«Ұлттық қор — балаларға» бағдарламасы іске қосылғаннан бері қазақстандықтарға шамамен 76,11 млн доллар төленді. Бұл қаражатты 365 553 адам баспана жағдайын жақсартуға және білім алуға пайдаланған.
Бірыңғай жинақтаушы зейнетақы қорының мәліметінше, бұл 2026 жылғы 1 қыркүйектегі көрсеткіш.
Биылғы жылдың басынан бері 170 156 қазақстандыққа жалпы сомасы 44,84 млн доллар төленген. Оның 31 млн доллардан астамы баспана жағдайын жақсартуға, ал 13,83 млн доллары білім ақысын төлеуге бағытталды.
Ең көп сұранысқа ие бағыт тұрғын үй құрылыс жинақ шотын толықтыру. Осы мақсатта 117 712 адамға 30,51 млн доллар аударылған.
Сонымен қатар 788 азамат 183,65 мың долларды ипотеканың бастапқы жарнасына пайдаланса, 437 қазақстандық тұрғын үй сатып алу кезіндегі соңғы есеп айырысуға 102,17 мың доллар жұмсаған.
Білім беру бағыты бойынша қаражаттың негізгі бөлігі Қазақстандағы оқу орындарының қызметін төлеуге бағытталды. Бұл мақсатта 47 584 адамға 12,96 млн доллар төленген.
Тағы 2 309 адам білім беру жинақ салымдарын 587,56 мың долларға толықтырған. Ал 861 азамат шетелдік оқу орындарындағы білім ақысын төлеуге 220,44 мың доллар жұмсады.
2025 жылдың қорытындысы бойынша бағдарламаға қатысушы әр балаға 130,71 доллар есептелді. 2024 жылы бұл сома 129,38 доллар, ал 2023 жылы 100,52 доллар болған.
Осылайша, бағдарламаға үш жыл бойы қатысқан баланың шотында инвестициялық табысты қоса есептегенде 370,56 доллар жиналған.
Нысаналы жинақты 18 жасқа толғаннан кейін баспана жағдайын жақсартуға немесе білім алуға пайдалануға болады. Қолданылмаған қаражат шотта 10 жылға дейін сақталады.
Бағдарламаның уәкілетті операторлары Отбасы банк, Halyk Bank және Банк ЦентрКредит. Отбасы банк арқылы қаражатты баспана мен білімге, ал қалған екі банк арқылы білім алуға жұмсауға болады.
