген фестивальдер мен форумдарға;
    • 21,6 млн теңге — мүмкіндігі шектеулі балаларға арналған аукционнан;
    • Қалған қаражат — сайт пен Instagram арқылы түскен өзге де қайырымдылықтар.

    Қайда жұмсалған:
    • 7 пәтер сатып алынған: Highvill, Akbulak, Vela Village сынды элиталық кешендерде;
    • 3 автокөлік: Lexus LX 600, Mercedes S 450, Haval H6 GT;
    • Люкс брендтерге 150 млн теңгеден астам: Cartier, Van Cleef, Gucci, Dior зергерлік бұйымдары;
    • Rebel Flowers гүл бизнесі іске қосылған;
    • 17 шетелдік сапар: Лондон, Дубай, Катар, Түркия және т.б.;
    • Бір пәтердің жөндеу жұмысына 123 млн теңге жұмсалған;
    • Күнделікті шығындар: мейрамхана, техника, жиһаз, сантехника, айыппұлдар мен жазылулар;
    • Жымқырылған қаражатты заңдастыру: киіз үй, көмір, зергерлік бұйымдар мен гүл жеткізу сылтауымен жалған ЖК арқылы ақшаны қолма-қол айналдыру.

    Сот отырыстары жалғасуда.

  • Перизат Қайрат ісі бойынша айыптауды Астананың үздік прокурорлары қолдап отыр

    Перизат Қайрат ісі бойынша айыптауды Астананың үздік прокурорлары қолдап отыр

    Перизат Қайрат пен оның анасына қатысты сот процесінде айыптаушы тарапты Арман Кезекен мен Мәдина Оразалина өкілдік етеді. Олар сотта бірлесіп жұмыс істеп, істі бірге жүргізіп жатыр.

    Құқық қорғау органдары академиясының әлеуметтік желілердегі жарияланымдарына сәйкес, бұл екі мемлекеттік айыптаушы Астананың үздік прокурорларының қатарына кіреді. Олардың артында күрделі әрі резонансты істерді жүргізу тәжірибесі бар.

  • Астанада Перизат Қайрат ісі бойынша сот процесі басталды: барлық жайт бақылауда

    Астанада Перизат Қайрат ісі бойынша сот процесі басталды: барлық жайт бақылауда

    Елордада пандемия кезінде «Біз біргеміз» ұранымен танылған birgemiz.kz платформасының негізін қалаған Перизат Қайратқа қатысты атышулы сот басталды. Қазір ол – айыпталушылар қатарында.

    Сот процесі бейнежазба мен тікелей трансляциясыз өтіп жатыр. Журналистер сот отырысын тек баспасөз орталығынан бақылауда, деп хабарлайды Tengrinews.kz.

    Алғашқы отырыста прокурорлар айыптау актісін оқыды. Негізгі тұстар:
    • Перизаттың орта білім туралы толық аттестаты жоқ;
    • 2018 жылы ол «Halyk» қайырымдылық қорын және birgemiz.kz онлайн платформасын тіркеген;
    • Тергеу нұсқасы бойынша, ол пандемия кезінде брендтің танымалдылығын әдейі пайдаланып, халықтан «қайырымдылыққа» ақша жинаған;
    • Ақшаның аз бөлігі ғана шынымен көмекке жұмсалып, қалғаны қолма-қол ақшаға айналдырылып, жымқырылған;
    • Тергеушілердің пікірінше, бұл әрекетке туыстары мен жақын таныстары көмектескен;
    • Сонымен қатар, айыпталушы өзін табысты кәсіпкер және меценат ретінде көрсетуге тырысқан.

    Қазір іс алаяқтық және қылмыстық жолмен алынған табысты заңдастыру баптары бойынша қаралып жатыр. Сот отырыстары жалғасуда.

  • «Хоргос №1 ісі» бойынша азаптау дерегі: сот отырысы жабық өтеді

    «Хоргос №1 ісі» бойынша азаптау дерегі: сот отырысы жабық өтеді

    Айыпталушылар — бұрынғы қаржы полициясы қызметкерлері Кенжебай Жұмабеков пен Даурен Есімбеков. Оларға бірнеше рет азаптау жасағаны үшін айып тағылған (1997 жылғы ҚК 141-1-бап, 2-бөлім).

    Сот төрағасы Асия Қалқаева істегі мемлекеттік құпияларға байланысты процесті жабық өткізу туралы шешім шығарды.

    Жәбірленушілер — бұрынғы кеден брокерлері Руслан Сыдыков, Нұрлан Сарымбетов пен Нұрбек Мұратбеков. Олар 2011 жылы экономикалық контрабандаға күдікті ретінде ұсталып, 2014 жылы 5 жылға сотталған. Кейін олар қысыммен мойындатылғандарын мәлімдеді.

    Азаптау дерегі бойынша іс тек 2023 жылы қозғалды. Жұмабеков қамауға алынса, Есімбековке елден шықпау туралы шектеу қойылды.

    Үшінші отырыста жәбірленушілер тыңдалуы тиіс болғанымен, сот журналистерді залдан шығарды. Үкім жариялауға БАҚ өкілдері қатыса алады.